Kristus-Ferlosserkatedraal

Ut Wikipedy
Gean nei: navigaasje, sykje
De katedraal yn 1905.
De katedraal 2004

De Kristus-Ferlosserkatedraal (Russysk: Храм Христа Спасителя, Chram Chrysta Spasitelja) is in Russysk-Otterdoks godsgebou oan de rivier de Moskwa, justjes in eintsje westlik fan it Kremlin yn Moskou, Ruslân.

It hjoeddeiske tsjerkegebou is in kopy fan de yn 1931, yn opdracht fan Stalin, opblaasde katedraal. Dizze moast ferdwine yn it ramt fan Stalins weropbou fan Moskou. Alle godstsjinten wiene troch de Kommunistyske Partij ferbean en sadwaande wie der gjin plak mear foar "nutteleaze" tsjerken en kleasters. Op it lege boustee fan de opblaasde katedraal woe Stalin yn de jierren tritich in ûnbidich heech bouwurk delsette fan wol 315 meter, dêr't boppe-op in 100 meter heech byld fan Lenin komme moast. Dit moast de einoerwinning fan it Kommunisme symboalisearje. Lykwols koe dit dryste bouplan fan it Paleis fan de Sowjets sa't it neamd waard, net útfierd wurde om't de ûndergrûn der net gaadlik foar wie. Dat sadwaande hat men fan need mar besletten op dat steed in mânsk gemeentlik swimbad oan te lizzen, dat troch de Moskoviten brûkt is oan 1993 ta.

De foarste ferzje fan de katedraal waard boud tusken 1839 en 1883. Mei in hichte fan 103 meter wie it troch arsjitekt Konstantin Thon ûtwurpen gebou it heechste fan Moskou yn dy tiid. De reden fan de bou wie de betinking fan it feit dat de Russyske stêd him ûntdien hie fan it leger fan Napoleon Bonaparte.

De bou fan de nije katedraal duorre minder lang, fan 1994 oant en mei 1997, hoewol't der oan it ynterieur langer trochwurke is. De katedraal waard op 19 augustus 2000 wijd. It grûnoerflak fan it gebou is sa'n 9.000 m² en de katedraal jout dêrmei rûmte oan likernôch 10.000 minsken. De kosten fan it projekt wurde rûsd op in US$ 200 miljoen.