Zwakkenburgermole

	Zwakkenburgermûne
	bouwurk
	lokaasje
lân	Nederlân
provinsje	Grinslân
gemeente	Westerkertier
plak	Noardhorn
adres	Hoendiep Oostzijde 65
	bysûnderheden
type bouwurk	Poldermûne
monumintale status	ryksmonumint
monumintnûmer	397653

De Zwakkenburgermûne is in poldermûne súdlik fan it doarp Niezijl en eastlik fan Grypskerk, mar oan de westlike grins yn it doarpsgebiet fan Noardhorn, oan it Van Starkenborghkanaal yn de provinsje Grinslân.

Ornearre om de Zwakkenburger- en Ellersvelderpolder te bemeallen waard de mûne yn 1865 oarspronklik 200 meter noardliker boud. Yn 1955 ferlear de wynmûne syn funksje en waard der in diselmotor yn it achtkant set om de fizel oan te driuwen. De wjukken waarden ferwidere en de mûne rekke brekfallich.

Grinslânske mûneleafhawwers setten harren yn om fierder ferfal tefoarren te kommen, mar it duorre noch oant 2002 doe't it achtkant foar restauraasje fan it âlde plak helle waard. It die lykwols bliken dat it ferfal al sa fier hinne wie dat er foar in part ynsakke.

De restauraasje soe delkomme op in hast nije mûne en waard nei it wurk wer opboud oan de noardlike kant fan it kanaal. Op 10 oktober 2003 wie de weropbou foltôge en koe de mûne yn gebrûk nommen wurde.

De wjukken hawwe in flecht fan 15,8 meter (oare boarnen 16,8) en hawwe âldhollânsk hekwurk.

Eigner fan de mûne is de Stifting De Grinslânske Poldermûnen.