Paul Troep

Ut Wikipedy
(Trochwiisd fan Wabamun Reservaat 133A)
Jump to navigation Jump to search
Paul Troep
Gjin Flagge (Bekend).PNG
algemiene ynformaasje
Ingelske
  namme
Paul Band
etnisiteit Stony, Kry
lân Flag of Canada.svg Kanada
haadkertier Wabamun (Alberta)
ledetal 1.900 (2005)
erkenning Flag of Canada.svg Kanada
oprjochte 1877
reservaat
reservaat Wabamun Reservaat 133A
Wabamun Reservaat 133B
Buck Lake Reservaat 133C
lokaasje Alberta
oerflak 73½ km²
ynwenners 1.100 (2011)
offisjele webside
gjint
Lokaasje fan Stony-stammen yn Alberta.

De Paul Troep (Ingelsk: Paul Band) is in Yndiaanske stamme-organisaasje yn Kanada, mei eigen reservaten yn it sintrale part fan 'e provinsje Alberta. De namme komt ek wol (yn 'e besitlike foarm) foar as Pauls Troep (Paul's Band) en de stamme wurdt ek wol fan Paul Earste Naasje (Paul First Nation) neamd. ("Earste naasje" is in Kanadeeske oantsjutting foar in Yndianestam of -troep.) As offisjele stamme-organisaasje datearret de Paul Troep fan 1877. It haadkertier is fêstige yn Wabamun, yn Alberta, in doarp dat 67 km bewesten de stêd Edmonton leit.

Demografy[bewurkje seksje | boarne bewurkje]

Neffens gegegevens út 2005 hie de Paul Troep doe 1.900 leden. Dat binne foar it meastepart út etnyske Stony (Stoney), fan 'e substamme fan 'e Noardlike Stony, mei dêropta noch in groep Kry (Cree), fan 'e Wâld-Kry-substamme. Mei't der troch de jierren hinne mar frijwat yninoar omtroud is, leit in yndieling neffens etnyske skiedslinen wat dreech, mar rûchwei kin sein wurde dat der likernôch 1.600 Stony en sa'n 300 Kry wêze moatte.

Reservaten[bewurkje seksje | boarne bewurkje]

De Paul Troep hat trije eigen reservaten yn 'e omkriten fan Wabamun, dy't yn totaal 73½ km² beslane en yn 2011 in ynwennertal hiene fan 1.086 minsken. It giet om 'e folgjende reservaten:

  • It Wabamun Reservaat 133A (Wabamun 133A Reserve), oan Lake Wabamun, likernôch 70 km bewesten Edmonton, hat in oerflak fan 61,2 km², en der wennen yn 2011 1.069 minsken.
  • It Wabamun Reservaat 133B (Wabamun 133B Reserve) leit ek oan Lake Wabamun, deunby 133A, mar is folle lytser, mei in oerflak fan 1,8 km² en (yn 2011) in befolking fan 17 minsken.
  • It Buck Lake Reservaat 133C (Buck Lake 133C Reserve), leit net fier fan 'e oare beide reservaten ôf en hat in oerflak fan 10,4 km². Dit reservaat waard yn 1918 swier troffen troch de wrâldwide epidemy fan 'e Spaanske gryp, en is sûnt frijwol ûnbewenne.

Skiednis[bewurkje seksje | boarne bewurkje]

De opperhaden fan 'e Paul-troep fan 'e Noardlike Stony ûndertekenen yn 1877 in offisjeel dokumint wêrmei't se harren oansleaten by it Ferdrach Nû. 6, ien fan 'e regionale, saneamde Nûmere Ferdraggen tusken de ûnderskate Yndiaanske folken en de Britske koloniale autoriteiten fan Kanada. Yn 1892 waarden offisjeel de trije reservaten fan 'e Paul Troep oprjochte. Mei't Lake Wabamun yn Alberta in populêre fakânsjebestimming is, hat de stamme op reservaatlân de Ironhead Golf and Country Club oanlein, om mei te profitearjen fan it toerisme.

Boarnen, noaten en referinsjes[boarne bewurkje]

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side.