Simry fan Israel

Simry fan Israel
Simry, kening fan Israel (miniatuer út 1350-1375)
Persoanlike gegevens
alternative nammen	Samry
berteplak	net neamd yn 'e Bibel
stjerplak	Tirsa (1 Ken. 16:15)
folk	Israëlysk
Famylje
heit	net neamd yn 'e Bibel
mem	net neamd yn 'e Bibel
partner(s)	net neamd yn 'e Bibel
bern	net neamd yn 'e Bibel
Bibelske rol
titel / funksje	kening fan Israel
perioade	885 f.Kr. (7 dagen)
bekend fan	tige koart regear; Tirsa as haadstêd
neamd yn	1 Keningen 16:15–20
religieuze tradysje	joadedom; kristendom

Simry (Hebriuwsk: זמרי‎; †886 of 885 of 882 f.Kr.) regearde sân dagen lang as kening fan Israel.

De koarte hearskippij fan Simry wurdt yn it Alde Testamint yn 1 Keningen 16:8-20 beskreaun. Simry wie kommandant oer de helte fan 'e striidweinen fan kening Ela. Hy die in greep nei de macht troch kening Ela dea te slaan, doe't dy op besite wie by de hofmaarskalk yn Tirsa en him dêr bedronken hie. Mei dizze misdied kaam de profesije fan 'e profeet Jehû út, dy't earder de ûndergong fan it hûs fan Basa foarsein hie oan kening Basa, om't dy it sûndige belied fan Jerobeäm fuortsette. Nei't Simry de troan ynnommen hie, liet er it hiele hûs fan Basa útroegje.

Simry bleau net lang op de troan sitten, want hy krige gjin militêre stipe. Doe't de soldaten, dy't op dat stuit de stêd Gibbeton belegeren, fan 'e steatsgreep hearden, keazen dy harren kommandant Omry ta kening. Op dat stuit hie Israel dus twa keningen. Der koe mar ien kening wêze en dêrom briek Omry op en teach mei syn leger nei Tirsa om dêr de troan op te easkjen.

Nei't Omry de stêd ynnommen hie, seach Simry yn dat er gjin kâns makke. Hy loek him werom yn 'e stins fan it paleis en stiek dêr it bouwurk yn 'e brân. Simry kaam yn it fjoer om.

Boarnen, noaten en/as referinsjes:

1 Keningen 16:8-20