Resort

Ut Wikipedy
Jump to navigation Jump to search
In resort yn San Diego.

In resort (útspr.: [ri:'zɔrt], likernôch "riizôrt") is in ferbliuwsgelegenheid dy't almeast rjochte is op lúkse en komfôr. It is in lienwurd út it Ingelsk, wêrfan't de oarspronklike betsjutting "ferbliuw" is. In resort kin in fakânsjeoard wêze, mar bgl. ek in konferinsjeoard. Behalven dat it rekreaasje, ferdivedaasje en sport biedt, heart der yn 'e measte gefallen ek in útfanhûzersfunksje by, ornaris yn 'e foarm fan in lúks hotel.

Resorts wurde gauris om ferdivedaasjeparken hinne boud, mei as doel om 'e besikers mear as ien dei fêst te hâlden. Soks sjocht men bgl. yn Nederlân by de Efteling, en yn Parys by Euro Disneylân. Behalven in ferbliuwsfunksje omfiemje sokke hotels ek sauna's, swimbadden, sportfjilden, restaurants, kafees en fitnessgelegenheden.

Faak binne resorts besletten plakken, dêr't men net samar op 'e dolle roes hinne kin, mar dêr't yn 't foar reservearrings makke wurde moatte. Dêrby binne resorts faak ôfbeakene en bewekke, om foar te kommen dat de rêst fan 'e besikers fersteurd wurdt.

Boarnen, noaten en referinsjes[boarne bewurkje]

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side.