Rebekka

Rebekka
Rebekka neffens in skilderij fan de Kroaat Ivan Tišov (1894)
Persoanlike gegevens
alternative nammen	Rivka
berne	begjin 2e milennium f.Kr.
berteplak	Paddan-Aram (Mesopotaamje)
ferstoarn	Kanaän
stjerplak	net neamd yn 'e Bibel, begroeven yn 'e grot fan Machpela (Hebron)
folk	Arameesk / Hebriuwsk
Famylje
heit	Betûel
mem	(net neamd yn Genesis)
partner(s)	Izaäk
bern	Ezau; Jakob
sibben	Laban
Bibelske rol
titel / funksje	aartsmem
rol	frou fan Izaäk; mem fan Jakob en Ezau
perioade	Patriargyske tiid
bekend fan	ropping by de put; har foarkar foar Jakob
neamd yn	Genesis 22–27; 49
religieuze tradysje	joadedom; kristendom

Dizze side giet oer de aartsmem Rebekka. Foar de foarnamme, sjoch: Rebekka (namme).

Rebekka (Hebriuwsk: Ribqah; Gryksk: Ρεβεκκαis) in persoan út it bibelboek Genesis. Hja kaam út Haran (in âlde stêd yn Mesopotaamje) en wie in dochter fan Bêtuel, in omkesizzer fan Abraham, en de suster fan Laban. Hja wie de pakesizzer fan Nachor, de broer fan Abraham, en waard de frou fan 'e aartsfaar Izaäk en de mem fan Ezau en Jakob.

Rebekka wurdt de frou fan Izaäk

Neffens Genesis stjoerde Abraham syn feint (nei alle gedachten wie dat Eliêzer út Genesis 15:2) der op út om foar syn soan Izaäk in frou te sykjen út it stamgebiet fan Abraham. Dat wie om't Abraham it net lije woe dat Izaäk mei in frou út Kanaän omgong krige. Doe't de feint oankaam wêr't er wêze moast en him ophold by in wetterput, bidde hy ta God en frege oan God him in teken te jaan hokker frou geskikt wie foar Izaäk. It teken soe wêze dat de frou him wetter joech en dêrnei ek syn kamielen. De feint hie syn gebed noch net dien, of der kaam in kreaze frou de stêd út. De frou foldie oan it teken en letter die bliken dat hja út it laach fan Têrach kaam, de heit fan Abraham, dat it koe net moaier. Nei't Rebekka de tastimming fan har heit en broer krige om de frou te wurden fan Izaäk, reizge hja mei de feint nei Izaäk yn Kanaän, dy't de karavaan al yn 't fjild yn 'e mjitte kaam. De feint stelde Izaäk op 'e hichte oer it hoe en wat en dêrnei naam Izaäk Rebekka mei yn 'e tinte fan syn mem Sara en bedreau dêr de leafde mei har. Rebekka waard de frou fan Izaäk en hy krige har leaf.

De skientme fan Rebekka

Rebekka by de wetterput (Raam yn 'e Notre-Dame fan Dinant, Belgje.

By in hongersneed holden Izaäk en Rebekka yn it lân fan 'e Filistinen ta. No wie Rebekka in opfallend kreaze ferskining en om't Izaäk benaud wie dat de manlju yn dat lân him wolris deadzje koene om harren sa oan Rebekka fergripe te kinnen, fertelde Izaäk oan elkenien dat hja syn suster wie. Kening Abimêlek, dy't Izaäk gastfrij ûntfongen hie, betrape lykwols de twa doe't hja oan it frijen wiene. De misledige kening liet Izaäk by him komme en ferwiet him hokker gefolgen syn betinksel wol net hân hawwe koe: it skeelde nammentlik net in soad of ien hie him del jûn by syn saneamde suster en dan hiene de Filistinen dêr troch Izaäk de skuld fan krige. Likegoed bleaune Izaäk en Rebekka de beskerming fan 'e kening genietsjen.

De bern fan Rebekka

Krekt as har skoanmem krige Rebekka ek lang gjin bern. Earst nei twintich jier rekke hja swier fan in twilling en al by it swierwêzen tsierden de bern meiïnoar. Rebekka frege God om help en hja krige te hearren dat har skurte twa naasjes fuortbringe soe en dat de âldste de jongste tsjinje soe. By de befalling kaam Ezau as earste en dêrnei kaam Jakob, dy't mei syn hantsje Ezau oan 'e hakke fêsthold. De beide jonges wiene folslein ferskillend en it wie Jakob dy't Rebekka it measte nei wie. As Izaäk âld en blyn wurdt en syn seine jaan wol oan syn âldste soan Ezau, dan betinkt Rebekka in plan sa't Jakob de seine kriget. De bline Izaäk twifelet ynearsten oft er wol de goede soan foar him hat, mar hy lit him troch Jakob oertsjûgje dat er Ezau is en jout dan syn seine, dy't mar ien kear jûn wurde kin. As Ezau fernimt dat Jakob him de seine fan syn heit ûntnadere hat, wol hy wraak nimme en Jakob deadzje sadree't syn heit ferstoarn is. Jakob moat dan flechtsje en Rebekka sil har soan nea wer sjen. Wannear't Rebekka stoar en hoe âld hja waard is net bekend, hja waard yn in grot yn it fjild fan Machpela yn it lân Kanaän begroeven, dy't Abraham as famyljegrêf oankocht hie.

Keppeling om utens

• (ned) Rebekka op Christipedia.nl

Boarnen, noaten en/as referinsjes:

Alde Testamint, Genesis 24-27 Commons Wikimedia Commons  Ofbylden dy't by dit ûnderwerp hearre, binne te finen yn de kategory Rebekka fan Wikimedia Commons.