Protestantske tsjerke fan Gasselternijveen

	Protestantske tsjerke
	Lokaasje
lân	Nederlân
provinsje	Drinte
plak	Gasselternijfean
adres	Vaart 5
koördinaten	52° 59'N 6° 50'E
	Tsjerklike gegevens
tsjerkegenoatskip	PKN
	Arsjitektuer
boujier	1858
monumintale status	ryksmonumint
monumintnûmer	508691
	Webside
	PKN Gasselternijfean
	Kaart
	;

De protestantske tsjerke yn Gasselternijfean is in yn 1858 boude wettersteatstsjerke yn neoklassisistyske styl.

Skiednis

Nei't Gasselternijfean tsjerklik sûnt de stifting yn 1663 ûnder Gasselte foel, krige it doarp yn 1707 foar it earst in eigen tsjerkegebou. Healwei de 19e iuw waard de tsjerke te lyts foar it tanimmende ynwennertal fan it doarp. It wie yn 'e tiid dat dûmny Johannes Elias Feisser, dy't foar in gruttere tsjerke krewearre, spul krige mei de tsjerkfâden om't er langer wegere bern te dopen. De dûmny wie nammentlik oanhinger woarn fan 'e Doopte Kristenen, dy't letter baptisten neamd waarden. It skeel feroarsake lang om let de ôfsetting fan 'e predikant en yn 1845 liet er him tegearre mei sân oare herfoarme leden troch dûmny Köbler út Hamburch dope. Dêrmei ûnstie de earste baptistegemeente fan Nederlân.

Nettsjinsteande dat kaam der dochs in nije herfoarme tsjerke. De tastimming foar de bou folge yn 1856 en yn 1859 waard de nijbou foltôge. Al in jiermannich letter ûnstiene der swierrichheden mei de dakruter, dy't midden op it dak stie om't er te swier wie foar it gebou. Op in eigen fundearring waard doe de tsjintwurdige toer foar de tsjerke boud. Yn 'e toer hinget in yn 1859 troch de firma Elzinga út Grins getten klok.

Sûnt 1997 is de tsjerke in ryksmonumint.

Oargel

Yn maaie 1900 kocht de herfoarme gemeente in brûkt oargel oan by de bruorren Van Oeckelen. Dat oargel wie al yn 1850 troch Hans Eberhard Freytag en syn soan as rêchposityf boud fan it doedestiidske Schnitger-oargel fan de Lutherske tsjerke yn Grins. It oargel waard yn 1897 ôfbrutsen, mar wylsts it grutte Schnitgeroargel ferlern gyng troch't it yn ûnderdielen brûkt waard by renovaasjes fan oare oargels, bleau it Freytag-oargel bewarre. Van Oeckelen boude dêr yn 1897 in folslein nij oargel fan yn 'e herfoarme tsjerke fan Gasselternijfean, dat noch jimmeroan yn gebrûk is.