Petrus- en Pauluskatedraal (Moskou)

Ut Wikipedy
Springe nei navigaasje Springe nei sykjen
Petrus- en Pauluskatedraal

Богоявленский собор в Елохове

Moscow StsPeterPaulLutheranCathedral X75.jpg
lokaasje
lân Flag of Russia.svg Ruslân
plak Flag of Moscow, Russia.svg Moskou
bysûnderheden
type bouwurk katedraal
boujier 1903-1905
arsjitekt Viktor Kossov; Artur Loleit
webside Lutserske gemeente Moskou

De Petrus- en Pauluskatedraal is in luterske tsjerke yn de Russyske haadstêd Moskou. It is de haadtsjerke fan de Evangelysk-Lutherske Tsjerke yn Jeropeesk Ruslân.

Skiednis[bewurkje seksje | boarne bewurkje]

Yn de jierren 1694-1695 waard der foar de Dútske luteranen njonken de Michaeltsjerke, dy't yn 1928 ferneatige waard, in twadde tsjerke foar de luteranen. Dy tsjerke krige ynearsten de namme Nije Tsjerke, mar hiet offisjeel Sint-Petrus en Paulus. Yn 1711, 1737 en 1748 baarnde de tsjerke út, mar jimmeroan folge wer in weropbou. Lang om let gyng de tsjerke yn 1812 mei de brân fan Moskou folslein ferlern.

De luterkse Petrus en Paulustsjerke yn 1835

Yn 1817 ferboude de gemeente in hûs yn de Starosadskystege ta in tsjerke, dy't yn 1819 ynwijd waard. Fanwegen de grutte oanwaaks fan de luterske gemeente waard dy tsjerke yn de jierren 1860-1861 ferboud en yn 1903-1905 ferfongen troch nijbou, de hjoeddeiske tsjerke. De arsjitekt wie Viktor Kossov en nei't dy him werom loek waard de tsjerke ûnder lieding fan Artur Loleit foltôge.

Yn 1938 liet de anty-religieuze oerheid de tsjerke ûnteigenje. De tsjerke die earst tsjinst as konsertseal. Letter waard der in bioskoop yn ûnderbrocht. De doedestiidske dûmny fan de tsjerke, Aleksander Streck, waard tegearre mei de tsjerkeried troch it ateïstyske bewâld fermoarde. Letter kaam yn it gebou in filmstudio ("Diafilm"). Foar dat doel waard in ekstra ferdjipping yn it gebou oanbrocht. De spits fan de toer waard yn 1957 ôfbrutsen.

Fanôf de jierren 1990 krige de gemeente wer stadichoan tagong ta it gebou en koe earst in kapel yn gebrûk nommen wurde. Yn 2004 waard de ynrjochting wer yn oarder makke. Op de 1e advintssnein fan it jier 2008 krige it gebou nei santich jier wer de oarspronklike funksje werom. Ek waard yn dat jier útein set mei de weropbou fan de spits. Yn it ramt fan it 500-jierrich jubileum fan de reformaasje waard de tsjerke offisjeel wer oerdroegen. By de weromjefte wiene ek ôffurdigen fan de Evangelyske Tsjerke yn Dútslân en de Dútske bûnspresidint Frank-Walter Steinmeier oanwêzich. Yn de oangrinzgjende gebouwen, dêr't ea de pastorij en in skoalle yn ûnderbrocht wiene, wurde noch jimmeroan troch oerheidsorganisaasjes brûkt.

Oargel[bewurkje seksje | boarne bewurkje]

It oarspronklike Walcker-oargel gyng nei de ûnteigening ferlern. It tsjintwurdige oargel is ôfkomstich út de Michaeltsjerke, dat nei it sluten fan de tsjerke yn in begraffenisgebou opslein waard. It oargel waard yn 1898 troch de firma Sauer yn Frankfurt/Oder as Opus 755 boud en yn 2005 troch Orgelbau Reinhard Hüfken restaurearre. It ynstrumint hat 33 registers op 3 manualen en pedaal op pneumatyske kegelladen.

Klokken[bewurkje seksje | boarne bewurkje]

De klokken binne ôfkomstich út de toer fan de Friedenskirche yn it Dútske Rheydt, dy't yn 1999 foar de earetsjinst sletten waard en omboud ta apparteminten. Se datearje út 1957 en binne yn 2005 yn Moskou telâne kommen.

Ofbylden[bewurkje seksje | boarne bewurkje]

Boarnen, noaten en referinsjes[boarne bewurkje]

Boarnen, noaten en/as referinsjes:

Dizze side is foar in part of alhiel in oersetting fan de Dútsktalige Wikipedyside; sjoch foar de bewurkingsskiednis [:de:Kathedrale St. Peter und Paul (Moskau)].