Nouakchott

	Nouakchott
	Sintrum mei de Grutte Moskee
	Bestjoer
Lân	Mauretaanje
Distrikt	Nouakchott
Boargemaster	Ahmed Hamza (2007-)
	Sifers
Ynwennertal	894.403 (2013)
Oerflak	1000 km²
Befolkingsticht.	894/ km²
	Oar
Koördinaten	18° 4' NB, 15° 58' WL
	Offisjele webside
	[]

Nouakchott (Arabysk: نواكشوط) is de haadstêd fan Mauretaanje en ek de fierwei grutste fan it lân. De stêd leit yn it westen oan de Atlantyske kust. De stêd is noch jong en hat mei dêrtroch suver gjin hege gebouwen. De stêd is ien fan de grutste yn de Sahara en it ekonomyske en bestjoerlike sintrum fan it lân.

Oant 1958 wie Nouakchott in fiskersdoarpke, mar neidat Mauretaanje ûnôfhinklik fan Frankryk waard, groeide it út ta in stêd, mei troch syn seehaven. Yn 1962 waard it de haadstêd fan it selsstannich Mauretaanje. Yn de jierren '70 eksplodearre it ynwennertal, meast troch de grutte drûchte yn de Sahel dy't de minsken nei de stêd twong.

Ekonomy en ynfrastruktuer

De stêd hat in haven dy't foaral foar ymport tsjinnet (96,4 %), mar der wurdt ek koper útfierd. Dêr binne diken nei Néma, Boutilimit en Kiffa en de stêd hat in ynternasjonaal fleanfjild, Nouakchott International Airport.

Nouakchott produsearret sâlt, sement, insektisides, kleden, tapiten en ambachtsprodukten.^[1] Der binne goed 30 lytse of middelgrutte fabriken yn de stêd. Oerheid en finansjele ûndernimmingen binne ek fan belang. Fleanmaatskippij Mauritania Airways hat syn haadkertier yn de stêd.

Fask wetter

Alhoewol't de grûn ûnder de stêd in mânsk reservoir swiet wetter hat, it saneamde Trarza-mar, is der dochs fask-wetter krapte, in gefolch fan de grutte groei fan de stêd.^[2] Yngenieurs hawwe al warskôge dat it wetter op wêze kin yn 2054; de foarried wurdt nammentlik net oanfold mei reinwetter. Benammen yn de drûge bûtenwiken fan de stêd, dêr't de measte minsken wenje, kin dat mei de tiid swierrichheden jaan.

No is it al sa dat in protte minsken wetter keapje moatte en dat is djoer yn ferhâlding ta it trochsneed fertsjinst yn de stêd.

Underwiis

De Universiteit fan Nouakchott,^[3] is de iennichste universiteit yn Mauretaanje, iepene de doarren yn 1981, en hat likernôch 8000 studinten. Oare ynstellings foar heger ûnderwiis binne ûnder oaren de Nasjonale Skoalle foar Administraasje en it Nasjonaal Ynstitút foar Fuorstset Islamityske Stúdzjes. Der binne fierders in protte legere en middelbere skoallen en in American International School of Nouakchott.

Merken yn Nouakchott

Fiskmerk yn Nouakchott
Marché capital
Cinquième Marché yn it suden fan de stêd

Susterstêd

Boarnen, noaten en referinsjes

Boarnen, noaten en/as referinsjes:

↑ Nouakchott. Hutchinson encyclopedia. Sjoen 25 augustus 2009.
↑ Desert capital struggles with water crisis. Medilinks. 2004. Sjoen 25 augustus 2009.
↑ Hiem. Université de Nouakchott.

Keppelings om utens

[1] Nouakchott. Hutchinson encyclopedia. Sjoen 25 augustus 2009.

[2] Desert capital struggles with water crisis. Medilinks. 2004. Sjoen 25 augustus 2009.

[3] Hiem. Université de Nouakchott.

[1]

[2]

[3]