Mitt Romney
Willard Mitt Romney (Detroit, 12 maart 1947) is in Amerikaanske ûndernimmer en politikus fan de Republikeinske Partij. Yn it tiidrek 2003-2007 wie er gûverneur fan Massachusetts. Foar de presidintsferkiezings fan 2012 wie hy de Republikeinske kandidaat dy't gading makke foar it Amerikaanske presidintskip, syn tsjinkandidaat wie Barack Obama fan de Demokratyske Partij.
Libbensrin
[bewurkje seksje | boarne bewurkje]Mitt Romney waard berne yn Detroit as fjirde fan Lenore en George W. Romney, in sakeman. George W. Romney wie yn it tiidrek 1963-1969 gûverneur fan Michigan. Yn 1970 stelde syn mem Lenore har ferkiesber yn Michigan en kaam yn de Amerikaanske Senaat. Har besykjen wie lykwols om 'e nocht. Mitt Romney hat twa susters en ien broer en is de jongste fan de fjouwer bern.[1] De famylje kaam út in begoedige fermidden. Doe't Mitt Romney fiif jier âld wie, ferhuze de famylje nei Bloomfield Hills yn Michigan, dêr't benammen minsken fan kwizekânsje wenje.
Yn Bloomfield Hills gong Romney nei de elitêre Cranbrook School, dy't er dien makke yn 1965. Romney studearre 1965/66 oan de Stanford University. Yn july 1966 sette er ôf nei Frankryk as mormoanske misjonaris, wat in tradysje yn syn famylje wie. Op de Cranbrook School trof er Ann Lois Davies. Yn 1966 waard hja mormoan en troude yn 1969 mei Mitt Romney. Wylst wie Ann begûn mei in stúdzje oan de mormoanske Brigham Young-universiteit. Romney die dat dêr rillegau ek. Yn 1971 makke er syn stúdzje dien mei in bachelordiploma yn de Ingelske literatuer. Mitt Romney en syn oarehelte krigen fiif soannen. Fan 1981 oant 1986 wie Mitt Romney mormoansk biskop yn Belmont, in foarstêd fan Boston.
Romney hat in Master of Business Administration (MBA) en in diploma yn rjochten (Juris Doctor) fan de Harvard University. Nei syn stúdzje gong er yn 1977 oan it wurk by de bedriuwsadviseur Bain & Company yn Boston. Ut Bain & Company ûntstie letter Bain Capital, in ynvesteardearsfirma dêr't Romney ien fan de oprjochters fan wie. Oant it jier 1999 joech er lieding oan Bain & Company. Yn itselde jier waard er bestjoersfoarsitter fan it komitee dat ferantwurdlik wie foar de organisaasje fan de Olympyske Winterspullen fan 2002 yn Salt Lake City.
Yn 1994 besocht er yn de Amerikaanske Senaat te kommen mei Edward Kennedy as syn tsjinkandidaat. Hy ferlear fan Kennedy mei 41 persint fan de stimmen. By de Amerikaanske presidintsferkiezings fan 2008 hie Romney gading makke en waard de nije Republikeinske kandidaat foar it Amerikaanske presidintskip. De Republikeinske Partij keas doe foar John McCain as presidintskandidaat.
Dielnimmer presidintsferkiezings 2012
[bewurkje seksje | boarne bewurkje]Yn april 2011 die Romney te witten dat er him tariede soe foar de presidintsferkiezings fan 2012. By de Republikeinske foarferkiezings wie it tal stimmen dat Romney krige stabyl, mar hy waard net de grutte foaroanman dêr't it grutste part fan de Republikeinen ienriedich oer wurde soe. Syn twa grutste konkurrinten Newt Gingrich en Ron Paul joegen respektivelik 3 maaie en 14 maaie 2012 belies. By de Republikeinske foarferkiezings yn Texas op 29 maaie 2012 waard Romney syn nominaasje wis. Op 11 augustus 2012 makke Romney syn fise-presidintskandidaat wrâldkundich: de ôffurdige Paul Ryan út Wisconsin.
Op 28 augustus 2012 waard Romney by in offisjele gearkomste fan de Republikeinen yn Tampa mei in grutte mearderheid offisjeel as presidintskandidaat keazen.[2]
Keppeling om utens
[bewurkje seksje | boarne bewurkje]
Commons: Mitt Romney – foto, fideo en harktriemmen| Boarnen, noaten en/as referinsjes: |
|
- Amerikaansk steatspolitikus
- Gûverneur fan Massachusetts
- Amerikaansk federaal politikus
- Amerikaansk presidintskandidaat yn de foarferkiezings fan de Republikeinske Partij
- Amerikaansk presidintskandidaat (nominearre troch de Republikeinske Partij)
- Amerikaansk persoan fan Dútsk komôf
- Amerikaansk persoan fan Ingelsk komôf
- Amerikaansk persoan fan Skotsk komôf
- Persoan berne yn 1947