Lisieux

	Lisieux
	Theresiabasilyk
	Emblemen
	Bestjoer
Lân	Frankryk
Regio	Normandje
Departemint	Calvados
	Sifers
Ynwennertal	19.645 (2023)
Oerflak	13,07 km²
Befolkingsticht.	1.503 ynw./km²
Hichte	32-152 m
	Oar
Postkoade	14100
Tiidsône	UTC +1
Koördinaten	49° 08' N 0° 13' E
	Offisjele webside
	www.ville-lisieux.fr
	Kaart
	;

Lisieux is in stêd en gemeente yn it Frânske departemint Calvados yn 'e regio Normandje. Lisieux leit oan 'e Touques. It is in ûnderprefektuer fan 'e Calvados en it haadplak fan it arrondissemint Lisieux en fan trije kantons. Ek is Lisieux it wichtichste plak fan it Pays d'Auge. De stêd is in katolyk beafeartsplak foar de hillige Theresia fan Lisieux.

Lokaasje

Lisieux leit op it plak dêr't de Touques en ferskillende sydrivieren gearrinne: de Orbiquet, de Cirieux en de Graindain.

De stêd leit yn it hert fan it Pays d'Auge, wêrfan't Lisieux de haadstêd is. It leit midden yn it foar Normandje karakteristike kûlissenlânskip, dêr't fral molkkij greidzje en siderapels (dêr't sider en de drank calvados fan makke wurdt) teelt wurde.

Skiednis

Lisieux is de âlde haadstêd fan it Gallyske folk de Lexovii. Nei de fal fan it Romeinske Ryk waard de stêd in biskopsstêd. De biskoplike sit waard ferlitten en bleau in skoftke leech by de ynfallen fan 'e Wytsings. Yn 'e 10e iuw waard de stêd plondere troch Rollo, de earste hartoch fan Normandje. Yn 'e tiid fan it hartochdom waard in romaanske katedraal boud, dy't letter ferfongen is troch in goatyske katedraal. Oan 'e begjin fan 'e Hûndertjierrige Kriich waard de stêd op 2 augustus 1346 troch troepen fan Edwert III ferneatige.

Nei de hillichferklearring fan karmelitesse Sint-Theresia waard op ien fan 'e heuvels om Lisieux de grutste Frânske tsjerke fan 'e 20e iuw boud: de basilique Sainte-Thérèse. De neobyzantynske tsjerke ferkrong al gau de âlde katedraal, dy't in parochytsjerke waard. De devoasje ta de hillige Sint-Theresia, dy't yn 'e Karmel fan Lisieux wenne, makke fan Lisieux it op ien nei wichtichste beafeartsplak fan Frankryk. Allinne Lourdes wurdt noch drokker besocht.

Oant 1944 wie Lisieux ryk oan smelle strjitsjes mei midsiuwske fakwurkhûzen en fersierde gevels, mar op 6 en 7 juny waard de stêd troffen troch alliearde bombardeminten. Mear as 800 minsken kamen by it kriichsgeweld om en de stêd waard foar twatredde ferneatige. Under de gebouwen dy't ferlern gyngen wie ek it kleaster fan 'e Benediktinen, tweintich nonnen liet it libben. De stêd waard op 23 augustus 1944 befrijd.

Yn 1960 waard de oanbuorjende stêd Saint Jacques by Lisieux foege.

Op 2 juny 1980 kaam paus Jehannes Paulus II nei Lisieux by syn earste besite oan Frankryk om te bidden by de tome fan Sint-Theresia.

Untwikkeling ynwennertal

Jier	1962	1968	1975	1982	1990	1999	2006	2018
Ynwennertal	21.156	23.830	25.521	24.940	23.703	23.166	23.343	20.171
Boarnen: Cassini en INSEE