Lancelot Volders

Ut Wikipedy
Gean nei: navigaasje, sykje

Lancelot Volders (1657?-1687?, neffens oaren 1675), ek wol Jan Volders neamd, wie in keunstskilder. Hy wurke fan ûngefear 1700 ôf oan it Steedhâlderlik Hof yn Ljouwert. Yn de literatuer wurde Louis Volders, Jan en Lancelot Volders faak ferwiksele. Neffens it Ryksburo foar Keunsthistoaryske Dokumintaasje is de âldere Lancelot perfoast net deselde as Louis Volders. Oare boarnen helje de trije skilders, harren wurk, data en nammen troch elkoar.

It yn it Leuvenske stedhûs bewarre groepsportret fan Leuvenske Riedshearen dat yn 1703 skildere waard en oan Lancelot Volders taskreaun wurdt, moat yn werklikheid fan Louis syn hân wêze want Lancelot Volders syn aktiviteiten as skilder leine benammen tusken 1657 en 1675. It kin wêze dat Lancelot en Louis heit en soan binne, mar dêrfoar is gjin bewiis oerlevere.

Lancelot Volders wie in learling fan Gaspard de Crayer en waard yn 1657 in master yn it Brusselske gilde. Hy wie neffens de Dictionaire des Peintres belges aktyf oant ± 1703, mar wis is dat net, omdat hy ommers faak mei Louis ferwiksele waard. Victor Honoré Janssens (Brussel, 1658 - 1736) wie op syn beurt de learling fan Lancelot Volders.

Neffens Artfact skildere de om 1660 berne ûnder oare:

  • De Hillige Aya yn oanbidding foar de Hillige Triniteit (1673) yn de Brusselske Us Leaffrou Terkapelletsjerke.
  • It groepsportret fan de Famylje Bathurst yn de Finchcocks Collection yn Goudhurst (Kent).

Boarnen, noaten en referinsjes[boarne bewurkje]

Boarnen, noaten en/as referinsjes:

Literatuer

  • A. Staring, Weinig bekende portrettisten, V. Louis Volders, yn: Oud Holland 61 (1946), siden 177-184
  • Kunsthistorische verkenningen, De Haach 1948 side 67 e.f.
  • Dr. A.Wassenbergh, De portretkunst in Friesland in de 17e eeuw, Lochem 1967
  • R.E.O. Ekkart in Nassau uit de schaduw van Oranje, Frjentsjer 2003

Ynternet

  • It Ryksynstitút op [1]
  • Ofbylding op [2]
  • Dictionaire des Peintres belges[3]