Erfurt

	Erfurt
	Riedhûs
	Emblemen
	Bestjoer
Lân	Dútslân
Dielsteat	Tueringen
	Sifers
Ynwennertal	215.675 (31.12.2023)
Oerflak	269,91 km²
Befolkingsticht.	799 km²
	Oar
Tiidsône	UTC +1
Simmertiid	UTC +2
Koördinaten	50°59' NB, 11°2' EL
	Offisjele webside
	www.erfurt.de
	Kaart
	;

Erfurt is de haadstêd fan de Dútske dielsteat Tueringen. De stêd hat 215.675 ynwenners (2023) en bestjoerlik de status fan kreisfreie Stadt (in fuort ûnder de dielsteat fallende stêd).

Skiednis

Erfurt waard yn 742 foar it earst neamd mei't Bonifatius dêr in bisdom stifte. Dat bisdom bestie lykwols net lang en waard al yn 755 by it bisdom Mainz foege. Om 1167 hinne krige de stêd stedsmuorren, dy't yn 1873 ôfbrutsen binne.

Yn 'e midsiuwen wie Erfurt ien fan 'e belangrykste stêden fan Dútslân. Yn dy tiid telde de stêd wol 80 tsjerken en 36 kleasters en ek hjoed-de-dei is de stêd noch ryk oan religieus erfgoed.

Sûnt 1392 hat de stêd in universiteit. It wie de trets oprjochte universiteit yn Dútslân (nei dy fan Keulen en Heidelberch) en yn de 15e iuw wie it de grutste. De universiteit joech ûnderrjocht oan lettere wichtige renêssânse-humanisten. Maarten Luther studearre dêr fan 1501 oant 1505. De universiteit waard yn 1816 sletten, mar sûnt 1994 is Erfurt wer in universiteitsstêd.

It âlde sintrum hat yn 'e Twadde Wrâldkriich minder te lijen hân fan bombardeminten as oare Dútske stêden.

It besjen wurdich

It besjen wurdich is de romaansk-goatyske dom, dy't fan de 12e oant de 15e iuw op 'e domberch boud waard.
Njonken de domtsjerke stiet de Sint-Severustsjerke. Oan beide tsjerken op 'e domberch wiene oant de sekularisaasje yn 1803 in stift ferbûn.
It stedhûs oan 'e Fiskmerk (Fischmarkt) is boud yn neogoatische styl. Oan it plein steane ek de renêssânse hûzen Zum breiten Hert (nû 13; 1584) en Zum roten Ochsen (nû 7, 1562). Op it plein stiet it Römermonumint fan 'e Nederlanner Israel van der Milla (1591).
De Krämerbrücke is in midsiuwske brêge dy't beboud is mei fakwurkhûzen.
It joadsk-midsiuwsk erfgoed fan Erfurt is sûnt 2023 UNESCO-wrâlderfgoed.
De sitadel op 'e Petersberg is in barokke stedsfêsting op it plak fan in earder benediktynsk kleaster.

Musea

Angermuseum
Museum Neue Mühle
Naturkundemuseum
Stadtmuseum
Alte Synagoge
Volkskundemuseum
Topf und Söhne (betinkingsplak fan it bedriuw, dat yn 'e nazytiid de kremaasjeûnen foar de ferneatigingskampen boude).

Stedsdielen

It stedsgebiet fan Erfurt is yn 53 Stadtteile te ferdielen. Dêrfan binne 44 in Ortsteil, yn 'e regel doarpen dy't earder selsstannige gemeenten wiene en by de stêd foege binne.