Brühl

	Brühl
	Augustburg
	Emblemen
	Bestjoer
Lân	Dútslân
dielsteat	Noardryn-Westfalen
Kreis	Rhein-Erft-Kreis
Stedsyndieling	7 Stadtteile
	Sifers
Ynwennertal	45.398 (2023)
Oerflak	36,12 km²
Befolkingsticht.	1.257 ynw./km²
Hichte	65 m
	Oar
Postkoade	50321
Koördinaten	50°50' N 6°54' E
	Offisjele webside
	www.bruehl.de
	Kaart
	;

Brühl is in stêd en gemeente yn 'e Rhein-Erft-Kreis yn 'e Dútske dielsteat Noardryn-Westfalen.

Skiednis

Brühl krige yn 1285 stedsrjochten.

Sûnt 1567 wie Brühl de offisjele residinsje fan 'e prinsbiskoppen fan Keulen. Nei't oan it ein fan 'e 17e iuw in skeel om 'e macht tusken Keulen en Hannover yn it foardiel fan Hannover einige, waarden de stedsmuorren fan Brühl delhelle.

Yn 'e 18e iuw liet prinsbiskop Klemens August in âld kastiel ferfange troch de barokke paleizen Augustusburg en Falkenlust. Hjoed-de-dei steane de gebouwen ynskreaun op 'e list fan it wrâlderfskip fan UNESCO. Oant de Dútske ienwurding brûkte it federale regear fan West-Dútslân de Augustusburg om bûtenlânske steatshaden te ûntfangen.

De stêd waard al yn 1942 bombardearre, mar yn 1944 folge in swierder bombardemint dat it súdlike stedsgebiet foar in grut part ferneatige. By it bombardemint kamen 180 minsken om. Op 7 maart 1945 kaam der foar de ynwenners fan Brühl in ein oan 'e Twadde Wrâldkriich doe't de Amerikaanske troepen de stêd oermasteren. Fan 'e joadske mienskip fan Brühl binne 65 minsken deportearre en ombrocht.

Op snein 6 febrewaris 2000 fûn op it stasjon in slim treinûngelok plak. In trein út Amsterdam nei Basel ûntspoarde en ried mei hege faasje oer in trajekt, dêr't net hurder as 40 kilometer yn 't oere tastien wie. By it ûngelok kamen njoggen reizgers om, wylst 52 minsken slim ferwûne rekken.^[1]

Stedsferdieling

De gemeente Brühl is te ferdielen yn 'e folgjende stedsdielen:

Badorf (mei Eckdorf en Geildorf)
De kearnstêd Brühl (Nord-, Ost-, Süd-, West- en Mitte)
Heide
Kierberg
Pingsdorf
Schwadorf
Vochem

It besjen wurdich

Augustusburg en Falkenlust yn Brühl hearre ta de wichtichste barokke en rokoko bouwurken yn Dútslân. Sûnt 1984 steane de slotten op de UNESCO-list fan it wrâlderfgoed.
It yn 2005 iepene Max Ernst Museum is in museum mei surrealistyske keunst fan de yn Brühl berne Max Ernst en oare moderne keunst.
Phantasialand