Altfryd

Ut Wikipedy
(Trochwiisd fan "Altfried")
Gean nei: navigaasje, sykje
Altfryd
persoanlike bysûnderheden
echte namme Altfrid
berne  ?
berteplak  ?
stoarn 22 april 849
stjerplak Meunster (Dútslân)
etnisiteit Flag of Germany.svg Dútsk
wurk
taal Latyn
sjenre hilligelibben
bekendste
  wurk(en)
Vita Sancti Liudgeri
offisjele webside
n.f.t.
Altfryd.

Altfryd (oarspronklik meast skreaun as "Altfrid", letter omstavere ta "Altfried"; † 22 april 849) wie in Midsieusk Dútsk biskop, abt en tsjerklieder, al is syn oantins benammen libben bleaun as skriuwer fan in hilligelibben oer syn foargonger en famyljelid Liudger. Syn namme betsjut "eale beskermer" of mooglik "elvefoarst".

Libben[bewurkje seksje | boarne bewurkje]

Altfryd gie al ier yn it kleaster en klom mei gauwens op yn 'e hierargy fan 'e Tsjerke. Nei de dea fan foargonger Gerfryd waard er yn 839 beneamd ta de trêde biskop fan Meunster, wat er oan syn dea, tsien jier letter, ta bleau. Itselde jiers waard er ek beneamd ta de fyfde abt fan 'e kleasters Werden en Helmstedt, dêr't ûnder syn bewâld de saneamde Grêfkelder fan 'e Liudgeriden ree kaam. Dêryn waard er sels nei syn dea, yn 849, ek byset.

Krekt as Gerfryd, dat in omkesizzer fan Liudger wie, wie ek Altfryd famylje fan 'e legindaryske Fryske sindeling en earste biskop fan Meunster, nei alle gedachten in neef. Syn grutste duorjende bekendheid krige Altfryd trochdat er it earste en meast histoarysk betroubere hilligelibben oer Liudger skreau, de Vita Sancti Liudgeri. Dat geskrift is ien fan 'e krappe skiedkundige boarnen oer de Friezen yn 'e Iere Midsieuwen.

Boarnen, noaten en referinsjes[bewurkje seksje]

Boarnen, noaten en/as referinsjes:
  • Halbertsma, H., Frieslands Oudheid: Het Rijk van de Friese Koningen, Utert, 2000, s. 92.