Afrikaanske dwerchein

Afrikaanske dwerchein
Jerk (foargrûn) en sijke (eftergrûn).
taksonomy
ryk dieren (Animalia) stamme rêchstringdieren (Chordata) klasse fûgels (Aves) skift goeseftigen (Anseriformes) famylje einfûgels (Anatidae) skaai dwercheinen (Nettapus)
soarte
Nettapus auritus
Boddaert, 1783
IUCN-status: net bedrige
ferspriedingsgebiet
Ferspriedingsgebiet Afrikaanske dwerchein

De Afrikaanske dwerchein (Nettapus auritus) is in tropyske einfûgel fan it skaai dwercheinen (Nettapus). De soarte libbet yn sompige gebieten mei in soad planten yn Afrika besuden de Sahara en op Madagaskar.

Beskriuwing

Tekening fan in pearke Afrikaanske dwercheinen
C.G. Finch-Davies (1875–1920)

Alhoewol't de dwerchein in snaffel hat lykas in goes, binne se mear besibbe oan 'e einen. It is de lytste wetterfûgel fan Afrika en ien fan 'e lytste wetterfûgels fan 'e wrâld.

De ein is 27 oant 33 sm lang en 260 oant 290 g swier. It mantsje hat in wyt gesicht en in irisearjende swarte streek, dy't op 'e krún begjin en oer de efterkant fan 'e hals trochrint oant op 'e rêch. Op 'e sydkant fan 'e kop en de hals sit in ovale, griene flek omseame fan in swarte râne. De rêch is metallic grien. De sechtjin sturtfearren binne swart. De fearren fan 'e wjukken binne swart mei in metallic griene irisaasje op 'e dekfearren mei in wite balke oer de sekundêre earmfearren. De boppekant fan it boarst en de flanken binne ljocht kastanjebrún en de búk is wyt. De ein hat in smelle wite ring om ' e hals.

Wyfkes hawwe in griis gesicht mei in donkerbrune eachstreek en flekkerige brún op 'e wangen en nekke. Se ha in donkerbrune foarholle, krún en efterkant fan 'e nekke mei wat irisaasje, mar minder glânzgjend as it mantsje. In griene flek lykas by it mantsje ûntbrekt. It boarst en de flanken hawwe in donkere kastanjekleur en de rêch is donkerbrún. De fearren fan 'e wjukken binne brúnswart mei útsûndering fan in wite balke op 'e sekundêre earmfearren. It ûnderste diel fan 'e snaffel is giel, it boppeste diel is flekkerich mei brún en in donkerbrune punt. De poaten binne donkergriis oant swart.

Nêst

De Afrikaanske dwerchein boud faak in nêst fan gers yn beamholtes, mar der binne fariaasjes. Der wurden likernôch 6 oant 12 (yn 'e regel 9) aaien lein, dy't troch it wyfke útbret wurde. It mantsje bliuwt tichteby en ferdigenet it territoarium.

Leefgebiet

De ein is net honkfêst en libbet fan Senegal yn it west oant Eritreä en Somaalje yn it east en nei it suden ta oant yn it meast eastlike diel fan Súd-Afrika en op Madagaskar, mar net yn it súdwesten fan Afrika. Hy mei graach yn sompige gebieten, marren en stadich streamend wetter wêze mei in soad planten lykas wetterleeljes. Yn Etioopje, Sambia en Madagaskar wurdt de fûgel ek yn berchgebieten oan 1800 m hichte oantroffen.

Fersprieding

Afrikaanske dwercheinen yn it Moremi Reservaat, Botswana

It ferspriedingsgebiet fan 'e Afrikaanske dwerchein is tige grut en sadwaande is de kâns op útstjerren lyts. Hoefolle fûgels der binne is net bekend. It is wol dúdlik dat it oantal tebek rint. Dat hat te meitsjen troch de yntroduksje fan frjemde fisksoarten, dy't foar de ynhiemske wetterplanten net goed binne. Ek it droechlizzen fan sompen troch minsken soargje foar minder dwercheinen. De efterútgong giet lykwols net hurd en is minder as 30% yn 'e tsien jier. Dêrom stiet de Afrikaanske dwerchein net op 'e Reade list fan 'e IUCN.

Gedrach

De Afrikaanske dwerchein libbet fan it sied fan wetterleeljes en oar sied fan driuwende planten, mar ek ynsekten en lytse wingeleaze dierkes. Se wurde faak yn pearkes en lytse groepkes waarnommen.

Boarnen, noaten en referinsjes

Boarnen, noaten en/as referinsjes:

Ebird Dizze side is alhiel of foar in part in oersetting fan de Ingelsktalige Wikipedyside; sjoch foar de bewurkingsskiednis: en:African pygmy goose Commons Wikimedia Commons  Ofbylden dy't by dit ûnderwerp hearre, binne te finen yn de kategory Nettapus auritus fan Wikimedia Commons.