De lynksen (Latynske namme: Lynx) foarmje in skaai fan de klasse fan 'e sûchdieren (Mammalia), it skift fan 'e rôfdieren (Carnivora) en de famylje fan 'e kateftigen (Felidae). "De lynks" as sadanich bestiet net; it skaai falt útinoar yn fjouwer ferskillende soarten, dy't foarkomme yn hast hiele Noard-Amearika en grutte parten fan Jeraazje, mar benammentlik yn bercheftige kriten en nuddelwâlden. Lynksen binne te werkennen oan harren brede, swierbehierrepoaten, dy't ideaal binne om mei oer in snielaach te rinnen, en oan harren toefte earen. Troch it bejeien en it yn kultuer bringen fan harren wengebiet troch de minske binne de ornaris solitêr libjende lynksen tsjintwurdich frij seldsum wurden en komme se inkeld noch foar yn ôfhandige kontreien.
