Sint-Katarinatsjerke (Tsjernihiv)

Ut Wikipedy
Sint-Katarinatsjerke

Катерининська церква

bouwurk
St. Catherine Church.jpg
lokaasje
lân Flag of Ukraine.svg Oekraïne
oblast Flag of Chernihiv Oblast.png Tsjernihiv
plak Alex K Chernihiv prapor 1992.svg Tsjernihiv
bysûnderheden
type bouwurk Katedraal
boujier 17e iuw
boustyl Barok

De Sint-Katarinatsjerke (Oekraynsk: Катерининська церква; Russysk: Екатерининская церковь) is in otterdokse tsjerke yn Tsjernihiv yn de Oekraïne. It monumintale gebou waard tsjin it ein fan de 17e en it begjin fan de 18e iuw boud en foarmet in opfallend foarbyld fan de Oekraynske Barok.

Skiednis[bewurkje seksje | boarne bewurkje]

De fan wite stiennen boude tsjerke stiet yn it histoaryske sintrum fan de stêd en waard yn opdracht fan de bruorren Semjon en Jakov Lizogûb boud ta neitins fan harren heit Efim Lizogûb, dy't yn 1696 oan it haad fan de Kozakkentroepen it fort fan Azov op de Turken oermastere. De tsjerke waard yn it doetiidske fort boud op it plak fan in âldere tsjerke út de tiid fan it Kiëvske Ryk en yn 1715 oan Katarina fan Aleksandrje wijd. Troch de brân fan 1837 moast de tsjerke restaurearre wurde, tagelyk krige de tsjerke doe in nije, tsjintwurdich net mear besteande, ikonostase yn eklektyske styl.

De tsjerke waard yn 1933 op lêst fan de lokale autoriteiten sletten en hie te lijen fan de Dútske besetting dy't dêrnei folge. In restauraasje waard útfierd tusken 1947 en 1955 en yn 1962 waard it gebou erkend as histoarysk erfgoed. By dy restauraasje waard de earder boude klokketoer mei narteks ôfbrutsen.

In nije restauraasje fan benammen it ynterieur folge tusken 1975 en 1980 en doe waarden ek de koepels op 'e nij fergulde. Oant 2006 hie de tsjerke in museale funksje.

Striid[bewurkje seksje | boarne bewurkje]

De tsjerke waard yn maaie 2008 oerdroegen oan de Oekraynsk-Otterdokse Tsjerke (patriarchaat fan Kiëv) en op 1 augustus 2008 fûn der foar it earst wer in tsjinst plak. De oerdracht fan de tsjerke waard oanfochten troch de oanhingers fan de Oekraynsk-Otterdokse Tsjerke (patriarchaat fan Moskou) en om harren easken krêft by te setten lieten hja in tinte foar it gebou sette, dêr't hja harren tsjinsten fierden. Yn de nacht fan 1 april op 2 april 2008 waard dy tinte troch ûnbekenden yn brân stutsen. Yn de âldjiersnacht fan 2010 waard de 'mobile tsjerke' oergetten mei benzine en op 'e nij yn 'e brân stutsen, dy't doe hielendal ôfbaarnde. In ferfangende tinte waard op 21 febrewaris 2014 ferwidere ûnder druk fan ynwenners fan Tsjernihiv.

Boarnen, noaten en referinsjes[boarne bewurkje]

Boarnen, noaten en/as referinsjes:

Dizze side is alhiel of foar in part in oersetting fan de Russysktalige Wikipedyside; sjoch foar de bewurkingsskiednis: ru:Екатерининская церковь (Чернигов)