Fetysjmodel

Ut Wikipedy
De Kanadeeske Bianca Beauchamp is ien fan 'e bekendste fetysjmodellen.

In fetysjmodel[1] is in model dat posearret yn fetysjklean of mei fetysjeftige foarwerpen, dy't har/syn lichem op in fetisjistyske manear fuortsterkje of yn in fetisjistyske sitewaasje toane. In fetysjmodel kin sawol in glamourmodel as in neakenmodel wêze, en njonken har/syn wurk as fetysjmodel noch in oare karriêre hawwe; der binne bgl. ferskate pornoaktrises dy't teffens as fetysjmodel wurkje.

In protte fetysjmodellen toane wat wol fetysjmoade neamd wurdt. Dat binne klaaiïngsstilen dy't oer it algemien as ekstreem en provosearjend beskôge wurde, en mei sin ûntwurpen binne om oan 'e taskôger in djippe emosjonele reäksje of in sterk begear te ûntlokjen. Sokke dracht kin útinoar rinne fan stylearre baaiklean of linzjery, gauris fan lear of lateks, oant ekstreme kostumen mei eleminten fan harnassen, of science fiction-pakjes. Fetysjmodellewurk kin fierdersoan ek bondaazje- en s.m.-tafrielen, lichemsoanpassings en kostumen oangeande seksuële fantasijen (lykas tsjinstfamme-, ferpleechsters- en skoalfamkesunifoarmen) omfetsje.

Boarnen, noaten en referinsjes[boarne bewurkje]

Boarnen, noaten en/as referinsjes:
  1. Foar de stavering 'fetysj': Oosterhaven, Beart, Nije List fan Frjemde Wurden, Ljouwert, 1993 (Frysk Akademy).

Foar boarnen en oare literatuer, sjoch ûnder: References, op dizze side.