Jeropeesk Buro foar Lytse Talen

Ut Wikipedy
Jump to navigation Jump to search

It Jeropeesk Buro foar Minderheidstalen is sûnt 1982 in ynternasjonale organisaasje dy't de opjefte hat, de minderheidstalen yn de Jeropeeske Uny te ûntwikkeljen of te helpen ûntwikkeljen, en der foarljochting oer te jaan.

It Jeropeesk Buro hat in ynformaasjesintrum yn Brussel, dat in koördinearjende funksje hat. Dit sintrum is ferantwurdklik foar in rige publikaasjes yn en oer ferskate minderheidstalen. It ynformaasjesintrum fiert tagelyk in lobby by de Jeropeeske politike top foar subsydzjes en minderhedenpolityk. Ta de aktiviteiten fan it Jeropeesk Buro hearre foarljochtingsgearkomsten op de jierlikse Jeropeeske taledei, 23 april. Fierder wiist it Jeropeesk Buro ynstellingen dy't mei minderheidstalen wurkje op subsydzjemooglikheden en bemiddelt it by subsydzjeoanfragen. It Jeropeesk Buro jout de periodyk 'Contact Bulletin' út en beheart ûnder de namme Eurolang in parseburo oer minderheidstalen.

De kosten fan it Buro waarden oant ein jierren '90 foar it meastepart foldien mei subsydzjes fan de Jeropeeske Uny. Troch it weifallen fan de strukturele subsydzjes foar minderheidstalen yn de Jeropeeske Uny is it Jeropeesk Buro ein jierren '90 yn finansjele problemen rekke, wêrtroch't it eardere koördinaasjesintrum yn Dublin sluten wurde moast. De taken fan dat sintrum binne foar it meastepart troch it Brusselske ynformaasjesintrum oernomd.

It Jeropeesk Buro hat yn alle lidsteaten fan de EU dy't minderheidstalen binnen harren grinzen hawwe in lidsteatkommisje. Dizze kommisje bestiet út fertsjintwurdigers fan organisaasjes dy't mei de minderheidstalen út de betreffende lidsteat te krijen hawwe. De lidsteatkommisjes fersoargje binnen de lidsteat foarljochting oer de Jeropeeske minderheidstalen, en bringe oan de oare kommisjes en oan it ynformaasjesintrum ferslach út fan de minderhedenpolityk yn harren steat.

Omt de Nederlânske lidsteatkommisje it Frysk as wurktaal brûkt, wurdt yn Nederlân de Fryske namme Jeropeesk Buro foar Lytse Talen (EBLT) mear brûkt as de Nederlânske. Yn it Nederlânske taalgebiet wurde ek de Frânse namme Bureau Européen pour les Langues Moins Répandues (BELMR) en de Ingelske namme European Bureau for Lesser Used Languages (EBLUL) wol brûkt.

Sjoch ek[bewurkje seksje | boarne bewurkje]