Dreamweaver's Dilemma

Ut Wikipedy
Jump to navigation Jump to search
Dreamweaver's Dilemma
auteur Lois McMaster Bujold
taal Ingelsk
foarm novelle
sjenre science fiction
1e publikaasje 1996, Boston
oarspr. útjwr. NESFA
rige Vorkosigan-kroniken
● foarich diel gjint (is 1e diel)
● folgjend diel Falling Free
ISBN 0 91 53 68 536

Dreamweaver's Dilemma is in science fiction-novelle fan 'e hân fan 'e súksesfolle en mannichfâld bekroande Amerikaanske skriuwster Lois McMaster Bujold. Hy makket ûnderdiel út fan 'e Vorkosigan-kroniken, Bujold har populêrste en omfangrykste searje, mar kin sûnder beswier los dêrfan lêzen wurde. Dreamweaver's Dilemma waard foar it earst útjûn yn 1996.

Eftergrûn[bewurkje seksje | boarne bewurkje]

Dreamweaver's Dilemma is in novelle dy't Bujold yn 1982 by wize fan oefening skreau, foarôfgeande oan wat se sels as har serieuze skriuwkarriêre beskôget.[1] It stiet de skriuwster noch goed by dat it op op Thanksgiving Day 1982 wie, by in besyk oan har âldelju, dat se by wize fan it útprebearjen fan in nij stik boartersguod in pear alineä's typte op har heite nije typmasine. Dat wiene de earste (sij it letter fuortredigearre) wurden fan Dreamweaver's Dilemma.[2]

As eftergrûn foar dizze novelle brûkte Bujold it lânskip fan East-Afrika mei de byhearrende ekology, dêr't se mei bekend rekke wie ûnder in stúdzjereis dy't se dêrhinne makke hie yn 'e tiid dat se noch biology studearre oan 'e Steatuniversiteit fan Ohio (Ohio State University) te Kolumbus. Se kaam fan dy reis thús mei mear as achthûndert dia's fan ynsekten dêr't se letter nea wer wat mei dien hat, oant se Dreamweaver's Dilemma skreau.[3] Dat hat skriuwen neffens Bujold foar op oare profesjes: "sels jins falen kin men gewoan fan sizze dat it noch ûnbewurke materiaal is."[4]

Lois McMaster Bujold op 'e Finncon-konvinsje te Tampere, yn Finlân (2012).

Dreamweaver's Dilemma ("It Dilemma fan 'e Dreameweefster") is in science fiction-novelle, skreaun yn it personele perspektyf, dy't ûnderdiel útmakket fan 'e Vorkosigan-kroniken (Ingelsk: Vorkosigan Saga), in searje dy't neamd is nei de lichaamlik hendikepte ealman, spion, admiraal en ryksauditeur Miles Vorkosigan, dy't yn 'e measte boeken derfan de haadrol spilet. Hoewol't it dus al yn 1982 skreaun wie, waard Dreamweaver's Dilemma pas yn 1996 publisearre yn in bondel mei deselde namme, yn 'e mande mei oar ier skriuwwurk fan Bujold. Yn 2012 is it werútjûn as ûnderdiel fan 'e e-boek-kolleksje Proto Zoa.[5]

Dreamweaver's Dilemma is it iennichste ferhaal út it Vorkosiversum (de wrâld fan 'e Vorkosigan-kroniken) dat net op 'e nij útjûn is yn 'e jierren 2000, doe't útjouwerij Baen Books de omnibusferzjes fan dy searje op 'e merk brocht. No stiet it ek bot op himsels; de iennichste bân dy't it mei de rest fan 'e Vorkosigan-kroniken hat, is dat Bêta Koloanje, de thúsplaneet fan Miles Vorkosigan syn mem, deryn neamd wurdt, en teffens immen mei de namme Naismith (Miles syn memme famkesnamme), dy't nei gedachten in fiere foarâlder fan Miles wêze moat.

Plot[bewurkje seksje | boarne bewurkje]

Dreamweaver's Dilemma spilet op in takomstige Ierde, likernôch sân- oant achthûndert jier foar de berte fan Miles Vorkosigan, as de minsklike kolonisaasje fan 'e romte noch grutdiels begjinne moat en de manipulaasje fan it minsklik genoom noch fierhinne yn 'e berneskuon stiet. It is in thriller mei as haadpersoan de keunstneresse Anias, dy't tsjin betelling dreamen wevet foar oaren. Sy komt yn 'e swierrichheden as se in lukratyf salaris akseptearret om in gewelddiedich senario te dreamweevjen. Lang om let begjint se te fermoedzjen dat har wurk gjin ûnskuldich doel tsjinje sil, en dêrom ropt se de help yn fan in âlde freon om in misdie op te lossen dy't noch begien wurde moat.

Oersettings[bewurkje seksje | boarne bewurkje]

  • Flag of Russia.svg Russysk (Pljetjeľščica Snov), fert. A. Novikov, 1999;
  • Flag of Bulgaria.svg Bulgaarsk (Dilemata na Sănopletačkata), fert. Z. Petkov, 2009.[6]

Boarnen, noaten en referinsjes[boarne bewurkje]

Boarnen, noaten en/as referinsjes:

Noaten

  1. Bujold, Lois McMaster, Biolog (www.dendarii.com).
  2. Carl, Lillian Stewart, A Conversation with Lois McMaster Bujold, yn The Vorkosigan Companion.
  3. Bujold, Lois McMaster, Biolog (www.dendarii.com).
  4. Bujold, Lois McMaster, Ohioana Library Career Award Acceptance Speech, taspraak jûn by de akseptaasje fan 'e Ohioana Library Career Award, op 27 okt. 2007 (www.dendarii.com).
  5. Bernardi, Michael, Full English Bibliography (www.dendarii.com).
  6. Bernardi, Michael, Full Translated Bibliography (www.dendarii.com).

Boarnen

  • Bernardi, Michael, Full English Bibliography (http://www.dendarii.com/biblio.html).
  • Bernardi, Michael, Full Translated Bibliography (http://www.dendarii.com/translations.html).
  • Bujold, Lois McMaster, Biolog (http://www.dendarii.com/biolog.html).
  • Bujold, Lois McMaster, Dreamweaver's Dilemma, 1996 (NESFA), ISBN 978-0 91 53 68 532 (neamd nei de novelle mei deselde namme; omfettet û.m. de novellen Dreamweaver's Dilemma, The Mountains of Mourning en The Adventure of the Lady on the Embankment, de koarte ferhalen Barter, The Hole Truth en Garage Sale, fjouwer essays, twa fraachpetearen mei de skriuwster en de genealogy fan it Vorkosigan-laach troch Suford Lewis).
  • Bujold, Lois McMaster, Ohioana Library Career Award Acceptance Speech, delivered October 27, 2007 (www.dendarii.com/ohioana.html).
  • Carl, Lillian Stewart, & Helfers, John, The Vorkosigan Companion: The Universe of Lois McMaster Bujold, Riverdale, New York, 2008 (Baen Books), ISBN 978-1 41 65 56 039.
de Vorkosigan-kroniken
Dreamweaver's Dilemma • Falling Free • Shards of Honor • Barrayar • The Warrior's Apprentice • The Mountains of Mourning • The Vor Game • Cetaganda • Ethan of Athos • Labyrinth • The Borders of Infinity • Brothers in Arms • Borders of Infinity (ramtferhaal) • Mirror Dance • Memory • Komarr • A Civil Campaign • Winterfair Gifts • Diplomatic Immunity • Captain Vorpatril's Alliance • CryoBurn • Gentleman Jole and the Red Queen