Aleksander-Svirski kleaster

Aleksander-Svirski kleaster Александро-Свирский монастырь
bouwurk
Sicht op de beide kleasters fan ôf de Rosjtsinsky-mar
lokaasje
lân	Ruslân
oblast	Leningrad
plak	Staraja Sloboda
koördinaten	60° 46' N 33° 18' E
bysûnderheden
type bouwurk	Kleaster
boujier	16e-17e iuw
monumintale status	Kultureel monumint fan federaal belang
monumintnûmer	4710117000
offisjele webside
svirskoe.org

It Aleksander Svirskikleaster (Russysk: Александро-Свирский монастырь) is in russysk-otterdoksk kleaster yn de bosken fan de oblast Leningrad, Ruslân. It leit súdlik fan de grins mei de republyk Kareelje. De Gouden Iuw fan it kleaster wie yn de 17e iuw. Ut dy tiid stamme de measte gebouwen. Bysûnder is de klokketoer mei trije spitsen, in soarte dêr't der net in soad fan de tiid trochstien hawwe.

Skiednis

Aleksander fan Svir op in 18 iuwsk ikoan

It kleaster waard stifte yn 1487, doe't in muonts mei de namme Aleksander út it Valaam-kleaster, him tusken heidenske folken nei wenjen sette, op sa'n 20 kilometer eastlik fan de Ladogamar en seis kilometer fan de rivier de Svir. Dêr krige de muonts yn in dream de opdracht fan de Hillige-Trije-ienheid om twa tsjerken te bouwen, dy't wijd wurde moasten oan de Trije-ienheid en de Transfiguraasje fan de Hear. Dy beide tsjerken foarmen it begjin fan de kleasters Trije-ienheid en Transfiguraasje, tegearre bekend ûnder de namme Aleksander-Svirski kleaster. Al doe't de stifter noch libbe bestie it kleaster út twa aparte kompleksen, dy't troch in paad by de mar del mei inoar ferbûn wiene.

Lykas oare kleasters yn Ruslân krige it Aleksander-Svirski kleaster te meitsjen mei perioades fan bloei en delgong. Mei de ynfaazjes yn Ruslân waard it kleaster jimmeroan wer yn brân stutsen en plondere, mar altiten fûn der wer in weropbou plak en yn de heechtijdagen hie it kleaster wol acht tsjerken, in rike sakristy en herberge it tal fan keunstwurken lykas weardefolle ikoanen en âlde boeken en manuskripten. Yn de 19e iuw waard it kleaster sels it "Noardlike Lavra" neamd.

It âldste gebou fan it tsjintwurdige kleaster is de stiennen Foarbeatsjerke út 1533. De bou fan de yn Novgorod-styl boude tsjerke mei refter en klokkestoel waard moooglik makke troch donaasjes fan tsaar Vasili III.

Nei 1917

Transfiguraasjekleaster

Trije-ienheidkleaster

Nei de Oktoberrevolúsje yn 1917 waarden de muontsen út harren kleaster ferjage. Guon waarden fermoarde, lykas de argimandryt fan it kleaster, dy't yn Olevets troch de Tsjeka eksekutearre waard. De bolsjewiken ferwideren de reliken fan de hillige Aleksander út it kleaster; it kompleks waard ûnderdiel fan de Gûlag en bekend ûnder de namme Svirlag. Net earder as yn de jierren 1970 fûnen der wer restauraasjes plak.

Weromjefte

It kleaster waard yn 1997 oan de Russysk-Otterdokske Tsjerke werom jûn. De muontsen troffen in foar in grut part ferrinnewearre kleaster oan en moasten hurd wurkje om de gebouwen wer yn oarder te meitsjen. Op 30 july 1998 kamen ek de reliken werom fan de stifter fan it kleaster. De tsjerken fan beide kleasters waarden restaurearre en wer yn gebrûk nommen foar de earetsjinst. Sûnt 1953 wie der in psychiatrysk sikehûs yn it Trije-ienheidskleaster fêstige en dat bleau noch sa oant de ferhûzing yn 2009. Tsjintwurdich hat it hiele Aleksander Svirski wer in religieuze funksje.

Tsjerken

Ofbyld	Namme	Kleaster	Boujier
	Trije-ienheidkatedraal	Trije-ienheidkleaster	1695—1697
	Foarbeatsjerke mei refter	Trije-ienheidkleaster	1533—1536
	Klokketoer	Trije-ienheidkleaster	1646
	Tsjerke fan Jehannes fan Damaskus	Trije-ienheidkleaster	1716
	Transfiguraasjekatedraal en de Tsjerke fan Elisabet en Sacharías	Transfiguraasjekleaster	1641—1644 1668
	Poartetsjerke fan Nikolaas de Wûnderwurker	Transfiguraasjekleaster	1791
	Klokketoer	Transfiguraasjekleaster	1903—1904

Boarnen, noaten en referinsjes

Boarnen, noaten en/as referinsjes:

Dizze side is alhiel of foar in part in oersetting fan de Russysktalige Wikipedyside; sjoch foar de bewurkingsskiednis: ru:Александро-Свирский монастырь Koarte histoarje op de side fan it kleaster Commons  Ofbylden dy't by dit ûnderwerp hearre, binne te finen yn de kategory Aleksander-Svirski kleaster fan Wikimedia Commons.