Onenightstand
In onenightstand, ek wol stavere as one-night stand of one night stand, is in foarm fan flechtich seksueel kontakt foar ien nacht (of in diel fan in nacht of in oar diel fan 'e dei). It wurd komt fan it Ingelske one-night stand (útspr.: ['wanai̯tstæ:nd], likernôch: "û-annaitstênd"), dat in "aventoerke foar ien nacht" betsjut.
De persoanen dy't in onenightstand mei-inoar belibje, kinne inoar yn 'e regel yn 't foar net, mar komme op in jûn mei-inoar yn 'e kunde, en hawwe oanslutend dy nachts geslachtsferkear. Sadwaande kinne de dielnimmers inoar meastal mar amper. It essinsjele ûnderskie tusken in onenightstand en oare seksuële relaasjes leit op it mêd fan 'e bedoeling fan 'e relaasje, dy't by onenightstands ornaris inkeld op seks rjochte is. Hoewol't onenightstands meastal nachts plakfine, is it deidiel dêr't it geslachtsferkear op plakfynt yn prinsipe yrrelevant, en kin it likegoed op moarn of op middei wêze.
Onenightstands fine plak mei folsleine wjersidige ynstimming, en hawwe neat te krijen mei prostitúsje, mei't der gjin betelling plakfynt. Wol kin it foarkomme dat ien (of beide) fan 'e partijen nei ôfrin spyt fan 'e ûndernimming ha(t). Sa is it mooglik dat ien partij dúdlik op in onenightstand út wie, wylst de oare partij dochs in langere relaasje foar eagen stie. Om sokke miskommunikaasje foar te kommen is it de baas en praat it spul yn 't foar troch, al is it fansels ek dan noch mooglik dat ien fan 'e partijen de oare doelbewust misliedt om oan seks te kommen.
Redens wêrom't lju oan onenightstands dogge, kinne wêze:
- dat men sin hat oan of ferlet hat fan anonime seks;
- dat men inkeld in aventoerke belibje wol en gjin fêste relaasje;
- dat men inoar yn 't foar ken (bgl. fia it ynternet) en ôfpraat hat in onenightstand te hawwen (yn sa'n gefal is der sprake fan in seksdate);
- dat men biningseangstme hat.
| Boarnen, noaten en/as referinsjes: |
|
Foar boarnen en oare literatuer, sjoch ûnder: References, op dizze side. |