Wybrand de Geest

Wybrand Simonsz. de Geest (Ljouwert, 16 augustus 1592 – Ljouwert, sa. 1661) wie keunstskilder yn Ljouwert. Hy wie spesjalisearre yn it meitsjen fan portretten.

Biografy

Wybrand de Geest krige syn oplieding yn it earstoan by syn heit Simen Juckesz. en gie letter yn de lear by syn omke Abraham Bloemaert. Fan 1614 oant 1618 ferbleau hy yn Frankryk en Itaalje. Werom yn Ljouwert, wurke hy ûnder oaren yn opdracht fan it Fryske steedhâlderlik hôf.

De Geest wie by syn ferbliuw yn Rome lid wurde fan de Nederlânske skildersrûnte de Bentvueghels. Fan de leden fan dat genoatskip krige hy de bynamme 'De Friesche Adelaar'.

De Geest troude yn 1622 mei Hendrickje Ulenborch, in fiere nicht fan Saskia fan Uylenburgh, de frou fan Rembrandt. Yn it foar it meastepart protestantske santjinde-iuwske Ljouwert naam De Geest in útsûnderingsposysje yn troch de Roomsk-Katolike Tsjerke trou te bliuwen.

De Geest beynfloede de styl fan Jacob Adriaensz Backer út Harns. Learlingen fan him wiene Jan Jansz. de Stomme en Jacob Potma. Ek De Geest syn soannen Julius en Frank wiene ek skilders. In bernsbern, dy't ek Wybrand hjitte, die fan alles en noch wat, ^[1] sa as toanielspylje, it skriuwen fan kluchten en hy liet it "Het Kabinet der Statuen" (1702) útbringe en makke in reisgids foar Rome.

Wurk

Der hinget wurk fan De Geest yn it Ryksmuseum Amsterdam, it Frysk Museum, yn Harinxmastate (Beetstersweach) en yn Stuttgart.

Galery

Eraert fan Pipenpoy yn 1625
Sophia Anna fan Pipenpoy
Portret fan Freark V fan Palatinat, oalje op paniel, nei 1625.
Portret fan de fjouwer bruorren fan Willem I fan Oranje-Nassau, doek, 189 × 147 sm, nei 1630 (Ryksmuseum, Amsterdam)
Portret fan Willem-Freark fan Nassau-Dietz, 1632 (Ryksmuseum, Amsterdam).
Portret fan Hendrik Casimir I fan Nassau-Dietz, 1632 (Ryksmuseum, Amsterdam).
Portret fan Henri Casimir I fan Nassau-Dietz, nei 1632 (Ryksmuseum, Amsterdam).
Portret Ernest-Casimir fan Nassau-Dietz, 1633 (Ryksmuseum, Amsterdam).
Ernst Casimir fan Nassau-Dietz, 1635 (Ryksmuseum, Amsterdam).
Portret fan in bern, oalje op paniel, 56 sm x 34 sm.