Tbilisy

Ut Wikipedy
Gean nei: navigaasje, sykje
Utsjoch oer Tbilisy fanôf it plak fan de David-Tsjerke, ± 1907-1915.

Tbilisy (Georgysk: თბილისი) is de haadstêd fan Geörgje. Eartiids stie de stêd bekind ûnder de (Turkske) namme Tyflis. De stêd beslacht in oerflak fan 350 km² en der wenje sa'n 1,4 miljoen minsken.

Skiednis[bewurkje seksje | edit source]

Sûnt de 4de ieu foar Kristus is der minsklike bewenning op de lokaasje fan Tbilisy oan de rivier de Koera (Georgysk: Mtkvari). Yn de 5e ieu stifte kening Fachtang I Gorgazaly (452-502) Tbilisy. Neffens in leginde skeat de kening in pylk mei syn bôge en waard de stêd stifte op it plak dêr't de pylk delkaam. Tbilisy hat gauris beset west troch útlânske grutmachten lykas de Perzen, de Turken en de Arabieren. Yn 1122 feroveret de Geörgyske kening David de Bouwer nei swiere gefjochten de stêd. Hy ferhuzet syn residinsje fan Kuta'isy nei Tbilisy en makket dêrfan de haadstêd. Fan 1783 ôf wurdt Tbilisy ferskate kearen ferneatige troch de Perzen. Yn 1801 anneksearret Ruslân de stêd. Nei de Russyske revolúsje wurdt it de haadstêd fan in ûnôfhinklik Geörgje fan 1918 oant en mei 1921. Dan falt it Reade Leger de stêd binnen en wurdt it de haadstêd fan de Transkaukasyske Federaasje en letter fan de Sowjet Republyk Geörgje. Yn 1991 waard Tbilisy haadstêd fan in ûnôfhinklik Geörgje.

Gebouwen[bewurkje seksje | edit source]

Op de hegere plakken yn de stêd steane faak âlde tsjerken. De kommunisten hawwe ek in pear grutte gebouwen achterlitten lykas in tal unversiteits- en kultuergebouwen. Fanút de stêd kinst hast altyd ien fan, of beide, 'paadwizende' bouwurken sjen, de televyzje-útstjoermêst en it stânbyld fan de 'Mem fan Kartly'.

Befolking[bewurkje seksje | edit source]

De grutste minderheid yn Tbilisy binne de 200.000 Armeenjers. Rûchwei de helte dêrfan binne ferdreaun út Abgaazje. Ek wenje der Russen, Osseten en Azery. De joadske minderheid skynt al mear as 2000 jier yn Geörgje te wenjen. Ek binne der Koerdyske en Turkske mienskippen te finen.