Mûsgoffers

Mûsgoffers
In Fresnokangaroerôt (Dipodomys nitratoides).
Taksonomy
ryk:	dieren (Animalia)
stamme:	rêchstringdieren (Chordata)
ûnderstamme:	wringedieren (Vertebrata)
klasse:	sûchdieren (Mammalia)
skift:	kjifdieren (Rodentia)
ûnderskift:	bevers en goffers    (Castorimorpha)
tuskenskift:	goffereftigen (Geomorpha)
boppefamylje:	goffers en mûsgoffers    (Geomyoidea)
famylje:	mûsgoffers (Heteromyidae)
Gray, 1868

De mûsgoffers (wittenskiplike namme: Heteromyidae), ek wol wangpûdmûzen of wangsekmûzen neamd, foarmje in famylje fan 'e klasse fan 'e sûchdieren (Mammalia), it skift fan 'e kjifdieren (Rodentia), it ûnderskift fan 'e bevers en goffers (Castorimorpha), it tuskenskift fan 'e goffereftigen (Geomorpha) en de boppefamylje fan 'e goffers en mûsgoffers (Geomyoidea).

Beskriuwing

Ta dizze famylje hearre de skeintoskmûsgoffers, stikelmûsgoffers, kangoeroemûzen en kangoeroerotten. Yn totaal giet it dêrby om likernôch 65 libbene soarten. Dy komme benammen foar yn Noard-Amearika, hoewol't guon harren fersprieding troch de Grutte Amerikaanske Utwikseling fia de lânbrêge fan Midden-Amearika útwreide hawwe nei it noardlike diel fan Súd-Amearika.

De mûsgoffers binne lytseftige herbivoaren, dy't komplekse ûndergrûnske hoalestelsels oanlizze yn 'e prêrjes en woastinen fan 'e westlike helte fan Noard-Amearika. Guon soarten komme lykwols foar yn it tropysk reinwâld, dêr't se in selde soarte hâlden en dragen fertoane. Mûsgoffers hawwe wangpûden dy't net yn 'e mûle sitte, mar oan 'e bûtenkant oer de wangen hinne en nei efteren rinne oant oer de sydkant fan 'e hals. De wangpûden binne fan binnen mei hier begroeid en hawwe iepenings oan 'e foarkant, deunby de mûle. Mûsgoffers libje foar it meastepart fan sied en oare dielen fan planten, dy't se yn mânske hoemannichten garje yn harren wangpûden en sa mei weromnimme nei harren hoalen. By kâld of reinich waar bliuwe de mûsgoffers binnen en tarre se op 'e foarrieden fretten dy't se oanlein hawwe.

Famylje-opbou

famylje mûsgoffers (Heteromyidae) ûnderfamylje kangoeroemûzen en -rotten (Dipodomyinae) skaai kangoeroemûzen (Microdipodops): 2 soarten skaai kangoeroerotten (Dipodomys): 19 soarten ûnderfamylje skeintoskmûsgoffers (Perognathinae) skaai glêdhierrige mûsgoffers (Perognathus): 9 soarten skaai rûchhierrige mûsgoffers (Chaetodipus): 17 soarten ûnderfamylje stikelmûsgoffers (Heteromyinae) skaai Dipriomys † skaai echte stikelmûsgoffers (Heteromys): 16 soarten* skaai Metaliomys † *) ynkl. it eardere skaai Liomys, dat parafyletysk bliek te wêzen.

Boarnen, noaten en referinsjes

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side. Commons Wikimedia Commons  Ofbylden dy't by dit ûnderwerp hearre, binne te finen yn de kategory Heteromyidae fan Wikimedia Commons.