Castel Film Studios

Castel Film Studios
algemien
nasjonaliteit	Roemeensk
type	privaat
sektor	tillefyzje- en filmyndustry
fêstige yn	Izvorani
oprjochte	1992
oprjochter	Vlad Păunescu, Charles Band
eigner	Castel Film Romania
offisjele webside
www.castelfilm.ro
kaart
Lokaasje yn Roemeenje, noardlik fan Boekarest.

De Castel Film Studios binne in studiokompleks yn Izvorani, benoarden de Roemeenske haadstêd Boekarest, dêr't de opnamen foar in protte Roemeenske en ynternasjonale films en tillefyzjeprogramma's plakfine. De Castel Film Studios besteane sûnt 1992 en binne eigendom fan 'e Roemeenske filmproduksjemaatskippij Castel Film Romania.

Skiednis

De Castel Film Studios setten yn 1992 útein, yn 't earstoan as filmstudiokompleks foar de produksjes fan 'e Roemeenske filmstudio Castel Film Romania. Dat is in produksjemaatskippij dy't yn 1991 oprjochte waard troch de Roemeenske filmprodusint Vlad Păunescu en syn Amerikaanske kollega Charles Band. Sûnt binne de Castel Film Studios útgroeid ta ien fan 'e wichtichste filmstudiokompleksen fan East-Jeropa, dêr't net inkeld de opnamen plakfine fan 'e Roemeenske films fan Castel Film Romania, mar ek fan ynternasjonale, Ingelsktalige produksjes fan filmstudio's út oare lannen.

Yn totaal binne der anno 2023 mear as 350 films en tillefyzjeprogramma's hielendal of foar in part opnommen yn 'e Castel Film Studios, wêrûnder de histoaryske oarlochsfilm Cold Mountain (mei Nicole Kidman en Renée Zellweger), de romantyske krystfilm A Royal Christmas (mei Lacey Chabert en Jane Seymour), de horrorfilm The Nun en de softpornotillefyzjesearje Life on Top. Ek binne der in protte produksjes fan 'e Amerikaanske filmstudio Full Moon Features opnommen, dy't him taleit op it horrorsjenre.

Oare films en programma's dy't yn kompleks opnommen waarden, wiene produksjes fan Warner Bros., Paramount Pictures, Miramax Films, Focus Features, Sony Pictures, HBO, Dimension Films, ABC, USA Network, Trimark Pictures, Granada Media, Les Productions du Tresor en Noe Productions.

Fasiliteiten

De Castel Film Studios beskikke oer njoggen ûnderskate soundstages mei in mienskiplik oerflak fan 9.648 m². De lytste dêrfan is Studio 8, dy't 216 m² mjit, en de grutste is Studio 5, mei in oerflak fan 3.354 m². Fierders binne der in soundstage fan 270 m², ien fan 408 m², trije fan 540 m², ien fan 1.260 m² en ien fan 2.520 m². Fansels binne der ek klaaikeamers, romten foar fisazjy en hierstilearring, kantoaren en fasiliteiten foar postproduksjewurk lykas filmmontaazje. Op it backlot fan it studiokompleks befine har ferskate fêste filmsets, in nullewâld en in lytse mar.

Produksjes

In seleksje fan films en tillefyzjefilms dy't alteast foar in diel yn 'e Castel Film Studios opnommen binne:

• Leapin' Leprechauns! (1995)
• Spellbreaker: Secret of the Leprechauns (1996)
• The Secret Kingdom (1998)
• Dragonworld: The Legend Continues (1999)
• Sherlock: Case of Evil (2002)
• Cold Mountain (2003)
• Dracula II: Ascension (2003)
• Dracula III: Legacy (2005)
• Hellraiser: Hellworld (2005)
• Hellraiser: Deader (2005)
• The Marksman (2005)
• Them (2006)
• Adam Resurrected (2008)
• Anaconda 3: Offspring (2008)
• Legiunea Străină (2008)
• Mirrors (2008)
• Anacondas: Trail of Blood (2009)
• Ghost Rider: Spirit of Vengeance (2012)
• Werewolf: The Beast Among Us (2012)

• Dead in Tombstone (2013) (rezjy: Roel Reiné)
• Fright Night 2: New Blood (2013)
• Walking with the Enemy (2013)
• Dying of the Light (2014)
• A Good Man (2014)
• Queen and Country (2014)
• A Royal Christmas (2014)
• Absolution (2015)
• Dragonheart 3: The Sorcerer's Curse (2015)
• The Scorpion King 4: Quest for Power (2015)
• A Christmas Prince (2017)
• The Crucifixion (2017)
• Dragonheart 4 (2017)
• Killing Salazar (2017)
• Royal Winter (2017)
• Free Dance (2018)
• The Last Sharknado: It's About Time (2018)
• The Nun (2018)
• Backdraft II (2019)

Keppelings om utens

• (in) Offisjele webside fan 'e Castel Film Studios

Boarnen, noaten en referinsjes

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side, en ûnder: Referinţe, op dizze side.