Slidehokky

Ut Wikipedy
Gean nei: navigaasje, sykje
Slidehokky-wedstriid Sweden-Kanada 2004.

Slidehokky is in foarm fan iishokky, mar dan op in prikslide. De klean en it grutste part fan de regels yn it spul komme oerien mei dat fan iishokky.

Skiednis[bewurkje seksje | edit source]

Slidehokky is yn 1960 yn Sweden ûntstien trochdat twa iishokkyers dy't, ek al wienen se lichamelik beheind, doch iishokky spyljen bliuwe woenen. Al wie der it begjin net in soad belangstelling foar, waard der al yn 1969 in ynternasjonale kompetysje opstarten. Earst yn 1994 mei de Paralympics fan Lillehammer waard Slidehokky in paralympyske wintersport. Sweden waard doe de earste winner. Sy fersloegen Noarwegen yn de finale mei 1-0.

Regels[bewurkje seksje | edit source]

Oarsponklik waarden de iishokkyregels brûkt, en yn de rin fan de tiid binne dy oanpast oan de sporters en de sliden.

  • Net mear as 6 spilers fan elk team op it iis.
  • Flugge en oan-tiid-bûne wiksels
  • It thús spyljende team hat it lêste rjocht fan in wiksel
  • Spyltiid: 3 x 15 minuten

Spylfjild[bewurkje seksje | edit source]

Slidehokky wurdt spile op in fjild fan likernôch 60 x 30 meter. It fjild, dat ôfrûne hoeken hat, wurdt ôfsletten troch in boerdrâne, fan 1.22 m heech. Op fjouwer meter ôfstân fan de koarte siden binne de doellinen, mei yn de midden dêrfan de goal. It spylflak tusken de doellinen is yn trije gelikense stikken ferdield troch twa 30 sm brede blauwe linen. Dêrnjonken wurdt it fjild ek noch troch in 30 sm brede reade line yn twa helten ferdield. It fak dat foarme wurdt troch in koarte side fan de boerdrâne en in blauwe line is it ferdigeningsfak fan it team dat yn dat fak oanwêzige doel ferdigenet. Foar de tsjinstanner is dit it oanfalsfak. It gebiet tusken de twa blauwe linen is it neutrale fak.

Teams[bewurkje seksje | edit source]

In slidehokky-team bestiet út maksimaal tolve spilers en twa doelferdigeners. Seis spilers, dy't yn de hiele wedstriid wiksele wurde meie, befine harren op it iis. Sawol ûnder de wedstriid as by ûnderbrekkings meie der spilers wiksele wurde.

Arbitraazje[bewurkje seksje | edit source]

By de hegere en de ynternasjonale nivo’s bestiet de arbitraazje by eltse wedstriid út ien skiedsrjochter en twa grinsrjochters, by dat trijemanssysteem binne ferantwurdlikheden dúdlik ferdield tusken de skiedsrjochter en de twa grinsrjochters.

By de junioaren en de legere nivo’s stiet eltse wedstriid ûnder lieding fan twa skiedsrjochters. Yn dat twamanssysteem ha beide skiedsrjochters deselde ferantwurdlikheid ûnder de wedstriid.

Utrissing[bewurkje seksje | edit source]

De útrissing fan de sporters bestiet út in prikslide, stokken en beskermjende klean.

De slide[bewurkje seksje | edit source]

Hokkyslide

De prikslide dy’t brûkt wurdt by slidehokky is hiel oars as in gewoane prikslide. By in hokkyslide steane de reden tige ticht op inoar, soms mar mei in tuskenromte fan 2,5 sm. Ek sitte der ûnder de slide iishokky-izers en gjin izers fan noren, lykas by in gewoane prikslide. Fierder is in hokky-slide rûn fan foarm en yn stee fan in sit, sit der in harnas op. Dat alles soarget derfoar dat de slide tsjin in bêste klap kin en de sporter gjin slimme ferwûnings oprint.

De stokken[bewurkje seksje | edit source]

De stokken

De stokken fan in slidehokkyer wurde fan karbon makke en binne koart fan stik. De stok hat oan de iene kant in izeren hoekje om mei bewegen foarút te kommen. Dy hoekjes meie net fierder as ien sintimeter útstekke om foar te kommen dat der in oare sporter mei ferwûne rekket of dat it iis skansearre wurdt. De oare kant fan de stok hat de foarm fan in hokkystik, om de pik mei fuort slaan te kinnen.

Bekermjende klean[bewurkje seksje | edit source]

De klean fan in slidehokkyer besteane út:

  • Rompbeskermer - Dat is in keunststof beskermer fan hast it hiele boppeliif.
  • Wanten - Dat binne wanten fan tsjokke stof, dy't beskermet by fallerij.
  • Foetbeskermers - In foetbeskermer beskermet de fuotten en hat faak in hurde bûtenkant en in sêfte binnenkant.
  • Helm mei fizier - Wurdt makke fan keunststof en moat beskermje tsjin klappen op ’e holle, fan de pik of fan oare sporters.
  • Beskermjende broek - Dat is in broek dy’t makke is fan in tsjokke stof, dy't beskermet by fallerij.

Keppelings om utens[bewurkje seksje | edit source]