Lapdance

Ut Wikipedy
Gean nei: navigaasje, sykje
In lapdance-demonstraasje op 'e AVN Adult Entertainment Expo fan 2008.

In lapdance (letterlik: "skurtedûns") is in foarm fan sekswurk dy't yn in protte stripklubs ferrjochte wurdt. Dêrby fiert in stripper in seksueel eksplisite eroatyske dûns op deunby of yn lichaamlik kontakt mei in klant. Ofhingjend fan 'e pleatslike wetjouwing en it belied fan 'e klub kin de dûnseresse net folle klean oan hawwe of topless of sels hielendal neaken wêze. By in full contact lapdance kin de stripper non-penetratyf seksueel kontakt mei har klant oangean, bygelyks troch mei har stuten yn syn krús te riden (grinding).

Der besteane ferskate farianten fan 'e lapdance, lykas de couch dance ("sofadûns"), wêrby't de klant ûnderwilens op in bank of sofa sit, en de bed dance ("bêddûns"), wêrby't de klant op in bêd leit. Yn in soad stripklubs wurdt de lingte fan in lapdance ôfmetten neffens de lingte fan it nûmer dat draaid wurdt troch de d.j. fan 'e klub. Yn guon klubs kinne lapdance-sesjes, dy't yn 'e regel in healoere beslane, boekt wurde yn in champagne room, wat in priveefertrek is dat ornaris efteryn in stripklub sitewearre is, en dêr't de klant sûnder gleskegnuvers fan syn lapdance genietsje kin.

Ofhingjend fan 'e pleatslike wetten en de regels fan 'e oangeande klub kin it al of net tastien wêze dat de stripper ûnder de lapdance de klant oanrekket, of de klant de stripper, of beide inoar, of net ien fan beiden inoar. Oan 'e oare kant kin yn alle gefallen in hiel skala oan kontaktfoarmen tusken beiden mooglik wêze as klant en stripper dêr oerienstimming oer berikke en salang't de klublieding it troch de fingers sjocht. Datoangeande rint it belied fan ferskillende stripklubs wiid útinoar. Kritisy fan lapdancing sizze dat guon klubeigners, troch it ynrjochtsjen fan tsjustere herntsjes en troch fan strippers hege prizen te freegjen om yn harren klubs optrede te meien, it ferhanneljen fan seksuële dieden temûk tastean en sels oanmoedigje (wat tsjin 'e wet is yn lannen dêr't prostitúsje ferbean is).