Yndyske fluitein

Yndyske fluitein
taksonomy
ryk dieren (Animalia) stamme rêchstringdieren (Chordata) klasse fûgels (Aves) skift goeseftigen (Anseriformes) famylje einfûgels (Anatidae) skaai fluiteinen (Dendrocygna)
soarte
Dendrocygna javanica
Horsfield, 1821
IUCN-status: net bedrige
ferspriedingsgebiet

De Yndyske fluitein (Dendrocygna javanica) is in fûgel út de famylje fan 'e einfûgels (Anatidae). It is ien fan 'e acht soarten fan it skaai fluiteinen (Dendrocygna).

Beskriuwing

Yndyske fluitein.

Yndyske fluiteinen ha in gewicht fan 450 oant 680 gram. Jerken en sijkes ferskille net in soad fan inoar. De jerken binne yn 'e regel wat grutter as de sijkes. Lykas by oare soarten yn it skaai binne de flankfearren wat langer, mar net sa opfallend as by de Australyske fluitein. De búk en it boarst binne readbrún. De fearren op 'e rêch binne griisbrún en ha in ljochte seame oan 'e ein. Lykas oare soarten fan it skaai ha Yndyske fluiteinen in lange hals en lange poaten en in rjochte hâlding yn 'e rêst. Folwoeksen fûgels ha in ljochtgiele eachring.

Juvenilen ha noch net in readbrune búk en boarst en se ha ek in minder dúdlike eachring.

De fûgels binne fral aktyf by it lemieren. Grutte groepen fûgels ferlitte dan de rêstplakken om te iten.

Fersprieding

It ferspriedingsgebiet fan Yndyske fluiteinen leit yn Súdeast-Aazje. Se libje op wetter mei in soad driuw- en ûnderwetterplanten yn in boskeftige of agraryske omjouwing. Hiel faak komme se ek op rysfjilden. Oars as yn it ferspriedingsgebiet fan 'e Australyske fluitein, is de delslach yn it biotoop fan 'e Yndyske fluitein relatyf lykmjittich ferdield. Sadwaande is de Yndyske fluitein net in echte trekfûgel.

Gedrach

Groep Yndyske fluiteinen.

De Yndyske ein is in sosjale fûgel. Se ite wetterplanten, sied fan rysplanten, lytse fiskjes, kikkerts en wringeleaze dierkes. As it reint begjint de ein te brieden. Dat kin in holte yn in beam wurde of in nêst tusken takken fan in beam. It lechsel bestiet út sân oant tolve wite aaien, dy't troch beide âlders útbret wurde. De aaien komme nei 22 oant 24 dagen út. De soarte makket him wol ris skuldich oan briedparasitisme.

Status

De IUCN klassifisearret de fûgel op 'e Reade list as net bedrige. De wrâldpopulaasje wurdt tusken 200.000 en 2.000.000 fûgels rûsd (Wetlands International 2023). De populaasje rint tebek.

Keppeling om utens

• BirdLife, oproppen 4 febrewaris 2025.
• Ebird, oproppen 4 febrewaris 2025.
• Avibase, oproppen 4 febrewaris 2025.

Boarnen, noaten en referinsjes

Boarnen, noaten en/as referinsjes:

Dit artikel is foar in part in oersetting fan it Dútsktalige artikel. Sjoch foar boarnen en referinsjes: de:Javapfeifgans BirdLife International Commons Wikimedia Commons  Ofbylden dy't by dit ûnderwerp hearre, binne te finen yn de kategory Yndyske fluitein fan Wikimedia Commons.