Wytkopgoars

wytkopgoars
Mantsje Wyfke
taksonomy
ryk dieren (Animalia) stamme rêchstringdieren (Chordata) klasse fûgels (Aves) skift moskeftigen (Passeriformes) famylje goarsfûgels (Emberizidae) skaai goarzen (Emberiza)
soarte
Emberiza leucocephalos
S.G. Gmelin, 1771
IUCN-status:

De wytkopgoars (Emberiza leucocephalos) is in moskeftige fûgel út 'e famylje fan 'e goarsfûgels (Emberizidae), in groep dy't de measte moderne auteurs hjoed-de-dei los fan 'e finkfûgels (Fringillidae) yndiele. De soarte komt eastlik fan 'e Oeral foar.

Namme

De namme fan it skaai Emberiza komt fan it Aldheechdútske wurd Embritz, dat goars betsjut. De soarte-oantsjutting leucocephalos komt út it Aldgryksk: leukos (wyt) en kephalos (kop).

Skaaimerken

De wytkopgoars is in stevige fûgel fan 16 oant 17,5 sintimeter lang, mei in tsjokke snaffel dy't oanpast is oan it iten fan sied.

It mantsje hat in wite krún en wite wangen, mei in kastanjebrune foarholle en kiel. De rêch is brún en sterk streke. It wyfke is folle minder opfallend fan kleur, ljochter en grizer en is op it kin en it boarst mear streke.

It winterkleed liket op dat fan 'e gielfink, mar dêrby is al it giel ferfongen troch wyt. De sang en roppen lykje op dy fan 'e gielfink.

Ferspriedingsgebiet

De wytkopgoars briedt yn in grut part fan Aazje. Winterdeis lûkt de soarte nei it suden, nei Sintraal-Aazje, noardlik Yndia en súdlik Sina.

De soarte wurdt yndield yn twa ûndersoarten:

• westlike wytkopgoars, Emberiza leucocephalos leucocephalos – de nominaatfoarm, dy't fierwei it grutste part fan 'e wrâldpopulaasje útmakket.
• Emberiza leucocephalos fronto (Stresemann, 1930) – in lytse populaasje fan stânfûgels dy't briedt yn noardwestlik Gansu en noardeastlik Qinghai yn Sina.

Yn West-Sibearje krúst de wytkopgoars mei de giele goars. Dêrtroch komme der ferskate tuskenfoarmen tusken beide soarten foar.

Krusing fan 'e wytkopgoars mei de giele goars.

Ekology

Aaikes.

De wytkopgoars libbet benammen fan sied, mar yt yn 'e briedtiid ek ynsekten. It nêst leit op 'e grûn en in lechsel bestiet út fjouwer oant seis aaien. Dy binne ljocht fan kleur en hawwe de foar goarsfûgels sa karakteristike hiereftige tekening.

Status en bedrigingen

De soarte hat in grut ferspriedingsgebiet, mar der wurdt oannommen dat it tal fûgels ôfnimt. Dy ôfname is lykwols net sa bot dat de soarte as bedrige beskôge wurde moat.

De Ynternasjonale Uny foar Natuerbehâld (IUCN) klassifisearret de wytkopgoars as net bedrige (Least Concern).

Boarnen, noaten en/as referinsjes:

BirdLife, 30 augustus 2026. Birds of the World, 30 augustus 2026. eBird, 30 augustus 2026. Commons Wikimedia Commons  Ofbylden dy't by dit ûnderwerp hearre, binne te finen yn de kategory wytkopgoars fan Wikimedia Commons.