Yntertekstualiteit

Wannear't yn in literêre tekst nei in oare literêre tekst, nei film of nei muzyk ferwiisd wurdt, neame we dat yntertekstualiteit. It is wichtich om yntertekstuele ferwizingen by dyn ynterpretaasje fan in tekst te belûken. It kin bygelyks in personaazje karakterisearje, in sitewaasje kleurje of ferwize nei in djippere betsjuttingslaach of in motyf. Om yntertekstualiteit te werkennen, moat de lêzer datjinge dêr't nei ferwiisd wurdt kenne. Hoe belêzener oft de lêzer is, hoe makliker it werkennen fan yntertekstualiteit is. Atst tinkst datst mei yntertekstualiteit te meitsjen hast, kinst fierder sykje nei achtergrûnynformaasje.