Gerhart

Gerhart wie in Fryske greve út de 9e ieu. Fryslân makke doe diel út fan it Frankyske ryk.

Skiednis

Gerhart hie as lienhear keizer Loadewyk de Fromme en bestjoerde tusken 822 en 842 út namme fan de keizer it goa-greefskip Westergoa. Om 830 hinne wienen yn it Frankyske ryk grutte ynterne problemen ûntstien troch de opposysje fan wichtige Frankyske eallju en de soannen fan de keizer tsjin de keizer himsels. Ien fan dizze soannen Lotarius ferbûn him mei Deenske warlords. Hy sette de Denen oan om de Fryske kust oan te fallen om op dy wize druk útoefenje te kinnen tsjin syn heit, keizer Loadewyk. De kustferdigening dy't troch de keizer organiseare waard wie net bot suksesfol. Foar in part wie dat in gefolch fan it feit dat de Friezen min te motivearjen weinen om har te mingen yn it politike harrewarre fan de Frankyske besetters. De keizer stjoerde strange amtners en greven nei it gebiet fan de Friezen om har wer yn de stringen te krijen.

Benammen Gerhart waard fan neilittichheid beskuldige. Hy soe fersomme hawwe syn macht en foech te brûken. De Friezen brûkten har skippen leaver foar de hannel as om plonderers efternei te sitten. Mooglik hie greve Gerhart partij keazen foar Lotarius. Hy waard út it amt setten en ferlear al syn goederen yn Westergoa.

Boarne

• D.P. Blok De Franken in Nederland, Haarlim 1979, side 86.
• L. van der Tuit, Koningen en Krijgsheren, de Franken in de Lage Landen, Kampen 2009, side 160.