Wikipedy:Dochs wat regels

Om't de Wikipedy in Wiki is binne der gjin redakteuren, mar binne wy mei-inoar ferantwurdlik foar de ynhâld fan ús ensyklopedy. As wy goede wenten ûntwikkelje, en elkoar in bytsje bystjoere as dat winsklik is, dan soe it goed komme moatte. Dochs kin it maklik wêze en skriuw wat regels del, dêr't fan bliken dien hat dat ze in help wêze kinne. Dit binne fan dy regels.

Ien fêste regel

Der is mar ien fêste regel: Foar al ús bydragen jilde de fjouwer F-en:

• Frysk: Us teksten moatte yn it Frysk wêze. (Oars binne der ek Wikipedyen yn oare talen.)
• Feitlik: Wat yn ús teksten stiet moat echt sa wêze.
• Frij fan rjocht: Alle bydragen moatte frij fan rjochten wêze. Se moatte ûnder de GNU Iepen Dokumentaasje Lisinsje falle, of ûnder in lykweardiche lisinsje, of se moatte publyk besit wêze.
• Frij fan oardiel: wat yn ús teksten stiet, mei net kleure wêze troch ús eigen fisy. As eat fan mear kanten besjoen wurde kin, dan moatte wy ek wier de ferskate kanten yn ús teksten opnimme. Dit is in ensyklopedy, dus de teksten moatte objektyf wêze.

Oare regels

De rest is mear advys:

• Meitsje jo net te drok om de regels. Meidwaan oan de Wikipedy moat aardich bliuwe. Mar om't wy de teksten mei-inoar meitsje, sil in tekst dy't jo skriuwe grif oanpast wurde as in oar fynt dat it de tekst de fjouwer F-en net achtet. (Eltse side hat in oerlisside om soks troch te praten.)

• Begjin nije siden: Teksten hoege net daalks it lêste wurd oer it mêd te wêzen. Eltsenien kin gewoan begjinne it eigen witten del te skriuwen. Dat kin sels ien inkele sin wêze. As der mar ien kear immen wat skriuwt komme der fansels oaren dy't der wat oan tafoegje wolle.

• Keppelje siden. Alles hoecht bygelyks net op ien side te stean. As jo in wurd jargon brûke kin dat op in eigen side beskreaun wurde. En oarsom kinne jo keppelingen meitsje nei oare siden dy't skreaun binne oer wat jo allinnich oanstippe.

• Bou in ensyklopedy. Foegje ta wat yn in ensyklopedy heart, en betink wêr't it stean moat. As jo eat oan in side tafoegje wolle, betink dan earst of it geskikt is. As it by de side past, skriuw it dan wêr't it yn de tekst ynpast wurde kin, en pas de tekst deromhinne ek oan. Mar datselde jildt ek as jo in nije side tafoegje. Betink ek dan of it mêd geskikt is foar de wikipedy, hokfoar titel geskikt is, en wêr't de side teplak is, en pas oare siden oan en keppelje se mei de nije side.

• Meitsje Wikipedy:keppelings om utens. Fansels is it baas om ynformaasje oer te nimmen op ús eigen siden, mar somtiden kin dat net. Yn sa'n gefal, mar ek om oan te jaan hokfoar boarnen jo foar in side brûkt hawwe, kinne jo keppelings tafoegje nei siden bûten de Wikipedy. Dy keppelings wurde dan as in aparte rige ûnderoan de side skreaun.

• Meitsje siden net te wyld. Brûk kleuren en fette, skeane en gruttere letters allinnich as dat wier in doel hat. En foar keppelings jildt itselde. Besykje keppelings allinnich ta te foegjen as in lêzer der brûk fan meitsje soe. Dat betsjut ek dat it meast gjin doel hat en nim twa kear deselde keppeling op op deselde side.

• Wês eksakt. Us siden sille lêzen wurde troch minsken yn oare jieren, en fan oare plakken fan de wrâld. Dêrom wurdt in side better as der net stiet dat eat 'dit jier' bard is, mar yn hokfoar jier dat dan wie. En as der ek in krekte datum foar is, is dat noch better, fansels. En datselde jildt foar oantallen. Al wit men bygelyks meast net it krekte tal fan minsken yn in demonstraasje, dan is "inkele tûzenen minsken" net sa dúdlik as "tusken de trije tûzen en fjouwer tûzen minsken". En sa ek foar plakken. "Wûnseradiel" is better as "It westen fan ús provinsje", as it feitlik is, "Skylge en Flylân" is better as "de westlike twa Fryske eilannen", ensfh.

Mar úteins giet it dêrom dat wat jo skriuwe of oanpasse in ferbettering foar de Wikipedy wêze moat.