Weverfûgels

Weverfûgels
Doarpswever (Ploceus cucullatus)
Taksonomy
ryk	dieren (Animalia)
stamme:	rêchstringdieren (Chordata)
ûnderstamme:	wringedieren (Vertebrata)
klasse:	fûgels (Aves)
ûnderklasse:	moderne fûgels (Neornithes)
tuskenklasse:	nijkakigen (Neognathae)
boppeskift:	nije fûgels (Neoaves)
sûnder rang:	mosk- en pappegaai-eftigen    (Psittacopasserae)
skift:	moskeftigen (Passeriformes)
sûnder rang:	sjongfûgeleftigen (Eupasseres)
ûnderskift:	sjongfûgels (Passeri)
sûnder rang:	echte sjongfûgels (Euoscines)
tuskenskift:	echte moskeftigen (Passerides)
lytsskift:	moskfûgeleftigen en sibben    (Passerida)
boppefamylje:	moskfûgeleftigen (Passeroidea)
famylje:	weverfûgels (Ploceidae)
Sundevall, 1836

De weverfûgels (Ploceidae) binne in famylje fan sjongfûgels. De namme ferwiist nei it ambacht fan 'e fûgels om fan gers en oar materiaal keunstige nêsten te weven.

Beskriuwing

De tige opfallende noardlike fjoerwever.

Mantsjes yn 'e famylje binne faak kleurryk en ha reade, giele en swarte kleuren. Guon soarten ha allinnich kleurfariaasjes yn it briedseizoen en ferskille bûten it briedseizoen mar in bytsje of net fan 'e ienfâldiger kleurde wyfkes. De fûgels ite sied en ha rûne, koanyske snaffels.

Fersprieding

Alle fûgels yn 'e famylje binne eigen yn 'e Alde Wrâld, de measten yn Afrika súdlik fan 'e Sahara, alhoewol't der ek in pear yn tropyske gebieten fan Aazje libje. In pear soarten binne bûten harren oarspronklike ferspriedingsgebiet yntrodusearre. Koloanjes fan weverfûgels binne faak net fier fan wetter te finen.

Hâlden en dragen

Wevers binne bekend fanwegen de bou fan harren nêsten, dy't tusken de soarten ferskille yn grutte, foarm, it brûkte materiaal en de tapaste technyk. Se brûke lytse bledsjes, fezels, tûkjes en gers.

In soad soarten weve tige kreaze nêsten mei tinne blêdfezels, mar guon, lykas de buffelwevers, bouwe ûnsjogge en rommelige nêsten yn harren koloanjes. De selskipwevers bouwe grutte mienskiplike nêsten, mei dêryn wol 100 oant 300 aparte keamers foar de pearkes. Moskwevers libje yn famyljeferbannen dy't tegearre briede. De measte soarten nêsten ha ûnder smelle tagongen.

De fûgels binne sosjaal en briede yn koloanjes. Se bouwe de nêsten tegearre foar de beskerming, faak ferskillende nêsten oan ien tûke. Yn 'e regel binne it de mantsjes dy't de nêsten bouwe, om sa mei harren boukeunst de wyfkes te ynteressearjen.

Somtiden wurde weversoarten troch boeren as in pleach beskôge. De readbekwever kin kloften fan hûnderttûzenen fûgels foarmje. De soarte wurdt as de meast foarkommende fûgelsoarte beskôge, mei in rûsde populaasje fan mooglik oardel miljard fûgels.

Skaaien

De famylje bestiet út 15 skaaien mei in totaal fan 122 soarten:

Mienskiplik nêst fan 'e selskipwever.

• breedbekwever Amblyospiza Sundevall, 1850 (ien soarte)
• readkopwevers Anaplectes Reichenbach, 1863 (ien soarte)
• koartsturtwevers Brachycope Reichenow, 1900 (ien soarte)
• buffelwevers Bubalornis Smith, A, 1836 (twa soarten)
• wytkopbuffelwevers Dinemellia Reichenbach, 1863 (ien soarte)
• fjoerwevers Euplectes Swainson, 1829 (17 soarten)
• fodys Foudia Reichenbach, 1850 (sân soarten)
• readsturtwevers Histurgops Reichenow, 1887 (ien soarte)
• swarte readkopwevers Malimbus Vieillot, 1805 (10 soarten)
• selskipwevers Philetairus Smith, A, 1837 (ien soarte)
• moskwevers Plocepasser Smith, A, 1837 (fjouwer soarten)
• wevers Ploceus Cuvier, 1816 (67 soarten)
• groubekwevers Pseudonigrita Reichenow, 1903 (twa soarten)
• readbekwevers Quelea Reichenbach, 1850 (trije soarten)
• snorwevers Sporopipes Cabanis, 1847 (twa soarten)

Ofbylden

• 
  Begjin fan 'e nêstbou.
• 
  Nêst fan moskwever om it hiele jier troch te besetten.
• 
  wevernêsten yn Maleizje.
• 
  Nêst fan 'e skiere groubekwever yn Kenia mei de tagong ûnder.
• 
  Nêst fan gers fan 'e Bengaalske wever, Yndia.
• 
  Nêsten fan bayawevers yn in palmbeam, Yndia.
• 
  Nêst fan selskipwevers.
• 
  súdlike fjoerwever dy't in nêst tusken reid boud, Súd-Afrika.
• 
  Nêsten fan in koloanje Sakalavawevers, Madagaskar.
• 
  Nêsten fan doarpswevers yn in West-Afrikaanske palmbeam.
• 
  Nêst fan 'e súdlike maskerwever, Namymbje.
• 
  Hingjend nêst yn Hargeysa, Somaalje

Ofbylden dy't by dit ûnderwerp hearre, binne te finen yn de kategory Ploceidae fan Wikimedia Commons.