Vitas

Vitas
sjonger en/of muzikant
persoanlike bysûnderheden
echte namme	Vitali Vladasovitsj Gratsjev
nasjonaliteit	Ruslân Oekraïne
berteplak	Daugavpils
etnisiteit	Russysk
wurkpaad
sjenre	popmuzyk, opera, klassyk, folksmuzyk
sjongtaal	Russysk
jierren aktyf	2000-
offisjele webside
en.dimashnews.com

Hantekening.

Vitali Vladasovitsj Gratsjev (Russysk: Виталий Владасович Грачёв; Oekraynsk: Віталій Владасович Грачов, , Daugavpils, Letlân, 19 febrewaris 1979), better bekend ûnder syn ferkoarte foarnamme Vitas (Russysk: Витас), is in Russysk-Oekraynske popsjonger (bariton, falset). Hy is boppedat komponist, akteur en modeûntwerper. As artyst fertsjintwurdiget er troch techno en klassyk beynfloede popmuzyk.

Vitas waard yn 'e iere jierren 2000 yn Ruslân en East-Europeeske lannen bekend en hie letter sûnt 2006 ek in soad súkses yn Aazje. Hy wûn in soad ûnderskiedingen, naam diel oan Russyske en Europeeske festivals en song tegearre mei Demis Roussos en Lucio Dalla.

Bûten Ruslân en Aazje krige er yn 'e jierren 2010 fral op it ynternet bekendheid mei wurk as "Opera #2" en "The 7th Element" (beide fan syn album "Philosophy of Miracle" út 2001) en "Smile!" (fan syn album mei deselde namme út 2002).

Libben

Vitali Vladasovitsj Gratsjev waard yn Daugavpils út Russyske âlders berne yn 'e doetiidske Sovjet-Uny en grutbrocht yn Odessa. Syn heit wie muzikant en syn mem in kostúm-ûntwerper. Vitali's heit hie Litousk-joadske woartels, wylst syn mem Russysk wie. Al gau nei de berte fan harren soan ferhûzen hja nei Odessa. Dêr makke Vitali syn middelbere skoalle ôf. Vitali hie al ier niget oan muzyk en syn pake learde him yn 'e âldens fan fiif te spyljen op 'e akkordeon. Letter sei er dat er al 1000 lieten skreaun hie doe't er tolve wie. Hy besocht in artistike oplieding en waard as jonge al yn ferskillende teäterproduksjes ynset.

As teener keas er de namme Vitas om't er syn eigen namme te lang fûn. Mei't er 21 waard gyng er mei syn takomstige frou Svetlana nei Moskou. Dêr wennen se ynearsten yn earmoede tegearre, oant Vitas bekend waard om syn muzyk.

Wurkpaad

Om 't Vitali gjin tagong krige ta in muzykoplieding yn Odessa en syn heit en mem de sinten net hiene om him nei in priveeskoalle te stjoeren, begûn Vitali as artyst yn nachtklubs te wurkjen. Dêrnjonken fertsjinne er wat by troch op strjitte bôle te ferkeapjen en him út te lienen as fotograaf. Ek wurke er as akteur yn in eksperimenteel teäter. Hy woe graach yn 1997 mei syn lieten meidwaan oan it muzykfestival Chervona rûta, mar waard wegere om't syn repertoire Russysktalich wie. De regionale stjoerder "Elan" makke yn 1999 doe in muzykfideo foar syn liet "Opera #1".

It wie de produsint en manager Sergej Nikolajevitsj Pûdovkin, dy't him yn it teäter ûntduts en frege oft er nei Moskou komme woe. Pûdovkin hie doe noch net syn stim heart. Vitali reizge in wike letter mei syn faam Svetlana fan Odessa nei Moskou.

Om jild te fertsjinjen wurke Vitas by de Russyske jongereinstjoerder TV-6. Hy naam ek in opfallende fideoklip op foar "Opera #2", dêr't er himsels as in eksintrike iensume man yn in tobbe delsette en neaken akkordeon spile. De klip gie desimber 2000 yn premjêre en de man mei syn ûngewoan hege, krêftige en opfallende falsetstim krige in soad publyk omtinken.

It earste studioalbum "Philosophy of Miracle" waard yn 2001 útbrocht. Ek begûn Vitali dat jier mei de earste grutte toer troch Ruslân, folge troch optredens yn Chicago (23 maart) en New York (24 maart). Op 29 maart 2002 wie syn earste optreden yn it útferkochte Steatspaleis fan it Kremlyn, kompleet mei eftergrûnkoar en in tradisjoneel orkest. Hy skreau dêrmei skiednis as jongste artyst dy 't dêr as solist in foarstelling joech.

Syn twadde soloprogramma "The Songs of My Mother" waard opdroegen oan syn mem, dy't yn 2001 ferstoar. Vitas hie it dêr slim mei te krijen en hy koe hast in jier lang net wurkje, sjonge en dûnsje. Nei oanlieding fan har dea waarden twa albums útjûn. Op it album "The Songs of My Mother" stiene bekende, tradisjonele Russyske lieten, wylst op it album "Mama" nûmers stiene dy't troch him sels of foar him komponearre wiene. Tsjin de ein fan 2002 krige Vitas in útnoeging fan Lucio Dalla, de komponist fan "Caruso", om dat liet mei him yn it Steatspaleis fan it Kremlyn te sjongen.

Fan maart 2003 oant febrewaris 2007 joech er 264 konserten yn Ruslân, Austraalje, de Feriene Steaten, Kanada, Israel, Dútslân, Kazachstan, de Baltyske Steaten, Georgje, Tadzjikistan, Oekraïne en Wyt-Ruslân. Njonken syn sjongkarriêre spile er ek yn in misdaadsearje, dêr't er de popsjonger spile mei in ûngewoan hege stim. Hy spile ek noch in rol yn in komedy.

Yn juny 2006 waard Vitas troch China Central Television útnoege om oan it programma "The Year of Russia" yn Peking diel te nimmen, dêr't er syn hits "Star" en "Opera #2" song. Dat betsjutte it begjin fan syn populêrens yn Sina.

Vitas tekene yn 2007 in kontrakt mei it Amerikaanske label Gemini Sun Records, dy't it album "Audio Visual Connect Series" as CD en DVD útjoech. Yn 2008 brocht Vita "Light of A New Day" út, in nûmer fan 40 minuten mei net-lyryske fokalisaasje en ynstrumintaasje.

Yntusken wie Vitas sa populêr yn Sina, dat er op 9 augustus 2008 yn Qingdao syn nûmer "Opera #1" mocht útfiere by de iepeningsseremoanje foar de wettersporten op 'e Olympyske Simmerspullen dat jier. Vitas spile ek de rol fan Gude yn 'e Sineeske film Hua Mulan, dy't op 16 novimber 2009 yn Peking yn premjêre gie. Ek naam er muzyk op foar de soundtrack fan 'e film. Ek yn 'e jierren dêrnei soe er noch in pear kear yn Sineeske filmproduksjes spylje, wylst er yn 2013 troch Dútslân toerde.

Syn 20-jierrich jubileum as artyst fierde Vitas troch yn 2019 in nije konsertrige te jaan. Hy wurke mei de Australyske DJ en produsint Timmy Trumpet gear mei it liet "The King" foar in optreden op it festival Tomorrowland yn Belgje. Tegearre presintearren hja in nij remix fan "The 7th Element" en in mienskiplik nûmer op it tema "Yn 'e Hal fan 'e Berchkening" fan Edvard Grieg. It fyftjinde album "Bit Bombit" kaam yn 2019 út.

De Covid-19 pandemy makke in ein oan it toeren fan Vitas en dêrnei die er foar in skoft allinne noch optredens yn Ruslân. Sûnt maart 2022 loek er him út de publisiteit werom om him allinne oan syn famylje te wijen.

Privee

Vitali hat sawol in Oekraynsk as in Russysk paspoart. Hy is troud mei Svetlana Grankovska yn 2006 yn Odessa. Hja krigen yn 2008 in dochter, yn 2015 in soan en yn 2021 wer in dochter. HY hat selden interviews jûn, itjinge fral te meitsjen hie mei syn producer Pûdovkin. Nei 2010 waard Vitas mear iepen nei de parse en yn jannewaris 2012 wie der foar it earst in lang interview mei in Russysk praatprogramma. Ek kaam it publyk doe foar it earst yn 'e kunde mei syn frou en dochter.

Diskografy

Studio albums

Russyske titel	Ingelske titel	Jier
Философия чуда	Philosophy of Miracle	2001
Улыбнись	Smile!	2002
Мама	Mama	2003
Песни моей мамы	The Songs of My Mother	2003
Поцелуй длиною в вечность	A Kiss as Long as Eternity	2004
Возвращение домой	Return Home	2006
Криком журавлиным. Возвращение домой, Часть 2	Crane's Crying: Return Home, Part 2	2007
Хиты ХХ века	20th Century Hits	2008
**	Audio Visual Connect Series: Vitas (CD + DVD)	2008
Скажи, что ты любишь	Say You Love	2009
Шедевры трех веков	Masterpieces of Three Centuries	2010
Романсы	Romances	2011
Мама и Сын	Mother and Son	2011
Только ты. История моей любви, Часть 1	Only You: My Love Story, Part 1	2013
Я подарю тебе весь мир. История моей любви, Часть 2	I'll Give You the World: My Love Story, Part 2	2014
**	Come Just For You!	2016
**	Made in China	2016
Бит бомбит	Bit Bombit	2019

Singles en EP's

Orizjineel	Ingelsk	Jier
Опера #2	Opera #2	2001
Good Bye	**	2001
Свет Нового Дня	Light of a New Day	2008
真童话	Fairy Tale	2010
That Song (Remix fan 7th Element troch Drangabeats	**	2015
Делю любовь на доли	I Divide Love Into Shares	2015
Roll With The Beat	**	2018
Opera #2 (HD)	**	2018
Back to the Stars	**	2020
За ней	After Her	2020
无词歌	Song Without Words	2020
向着太阳 (mei Elvis Wang)	Towards the Sun	2020
"The King"	**	2020
OPERA20	**	2020

DVDs

Russyske titel	Ingelske titel	Jier
Витас в Кремле	Vitas at the Kremlin	2002
Песни моей мамы	The Songs Of My Mother	2003
Лучшее от Витаса на DVD	The Best from Vitas on DVD	2007
Возвращение Домой в Санкт-Петербурге	Return Home in Saint Petersburg	2007
Возвращение домой в Москва	Return Home in Moscow	2007
Бессонная ночь Петербург	Sleepless Night in Saint Petersburg	2010
Две столицы	Two Capitals	2011
Лучшее от Витаса на DVD (2)	The Best from Vitas on DVD (2) 2011
Мама и сын	Mommy and Son	2013
Лучшее от Витаса на DVD (3)	The Best from Vitas on DVD (3)	2014

Filmografy

Jier	Titel	Rol
2001	Vitas: The 7th Element
2002	Evlampiya Romanova (1e episoade)
2009	Hua Mulan	Gude
2011	Jian dang wei ye	Grigori Voitinski
2012	A Night to Be a Star	himsels

Boarnen, noaten en referinsjes

Boarnen, noaten en/as referinsjes:

Dit is foar in part in oersetting fan 'e Ingelsktalige wikipedy, sjoch foar boarnen/referinsjes en:Vitas Commons Wikimedia Commons  Ofbylden dy't by dit ûnderwerp hearre, binne te finen yn de kategory Vitas fan Wikimedia Commons.