The King's Man

	The King's Man
	film
	(Filmposter yn 'e Ingelske Wikipedy)
	makkers
regisseur	Matthew Vaugh
produsint	Matthew Vaugh; David Reid; Adam Bohling
senario	Matthew Vaughn; Dave Gibbons
basearre op	The Secret Service ; fan Mark Millar
kamerarezjy	Ben Davis
muzyk	Matthew Margeson; Dominic Lewis
filmstudio	Marv Studios; Cloudy Productions; 20th Century Studios; TSG Entertainment
distribúsje	20th Century Studios
	spilers
haadrollen	Ralph Fiennes; Harris Dickinson
byrollen	Charles Dance; Rhys Ifans; Djimon Hounsou; Gemma Arterton; Matthew Goode; Daniel Brühl
	skaaimerken
lân/lannen	Feriene Keninkryk; Feriene Steaten
premiêre	5 desimber 2021
foarm	langspylfilm
sjenre	histoaryske spionaazje- ; en aksjefilm
taal	Ingelsk
spyltiid	131 minuten
	budget en resultaten
budget	$95 miljoen
opbringst	$126 miljoen
	filmsearje
filmsearje	Kingsman
● foarich diel	Kingsman: The Golden Circle
● folgjend diel	The King's Man: The Traitor King

The King's Man is in Britsk-Amerikaanske histoaryske spionaazje- en aksjefilm út 2021 ûnder rezjy fan Matthew Vaughn. Dizze film ferwringt de skiednis sa dat er boppedat ta it fantasy-subsjenre fan 'e alternate history rekkene wurde moat. De haadrollen wurde fertolke troch Ralph Fiennes en Harris Dickinson, mei Charles Dance, Rhys Ifans, Djimon Hounsou, Gemma Arterton, Matthew Goode en Daniel Brühl yn 'e wichtichste byrollen. De titel betsjut "De Keningsman".

The King's Man heart ta de filmsearje Kingsman en is in prequel fan 'e foargeande dielen Kingsman: The Secret Service (2014) en Kingsman: The Golden Circle (2017). It ferhaal giet oer de oarsprong fan 'e private geheime tsjinst Kingsman en folget de pasifistyske Ingelske ealman Orlando hartoch fan Oxford. Dyselde komt ûnder de Earste Wrâldoarloch in geheim genoatskip op it spoar dat de oarloch mei opsetsin feroarsake hat en oan 'e gong hâldt. Yn 'e mande mei syn soan Conrad, syn butler Shola en syn gûvernante Polly set Oxford útein mei in misje om 'e doelen fan 'e gearspanners te dwerseidzjen en de oarloch te beëinigjen.

Fan 'e filmkritisy krige The King's Man mingde oant negative resinsjes. Yn 'e bioskopen wie de film in beskieden kommersjeel súkses, mar as men de marketingkosten meirekkenet, kaam The King's Man úteinlik net út 'e reade sifers. Nettsjinsteande dat is der anno 2024 in ferfolch yn produksje, dat The King's Man: The Traitor King komme moat te hjitten.

Plot

Yn 1902 bringe de pasifistyske Ingelske ealman Orlando hartoch fan Oxford, syn frijfochten frou, hartoginne Emily, en harren jonge soan Conrad in besyk oan ien fan 'e Britske konsintraasjekampen yn Súd-Afrika. Dêr wurde yn 'e Twadde Boere-oarloch ûnder erbarmlike omstannichheden Afrikaner froulju, bern en âlden fan dagen finzen holden, sadat se de guerriljastriders út 'e Boererepubliken Transfaal en de Oranje-Frijsteat net ûnderstypje kinne. De Oxfords bringe iten en medisinen fan it Reade Krús, en de hartoch moetet yn it kamp syn âlde freon generaal Herbert Kitchener. As in Boere-slûpskutter it kamp ûnder fjoer nimt om Kitchener te deadzjen, rekket er by fersin hartoginne Emily. Wylst hja yn it stjerren leit, twingt se har man in ûnthjit ôf om harren soan Conrad te beskermjen tsjin elts gefaar.

Tolve jier letter hat Oxford in spionnerûnte opset besteande út leden fan it tsjinstfolk yn eltse wichtige haadstêd yn 'e wrâld. Mei de ynformaasje dy't de leden fan syn netwurk foar him garje, hopet er foar te kommen dat der ea wer in grutte oarloch útbrekke sil. Syn soan Conrad sjocht de wrâld lykwols folslein oars. Hy wol krekt graach yn it Britske Leger gean om him op it slachfjild te bewizen. Dêr stekt syn heit lykwols in stokje foar troch him soks te ferbieden salang't er noch minderjierrich is. Boppedat bepraat er Kitchener, dy't no de Britske minister fan Oarloch is, om Conrad net yn it leger ta te litten.

Op fersyk fan Kitchener geane Oxford en Conrad yn op in útnûging dy't se ûntfongen hawwe fan aartshartoch Frâns Ferdinand, de troanopfolger fan Eastenryk-Hongarije. Sadwaande nimme se diel oan it besyk fan Frâns Ferdinand yn juny 1914 oan Sarajevo, yn it troch Eastenryk besette Bosnje. Se binne oanwêzich wannear't de nasjonalistyske Serf Gavrilo Princip by in moardoanslach Frâns Ferdinand en syn frou Sofy fan Hohenberg deasjit. Dat barren liedt ta it útbrekken fan 'e Earste Wrâldoarloch.

Tink derom: Yn de tekst hjirûnder wurdt de ôfrin fan de film beskreaun.
As jo de film sels sjen wolle, is it mooglik better dat jo it no folgjende diel fan 'e plotbeskriuwing (earst noch) net lêze.

Troch syn spionnenetwurk komt Oxford geandewei oan 'e weet dat it útbrekken fan sa'n grutte oarloch gjin ûngelokkigge gearrin fan omstannichheden wie, mar mei opsetsin útlokke waard troch in geheim genoatskip, dat himsels oantsjut as "de Keppel". Princip hearde dêrta en itselde jildt foar ferskate neiste adviseurs fan keizer Wilhelm II fan Dútslân, tsaar Nikolaas II fan Ruslân en kening George V fan it Feriene Keninkryk. De Keppel stiet ûnder lieding fan in mysterieuze man, "de Hoeder", waans úteinlike doel is om ûnôfhinklikheid te winnen foar syn heitelân Skotlân troch de Britske, Frânske, Dútske, Eastenryksk-Hongaarske en Russyske riken inoar op it slachfjild deabliede te litten. Syn trewanten litte har liede troch har eigen doelen, dy't benammen it garjen fan macht en rykdom omfiemje.

Yn opdracht fan 'e Hoeder, dy't Ruslân fan it striidtoaniel ôffiere wol sadat Dútslân Ingelân ferneatigje kin, fergiftiget de mûnts Grigori Raspûtin, in riedsman fan tsarina Aleksandra, de tsarevitsj Aleksej, de syklike soan en erfgenamt fan tsaar Nikolaas. Dêrnei sjantearret er de tsaar om syn lân út 'e oarloch werom te lûken as er wol dat Raspûtin it jonkje genêst, wat er op wûnderbaarlike wize docht nei't de tsaar tasein hat te dwaan wat fan him frege wurdt. Foarst Feliks Jûsûpov, in neef fan Conrad, stiet dy gong fan saken net en ljochtet Conrad yn oer syn fertinkings tsjin Raspûtin. Conrad jout dy ynformaasje troch oan Kitchener en dy syn adjudant, majoar Max Morton. Dy beiden sette yn in kruser fan 'e Britske Keninklike Marine ôf nei Ruslân, mar op 'e Noardsee wurdt harren skip, de de HMS Hampshire, ta sinken brocht troch in Dútske ûnderseeër, wêrby't alle opfarrenden omkomme.

Nei't de deatynge fan Kitchener de hartoch fan Oxford berikt, set dy mei Conrad en mei syn swarte butler Shola en syn gûvernante Polly Wilkins, dy't syn neiste meiwurkers binne, yn it stee fan Kitchener ôf nei Ruslân. It fjouwertal wennet in krystdiner yn it paleis fan foarst Jûsûpov by, dêr't Raspûtin ek oanwêzich is. Nei't se him mei in ferlechje by de oare gasten wei lokke hawwe, besykje se him út 'e wei te romjen, earst troch him te fergiftigjen, dêrnei troch him dea te stekken en dan troch him te ferdrinken. Raspûtin, dy't wier oer boppenatuerlike fermogens liket te beskikken, is lykwols net dea te krijen, dat nei in ôfgryslik gefjocht tusken him en Oxford, Conrad en Shola is it úteinlings Polly dy't him út 'e ljochten helpt troch him troch de holle te sjitten.

Om foar te kommen dat de Feriene Steaten har mei de oarloch bemuoie sille, bepraat Erik Jan Hanussen, de neiste riedsman fan keizer Wilhelm II fan Dútslân, syn master om Meksiko oan te setten ta in ynvaazje fan it Amerikaanske Súdwesten. It berjocht fan dy strekking tusken it Dútske regear yn Berlyn en de Dútske ambassade yn Meksiko-Stêd, it saneamde Zimmermann-tillegram, wurdt ûnderskept troch de Britske ynljochtingetsjinsten, mar de kodearring liket ûnbrekber. Oxford wit in kopy fan 'e tekst te bemachtigjen en it slagget Polly om 'e koade te ûntsiferjen. Neitiid spilet Oxford de tekst fan it tillegram fia kening George V sels werom nei de Britske ynljochtingestsjinsten, yn 'e folle oertsjûging dat it iepenbier meitsjen fan 'e tekst de Amerikaanske presidint Woodrow Wilson ta in oarlochsferklearring oan Dútslân bringe sil. Mar Wilson fynt de ynhâld fan it tillegram sa fiersocht, dat er fermoedet dat it om in ferfalsking giet.

De oerwinning fan Oxford-en-dy, om Ruslân troch de dea fan Raspûtin yn 'e oarloch te hâlden, is fan koarte doer. De Hoeder skeakelet in oar lid fan syn Keppel yn om 'e grizelige mûnts te ferfangen. Dêrby giet it om Vladimir Iljitsj Lenin, dy't yn opdracht fan 'e Hoeder de Russyske Revolúsje útfiert, tsaar Nikolaas II twingt om troansôftstân te dwaan en letter de tsaar en syn hiele húshâlding fermoardzje lit. Under it nije bolsjewistyske regear lûkt Ruslân him dochs werom út 'e oarloch. It wurdt sadwaande nammenste wichtiger dat de Feriene Steaten harren stipe efter it Feriene Keninkryk en de oare Alliëarden smite.

Underwilens is Conrad mearderjierrich wurden en kin Oxford syn soan net mear út it Britske Leger hâlde. De jonge folget in troch de oarlochssitewaasje ferkoarte oplieding ta ofsier en komt by de Grenadier Guards te tsjinjen. As freonetsjinst oan syn heit beävensearret kening George V lykwols dat er yn Londen legere wurdt ynstee fan dat er nei it front stjoerd wurde sil. Conrad, dy't yn dy feilige stasjonearring de ynfloed fan syn heit sjocht, siket yn argewaasje syn taflecht ta drastyske maatregels: hy jout Archie Reid, in sljochtwei soldaat fan de Black Watch, befel om mei him fan militêr unifoarm en identiteit te wikseljen, sadat er mei de rest fan dat Skotske rezjimint nei it Westfront yn Frankryk gean kin. Reid stjoert er mei berjocht oer wat er dien hat nei syn heit ta.

Yn 'e momkape fan Archie Reid jout Conrad himsels fuortendaliks op as der, koart nei de oankomst fan it rezjimint oan it front, frege wurdt om frijwilligers. Hy moat yn it nimmenslân tusken de rinfuorgen de ynformaasje ophelje dy't in Britske spion by him droech. De man besocht fan 'e Dútske nei de Alliëarde kant oer te stekken mar helle it net. Conrad is de iennichste fan it groepke frijwilligers dy't in gefjocht yn it nimmenslân oerlibbet. Hy treft dêr neitiid de Britske spion libben oan, hoewol't er ien fan syn skonken kwytrekke is. Mei de spion oer it skouder besiket Conrad werom te kommen nei de Alliëarde liny. Dat slagget him ek, hoewol't de spion it net oerlibbet. As Conrad de ynformaasje fan 'e man besiket troch te jaan oan in ofsier, lûkt er lykwols de oandacht fan in freon fan 'e wiere Archie Reid. Dy nimt oan dat Conrad in Dútske spion is dy't syn freon fermoarde hat om syn plak yn te nimmen. Sûnder noch op útlis te wachtsjen, sjit er Conrad op slach dea.

It omkommen fan syn soan is in swieren slach foar de hartoch fan Oxford, dy't djip weirekket yn in depresje. It feit dat de ynformaasje dy't Conrad út it nimmenslân werombrocht hat, de autentisiteit fan it Zimmermann-tillegram befêstiget, jout him gjin treast. It helpt trouwens ek net, want presidint Wilson wegeret om ûnferklearbere redens noch altyd om syn lân yn 'e oarloch te belûken. Nei't Polly op ûnotterdokse wize Oxford der wer by skuord hat, komt de hartoch fan 'e Amerikaanske ambassadeur yn Londen oan 'e weet dat presidint Wilson sjantearre wurdt om syn lân bûten de oarloch te hâlden. Dat wurdt dien troch Mata Hari, dy't Wilson yn opdracht fan 'e Hoeder ferlaat hat ta it bedriuwen fan oerhoer en dat filme hat. Oxford nimt Mata Hari finzen en ûnderfreget har oer it plak dêr't se de negativen fan 'e film brocht hat, mar hja wegeret wat te sizzen.

Oan 'e hân fan har djoere sjaal fan in tige spesifyk soarte kashmir identifisearret de hartoch lykwols wêr't it haadkertier fan 'e Keppel fêstige is. Yn 'e oertsjûging dat de negativen fan 'e film dêr perfoarst bewarre wurde sille, set er der mei Shola en Polly hinne. It haadkertier is fêstige op in steile rjotspjuts dy't bewenne wurdt troch de Hoeder en syn keppel geiten. Op spektakulêre wize krije Oxford en Shola tagong ta de hege rots, dêr't se ôfweve mei de skyldwachten fan 'e Hoeder en dêrnei it gefjocht oangeane mei dy mysterieuze man sels. It docht bliken dat it nimmen oars is as Morton, de adjudant fan Kitchener, fan wa't oannommen waard dat er mei de minister omkommen wie. Mei help fan Shola (en fan in earder troch Morton tramtearre geitebok dy't op wraak sint) wit Oxford syn fijân te ferslaan en fan 'e rotspjuts te smiten, dat er tepletter falt. Polly hat ûnderwilens de negativen fan it filmke fan Mata Hari weromfûn, dy't oan presidint Wilson taspile wurde. Nei't dy de negativen ferbaarnd hat, bringt er de Feriene Steaten oan 'e kant fan 'e Alliëarden yn 'e oarloch. Fan gefolgen moatte Dútslân en de oare Sintralen dan al rillegau belies jaan.

Yn 1920 keapet Oxford de Kingsman-kleanwinkel oan Saville Row yn Londen, sadat er dy as front brûke kin foar de private geheime tsjinst Kingsman. Dy organisaasje rjochtet er op om derfoar te soargjen dat der nea wer in wrâldoarloch útbrekke kin. Syn mei-oprjochters binne Shola, Polly, Archie Reid, kening George V en Walter Hines Page, de Amerikaanske ambassadeur yn it Feriene Keninkryk. Elts fan harren kriget in koadenamme út 'e Arthurleginden taparte as hulde oan Conrad Oxford, dy't as bern sa fan dy ferhalen hold.

Yn in sêne dy't healwei de ôftiteling tafoege is, docht bliken dat Erik Jan Hanussen nei de dea fan Morton de lieding oer de Keppel oernommen hat. Hy bringt de kommunist Lenin yn 'e kunde mei in oare agint fan it geheime genoatskip dy't oan 'e ekstreem-rjochtse kant fan it politike spektrum tsjinwicht oan him biede moat: Adolf Hitler.

Rolferdieling

haadrollen

personaazje	akteur/aktrise
Orlando hartoch fan Oxford	Ralph Fiennes
Conrad Oxford	Harris Dickinson

byrollen

personaazje	akteur/aktrise
generaal (en letter minister) Herbert Kitchener, 1e greve Kitchener	Charles Dance
Grigori Raspûtin	Rhys Ifans
Shola	Djimon Hounsou
Polly Wilkins	Gemma Arterton
Max Morton / de Hoeder	Matthew Goode
Erik Jan Hanussen	Daniel Brühl
Mata Hari	Valerie Pachner
kening George V fan it Feriene Keninkryk	Tom Hollander
Emily hartoginne fan Oxford	Alexandra Maria Lara
Archie Reid	Aaron Taylor-Johnson
Vladimir Iljitsj Lenin	August Diehl
tsaar Nikolaas II fan Ruslân	Tom Hollander
tsarina Aleksandra fan Ruslân	Branka Katić
keizer Wilhelm II fan Dútslân	Tom Hollander
Gavrilo Princip	Joel Basman
aartshartoch Frâns Ferdinand fan Eastenryk	Ron Cook
presidint fan 'e Feriene Steaten Woodrow Wilson	Ian Kelly
Rita	Alison Steadman
sersjant-majoar Atkins	Robert Aramayo
reuseftige skyldwacht by lift	Olivier Richters
Adolf Hitler	David Kross
Walter Hines Page, Amerikaansk ambassadeur yn it Feriene Keninkryk	Stanley Tucci (cameo)

Produksje en distribúsje

Produksje

De produksje fan The King's Man, in prequel fan 'e eardere Kingsman-films Kingsman: The Secret Service (2014) en Kingsman: The Golden Circle (2017), waard 2018 oankundige. Oarspronklik soe de film Kingsman: The Great Game hjitte, mar yn juny 2019 waard besletten om der The King's Man fan te meitsjen. De film waard regissearre troch Matthew Vaugh nei in senario fan himsels en Dave Gibbons op basis fan it stripboek The Secret Service fan Mark Millar (dat letter omneamd waard ta Kingsman). Vaughn putte nei eigen sizzen fierdere ynspiraasje út 'e aventoerefilm The Man Who Would Be King (1975), mei yn 'e haadrollen Sean Connery en Michael Caine en basearre op in koart ferhaal fan Rudyard Kipling.

As produsinten wiene Vaughn, David Reid en Adam Bohling by it projekt belutsen foar de filmstudio's Marv Studios, Cloudy Productions, 20th Century Studios en TSG Entertainment. Dêrmei wie it in Britsk-Amerikaanske ko-produksje. Foar The King's Man wie in budget beskikber fan $95 miljoen. De kamerarezjy wie yn 'e hannen fan Ben Davis, en de filmmuzyk waard fersoarge troch Matthew Margeson en Dominic Lewis.

Opnamen

De opnamen foar The King's Man setten op 22 jannewaris 2019 útein. Der waard filme op lokaasje yn it Feriene Keninkryk en yn Itaalje. Benammen de stêd Turyn en omkriten yn 'e regio Piëmont wie in wichtige opnamelokaasje. Dêr waarden sênes opnommen yn û.m. it Paleis fan Venaria, it Jachtpaleis fan Stupinigi en oan 'e igge fan 'e rivier de Po. In oare Italjaanske opnamelokaasje wie it Kastiel fan Racconigi.

Distribúsje

De distribúsje fan The King's Man waard fersoarge troch 20th Century Studios. Oarspronklik soe de film útbrocht wurde op 8 novimber 2019, mar troch fertraging fan 'e produksje waard dy datum ferskate kearen opskood. Dêrnei soargen de beheinings oan bioskoopbesyk y.f.m. de lockdowns ûnder de koroanapandemy foar fierdere fertraging. Uteinlings gie de film op 5 desimber 2021 yn Londen yn premiêre, en iepene dêrnei op 22 desimber yn 'e Amerikaanske bioskopen en op 26 desimber yn dy yn it Feriene Keninkryk.

It byhearrende soundtrackalbum ferskynde op 22 desimber 2021 by platemaatskippij Hollywood Records. The King's Man waard op 22 febrewaris 2022 útbrocht op dvd en blu-ray. Fan 9 febrewaris fan dat jier ôf wie de film ek te sjen fia de streamingtsjinst Disney+, fan 18 febrewaris ôf fia HBO Max en Hulu en fan 2 maart ôf fia Star+.

Untfangst

Fan 'e filmkritisy krige The King's Man mingde oant negative resinsjes. Op 'e webside Rotten Tomatoes, dy't resinsjes sammelet, hat de film in ûndergemiddeld goedkarringspersintaazje fan 41%, basearre op 181 ûnderskate resinsjes. De konsensuskrityk fan 'e webside, gearstald út al dy resinsjes, stelt: "De solide haadrol fan Ralph Fiennes yn The King's Man wurdt besmodzge troch de delgong fan dizze tonaal betize prequel nei aksjeskrillermidsmjittigens." Op Metacritic, de wichtichste konkurrint fan Rotten Tomatoes, behellet The King's Man in goedkarringspersintaazje fan 44%, basearre op 40 resinsjes. Bioskoopgongers dy't nei it sjen fan 'e film oer harren ûnderfinings befrege waarden troch CinemaScore, joegen The King's Man trochinoar in 8⁺ op in skaal fan 1 oant 10.

Historisiteit

Hoewol't der yn The King's Man gâns histoaryske foarfallen foarkomme, binne dy oer it algemien op subtile (of net sa subtile) wize ferwrongen of út har ferbân skuord. It is dêrom de baas om neat dat men yn dizze film sjocht foar wier oan te nimmen.

Resultaat

The King's Man brocht yn 'e bioskopen yn 'e Feriene Steaten en Kanada $37,2 miljoen op, en yn alle oare lannen en territoaria $88,8 miljoen. Wrâldwiid kaam de opbringst dêrmei út op $126,0 miljoen. Ofset tsjin it budget fan $95 miljoen betsjut dat in beskieden winst fan $31 miljoen. Mar om't de (mânske) marketingkosten dêr noch fan ôflutsen wurde moatte, kaam The King's Man eins net út 'e reade sifers en moat de film as in flop beskôge wurde.

Direkt ferfolch

Nettsjinsteande it teloarstellende resultaat fan The King's Man, makke regisseur en produsint Matthew Vaughn yn oktober 2023 bekend dat der in direkt ferfolch yn produksje nommen wie, dat The King's Man: The Traitor King komme moat te hjitten. Yn dy film sille de (oerlibjende) haadpersoanen út The King's Man weromkeare om it op te nimmen tsjin 'e fiksjonalisearre opkomst fan Adolf Hitler en nazy-Dútslân yn in nij alternate history-ferhaal.

Keppelings om utens

Boarnen, noaten en referinsjes

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side.