The Equalizer 3

The Equalizer 3
film
(Filmposter yn 'e Ingelske Wikipedy)
makkers
regisseur	Antoine Fuqua
produsint	Todd Black Jason Blumenthal Denzel Washington Antoine Fuqua Steve Tisch Clayton Townsend Alex Siskin Tony Eldridge
senario	Richard Wenk
kamerarezjy	Robert Richardson
muzyk	Marcelo Zarvos
filmstudio	Columbia Pictures Eagle Pictures Escape Artists Zhiv Productions
distribúsje	Sony Pictures Releasing
spilers
haadrollen	Denzel Washington
byrollen	Andrea Scarduzio Andrea Dodero Dakota Fanning Remo Girone Eugenio Mastrandrea
skaaimerken
lân/lannen	Feriene Steaten Itaalje Austraalje
premiêre	28 augustus 2023
foarm	langspylfilm
sjenre	aksjeskriller
taal	Ingelsk Italjaansk
spyltiid	109 minuten
budget en resultaten
budget	$70 miljoen
opbringst	$191,1 miljoen
filmsearje
filmsearje	The Equalizer
● foarich diel	The Equalizer 2

The Equalizer 3 is in Amerikaansk-Italjaansk-Australyske aksjeskriller út 2023 ûnder rezjy fan Antoine Fuqua, mei yn 'e haadrol Denzel Washington. De titel betsjut "De Gelykmakker 3". It is it trêde diel yn 'e filmsearje fan Fuqua en Washington nei The Equalizer út 2014 en The Equalizer 2 út 2018. It ferhaal folget de eardere geheim agint Robert McCall, dy't tramtearre wurdt troch syn ferline en besiket om 'e misdieden dy't er yn opdracht fan syn oerhearrigen begien hat, goed te meitsjen troch as figilante de kriminaliteit te bestriden. Nei't er op in misje swierferwûne rekke is, betteret er op yn in doarp yn súdlik Itaalje, dêr't er einlings syn plak fûn liket te hawwen. Wannear't er foar it ferstân kriget dat de ynwenners yntimidearre en ôfparse wurde troch de maffia, besiket er earst de oare kant út te sjen. Mar de maffiosi begripe net mei wa't se fan dwaan hawwe, en provosearje him oant er úteinlings op gewelddiedige wize regaad meitsje moat. The Equalizer 3 krige fan 'e filmkritisy oer it algemien positive resinsjes en wie yn 'e bioskopen in beskieden kommersjeel súkses.

Plot

Op in ôfhandige wynmakkerij op Sisylje komme de troch yllegale aktiviteiten ryk wurden cyberkrimineel Lorenzo Vitale en syn jonge pakesizzer thús en ûntdekke dat ferskate bewekkers fan harren filla deasketten binne. Vitale lit it jonkje yn 'e auto efter en giet sels deryn, dêr't er in spoar fan liken fan syn trewanten folget nei de wynkelder. Dêr wurdt in swarte Amerikaanske man ûnder skot holden troch de lêste trije bewekkers. Vitale wit it net, mar it is Robert McCall, in earder geheim agint dy't de grouwélige dingen dy't er yn opdracht fan syn superieuren dien hat, goed besiket te meitsjen troch no as figilante de misdie te bestriden. McCall fertelt Vitale dat er himsels wat ta-eigene hat dat net fan him is, en dat hy (McCall) kommen is om it werom te nimmen. Hy jout Vitale de kâns om mei te wurkjen, mar dêr hat Vitale gjin belangstelling foar. Yn in hommelse eksploazje fan geweld deadet McCall dan de trije lêste trewanten fan Vitale, folge troch Vitale sels. Hy pakt in kaairing mei kaaien fan 'e mulrym fan 'e krimineel en giet dêrmei djipper de kelder yn.

Wannear't McCall de wynmakkerij ferlit, sjocht er de pakesizzer fan Vitale yn 'e auto sitten. Hy hjit it jonkje om dêr te bliuwen en rint nei syn eigen auto. It jonkje harket lykwols net nei him en pakt ynstee it jachtgewear op dat njonken it lyk fan ien fan 'e bewekkers leit. Dêrmei sjit er McCall yn 'e rêch. Wannear't McCall him omdraait, naait it jonkje gau-gau út. McCall is swierferwûne rekke en beseft dat er it net oerlibje sil sûnder nei it sikehûs te gean, wat er net wol om't syn fijannen him dêr fine sille. Hy nimt yn omtinken om selsmoard te dwaan en set sels de loop fan syn pistoal tsjin 'e holle oan, mar sjocht dêr úteinlings fan ôf. Hy riidt nei Messina en nimt dêr de fearboat nei it Italjaanske fêstelân. Wannear't er oeren letter by nacht yn Kampaanje in wei by de Amalfikust lâns folget, set er de auto oan 'e kant en ferliest er it bewustwêzen.

McCall wurdt fûn troch in pleatslike carabiniere (in Italjaanske plysjeman), Gio Bonucci, dy't him yn syn wenplak, it doarpke Altamonte, by de pleatslike hûsdokter bringt. De dokter, Enzo Arisio, seit dat Bonucci der goed oan dien hat dat er McCall by him brocht hat, om't er de lange rit nei it neiste sikehûs net mear oerlibbe hawwe soe. De dokter hellet de hagelkerlen út 'e rêch fan McCall en fersoarget syn wûnen. Nettsjinsteande it oerdúdlike bewiis dat soks net wier is, seit Arisio tsjin Bonucci dat McCall ferwûne rekke is troch in fal en dat Bonucci dit gefal as sadanich yn syn offisjele rapporten werjaan moat. De ynfloed fan 'e dokter is sa grut dat de carabiniere dermei ynstimd om it by dat ferhaal te hâlden. Wannear't McCall de oare deis wer by besleur komt, is ien fan 'e earste fragen dy't dokter Arisio him stelt oft er in goedenien of in ferkeardenien is. McCall antwurdet dat er dat net wit. Dat is foar Arisio de befêstiging dat er mei in goede man fan dwaan hat, om't in ferkeardenien altyd antwurde hawwe soe dat er in goede man is.

Tink derom: Yn de tekst hjirûnder wurdt de ôfrin fan de film beskreaun. As jo de film sels sjen wolle, is it mooglik better dat jo it no folgjende diel fan 'e plotbeskriuwing (earst noch) net lêze.

It duorret wiken ear't McCall wer opbettere is. Hy bringt trije dagen op bêd troch, mar dêrnei begjint er om te rinnen, wêrby't er himsels ûnderstipet mei de gongelstôk fan 'e dokter syn heit silger. Earst beheint er syn bewegings ta it hûs en de tún, mar al rillegau set er it doarp yn. Altamonte leit oan 'e kust en is boud op in stikmannich rotsige heuvels. Der binne sadwaande likefolle treppen as smelle, faak steil oprinnende of deldragende strjitsjes. Dat makket dat de kuiertochten McCall yn 't earstoan swier falle, mar stadichoan wint er syn krêft werom en nimt de pine fan syn genêzende wûnen ôf. Yn dy tiid komt er yn 'e kunde mei de doarpsbewenners, ûnder wa dokter Arisio, carabiniere Bonucci, dy syn jonge dochterke Gabriella, de fiskboer Angelo en de kafeehâldster Aminah. McCall begjint om it doarp en syn ynwenners te jaan.

Mei in net-trasearbere mobile tillefoan skillet McCall anonym Emma Collins op, in spesjaal aginte by de Amerikaanske feilichheidstsjinst CIA, om har in tip te jaan oer de wynmakkerij fan Vitale. Wannear't Collins, har baas Frank Conroy en in team fan 'e CIA yn gearwurking mei de carabinieri in hûssiking útfiere, ûntdekke se it bloedbad dat McCall dêr oanrjochte hat. Yn in ôfsletten klûs yn 'e wynkelder ûntdekke se foar miljoenen euro's oan kontant jild, mar ek in ûnbidige hoemannichte fenetyllinetabletten, in tige gefaarlike en ferslaavjende drug dy't produsearre wurdt troch de islamistyske terroristen fan 'e saneamde Islamityske Steat yn noardeastlik Syrje. De CIA kriget foar it ferstân dat der in konneksje bestiet tusken IS en de Italjaanske maffia dy't oant no ta folslein ûnder de radar bleaun wie.

Collins folget it spoar fan McCall fan 'e wynmakkerij fan Vitale nei de fearboat yn Messina, dêr't se syn hierauto identisearret oan 'e hân fan bylden fan befeiligingskamera's yn 'e fearboatterminal. Dêrnei is it in kâld keunstke om 'e lokaasje fan 'e GPS-stjoerder yn syn auto út te finen yn Altamonte. Se reizget dêrhinne en besiket McCall temûk te observearjen, mar hy hat har fuortendaliks troch. Tsjin dy tiid is McCall al identifisearre oan 'e hân fan 'e fingerôfdrukken dy't er yn 'e filla fan Vitale efterlitten hat en wurdt er net mear sjoen as in potinsjele krimineel. Collins freget him hoe't er oan har tillefoannûmer komt en hy antwurdet dat er dat út in lyts swart boekje hat. Hy wiist har derop dat de drugs út Syrje de Schengensône ek fia Sardynje of Elba binnenslûke wurde kinnen hiene. Ynstee hawwe de smokkelders derfoar keazen om it fia Palermo te dwaan, in stêd dy't troch de aktiviteiten fan 'e Cosa Nostra (de Sisyljaanske maffia) op Sisylje de strangst bewekke haven fan Itaalje hat. Wêrom? Collins seit ta dat útsykje te sillen en McCall fan it antwurd op 'e hichte te stellen. Yn ruil dêrfoar wol se dan fan McCall witte wêrom't er har útkeazen hat út 'e tûzenen CIA-aginten dy't er kieze kinne hie om syn tip oan troch te jaan.

Underwilens wurde de ynwenners fan Altamonte yntimidearre en ôfparse troch in groepke motorriders dy't ûnder lieding steane fan Marco Quaranta. Dyselde is de jongere broer fan Vincent Quaranta, it haad fan 'e fiif famyljes fan 'e Camorra (de Napolitaanske maffia), dy't in wier skrikbewâld fiert oer de earmere buerten fan Napels. McCall is tsjûge fan 'e mishanneling fan Angelo de fiskboer as dy it "beskermjild" op in kear net opbringe kin om't er in nije friezer oanskaffe moatten hat doe't de âlde de geast joech. Hoewol't de mishanneling efter sletten doarren plakfynt, is it op 'e strjitte te hearren. Vincent, dy't yn Napels in âldman yn in rolstoel ophingje lit as syn bern syn wente net oan him ferkeapje wolle, seit tsjin Marco dat er tefolle moederaasje mei de ynwenners fan Altamonte hat. Dêrop keare Marco en syn binde werom nei it doarp, dêr't se by nacht de fiskhannel fan Angelo yn 'e brân stekke. It pân brânt hielendal út. McCall helpt Angelo en de oare doarpsbewenners, dy't de oare deis mei-inoar de ferrinnewearre ynboel útromje en oan 'e weropbou begjinne.

Gio Bonucci sjocht op bylden fan befeiligingskamera's hoe't maskere ynsittenden fan in buske de brân oanstekke. Hy docht neifraach nei it kenteken om bewiis te krijen wa't de dieders binne, hoewol't er dat fansels wol riede kin. Inkele dagen letter wurdt er thús opwachte troch Marco en syn trewanten, dy't syn frou Chiara en syn dochterke Gabriella gizele hawwe. Korrupte plysjebeämten hawwe Marco trochdien dat Bonucci it kenteken fan syn buske neilutsen hat. Foar dat fergryp wurdt de carabiniere hielendal yninoar slein. Marco-en-dy ferlitte it hûs mei it drigemint dat se de folgjende kear dat Bonucci yn 'e fout giet, de jonge Gabriella in wan bruien jaan sille.

In pear dagen letter sit Gio Bonucci mei wiif en bern jûns yn in pleatslik restaurant te iten as McCall dêr tafallich ek is. Op in stuit komme Marco en trije fan syn neiste trewanten deryn. Marco skikt by de Bonucci's oan en easket fan Gio dat er foar him kontakten leit mei de Somalyske mienskip, sadat de Camorra harren yllegale aktiviteiten útwreidzje kinne nei Somaalje. Wannear't Bonucci blyk jout fan tsjinnichheid, makket Marco him dúdlik dat hy no Marco syn boadskiprindersjonge is, as er teminsten net wol dat Gabriella wat oerkomt. Hy ûnderbrekt it petear mei de Bonucci's wannear't er him bewust wurdt dat McCall him sit oan te stoarjen. Dêrop skikt er by McCall oan, dy't er besiket te yntimidearjen troch him ta te biten dat er him mar better mei syn eigen saken bemuoie kin. McCall antwurdet dat er dat ek it leafste dwaan soe, mar dat Marco dat foar him wol hiel dreech makket. De konfrontaasje eskalearret fluch oant McCall Marco ûntwapenet en him troch druk út te oefenjen op in gefoelich plak dêr't senuwen gearkomme, twingt ta in fernederjende ôftocht. Bûtendoar besiket Marco syn mannen te wergroepearjen. Hy wol himsels op 'e nij bewapenje om werom te gean en McCall dea te meitsjen, mar ear't er it troch hat, is McCall al middenmank him en syn mannen en yn luttele tellen binne syn trije trewanten dea. Marco besiket McCall del te stekken mei in stiletto, mar McCall pakt syn hân fêst en twingt him om ynstee himsels dea te stekken.

Underwilens hat der yn Rome in grutte terroristyske oanslach plakfûn, wêrby't mear as santich minsken omkommen binne. De korrupte haadkommissaris Barella, dy't oan it haad fan 'e plysje fan Napels stiet, bejout him nei de filla fan Vincent Quaranta, dêr't op dat stuit krekt risselwaasje makke wurdt foar de begraffenis fan Marco. Barella wit dat de oanslach yn Rome begien is mei it jild dêr't de Camorra de Syrjers mei betelle hat foar de fenetylline. Hy warskôget Quaranta dat de CIA no yn it ûndersyk behelle is, mar dat is Quaranta allikefolle. Hy lit ek in folsleine ûnferskillichheid blike foar it lot fan 'e slachtoffers fan 'e oanslach yn Rome. Wannear't Barella syn geduld mei him ferliest en him útmakket foar in barbaar, speetst Quaranta de hân fan 'e haadkommissaris oan syn buro fêst mei in mês, wêrnei't er de man, wylst dy fêstholden wurdt troch syn trewanten, mei in oar mês de hân ôffiket.

It team fan 'e CIA siket nei in direkte ferbining tusken Vitale en de Syrjers dy't ferantwurdlik binne foar de oanslach. McCall, dy't yn it buske fan Marco in pûdsje mei fenetyllinetabletten oantroffen hat, skillet Emma Collins op mei it boadskip dat se op it ferkearde plak siket: de ferbining wurdt foarme troch de Camorra. Trochdat se opholden wurdt troch it tillefoantsje is Collins letter as ferwachte by har auto en sit se der net yn wannear't de bom ôfgiet dy't der yn opdracht fan Quaranta ûnder pleatst wie. Collins oerlibbet de eksploazje, mar rint troch de skokweach ferwûnings op en bedarret yn it sikehûs.

By nacht komt Quaranta yn Altamonte, dêr't er Bonucci út syn hûs slepe lit en him midden op it doarpsplein in pistoal tsjin 'e holle oan set. Hy bonsjoert de oare doarpelingen út harren huzen om tsjûge te wêzen fan wat der bart. As de minsken oan 'e rânen fan it plein gearklofte binne, easket Quaranta mei útset lûd dat Bonucci him fertelt wa't Marco fermoarde hat, mar de carabiniere wegeret. Ear't de plysjeman fermoarde wurde kin, makket McCall himsels bekend. Hy is ree om himsels oer te jaan, mar dan komme de doarpelingen yn ferset. Inkelen helje jachtgewearen foar 't ljocht, wylst oaren alles mei de mobile tillefoan begjinne te filmjen. Quaranta en syn trewanten wurde alsa twongen om har werom te lûken, mar yn syn filla yn Napels meitsje se plannen om 'e oare deis wraak te nimmen op hiel Altamonte.

Safier komt it lykwols net, want by nacht kringt McCall de filla yn, dêr't er op systematyske wize alle trewanten fan Quaranta fan kant makket, wylst de maffiabaas sels troch alles hinne sliept. As er úteinlings wekker wurdt trochdat it bloed fan ien fan syn fermoarde mannen him op 'e holle dript, ûntdekt er dat er allinnich oerbleaun is. Hy rekket befongen troch panyk en begjint yn it wylde wei syn mitrailleur leech te sjitten, ear't er troch McCall op ienfâldige wize oermastere wurdt. Dêrnei twingt McCall him om in oerdoazis fenetyllinetabetten troch te slokken, sadat er binne seis minuten in hertstilstân kriget.

De oare deis besiket McCall Collins yn it sikehûs. Oan har fertelt er wat er no eins weromhelje woe út 'e wynmakkerij op Sisylje. It blykt te gean om $366.400 oan kontant jild: it pinsjoen fan 'e Amerikaanske mitselder Greg Dyer, dat Vitale by in hack stellen hie. Hy freget Collins om it jild by Dyer werom te besoargjen. Sy freget him oft Dyer in freon fan him is, mar McCall antwurdet dat er de man amper ken: hy hat him ris yn 'e auto hân doe't er as taksysjauffeur wurke. Collins docht wat McCall har frege hat en bringt de rêchsek mei it jild by Dyer en de frou, dy't yn triennen útbarste. Yn it haadkertier fan 'e CIA yn Langley (Firginia) kriget Collins neitiid promoasje foar har bydrage oan 'e operaasje yn Itaalje. By de resepsje wurdt in pakje foar har ôfjûn. Wannear't se dat iepenet, blykt der in lyts swart notysjeboekje yn te sitten dat fan McCall syn kollega en freondinne Susan Plummer wie (sjoch: The Equalizer), dy't letter fermoarde is (sjoch: The Equalizer 2). Ut it begeliedend bryfke docht bliken dat Collins de dochter fan Plummer is. En sa wurdt har fraach beäntwurde wêrom't McCall har útkeas út alle CIA-aginten dy't er opskilje kinnen hie.

Yn Altamonte giet it libben fierder, en McCall, dy't jierrenlang wraksele hat mei syn ferline, hat no foar it earst in plak fûn dêr't er him thúsfielt en dêr't er akseptearre wurdt, ek al witte de minsken om him hinne alteast in diel fan 'e dingen dy't er dien hat.

Rolferdieling

Denzel Washington.

Dakota Fanning.

haadrollen

personaazje	akteur/aktrise
Robert McCall	Denzel Washington

byrollen

personaazje	akteur/aktrise
Vincent Quaranta	Andrea Scarduzio
Marco Quaranta	Andrea Dodero
CIA-aginte Emma Collins	Dakota Fanning
Enzo Arisio	Remo Girone
plysjeman Gio Bonucci	Eugenio Mastrandrea
Aminah	Gaia Scodellaro
CIA-agint Frank Conroy	David Denman
Angelo	Daniele Perrone
Gabriella Bonucci	Dea Lanzaro
Chiara Bonucci	Sonia Ben Ammar
Lorenzo Vitale	Bruno Bilotta
haadkommissaris Barella	Adolfo Margiotta
"Viking"	Alessandro Pess
trewant fan Vincent Quaranta	Salvatore Ruocco

Produksje en distribúsje

Produksje

Nei it útkommen fan The Equalizer 2 joech regisseur Antoine Fuqua yn augustus 2018 oan dat er fan doel wie om troch te gean mei de Equalizer-filmsearje. Hy liet doe al blike belangstelling te hawwen foar in plot yn in bûtenlânske setting. De koroanapandemy soarge foar fertraging, mar yn jannewaris 2022 befêstige filmstudio Columbia Pictures offisjeel dat in trêde film oer Robert McCall yn preproduksje nommen wie.

Regisseur Antoine Fuqua.

The Equalizer 3 waard, krekt as de beide eardere films, regissearre troch Antoine Fuqua op basis fan in senario dat, ek wer krekt as by de beide foargeande films, skreaun wie troch Richard Wenk. As produsinten wiene Fuqua, haadrolspiler Denzel Washington en fierders Todd Black, Jason Blumenthal, Steve Tisch, Clayton Townsend, Alex Siskin en Tony Eldridge by it projekt belutsen foar de filmstudio's Columbia Pictures, Eagle Pictures, Escape Artists en Zhiv Productions. De film wie dêrmei in Amerikaansk-Italjaansk-Australyske ko-produksje. Foar The Equalizer 3 wie in budget beskikber fan $70 miljoen. De kamerarezjy wie yn 'e hannen fan Robert Richardson, en de filmmuzyk waard fersoarge troch Marcelo Zarvos.

Casting

Foar de haadrol fan Robert McCall waard op 'e nij Denzel Washington cast, dy't deselde rol ek al spile hie yn The Equalizer (2014) en The Equalizer 2 (2018). Washington hie dêrnjonken ek mei regisseur Antoine Fuqua gearwurke yn 'e western The Magnificent Seven (2016). Mei't The Equalizer 3 fan begjin oant ein yn Itaalje spile, waarden foar de measte oare rollen Italjaanske akteurs en aktrises keazen, temear om't yn 'e film foar likernôch in fjirdepart Italjaansk sprutsen wurdt. De rol fan CIA-aginte Emma Collins gie nei de Amerikaanse Dakota Fanning. Sy wie no in folwoeksen frou, mar se wie njoggentjin jier earder as jong famke de tsjinspylster fan Denzel Washington yn 'e aksjefilm Man on Fire (2004).

Minori, yn 'e regio Kampaanje, wie ien fan 'e filmlokaasjes foar The Equalizer 3.

Opnamen

De opnamen foar The Equalizer 3 setten op 10 oktober 2022 útein en duorren oant yn jannewaris 2023. Der wiene ferskate filmlokaasjes oan 'e Italjaanske Amalfikust, in krite dy't oan 'e Tyrreenske See leit besuden Napels. Sa waard der filme yn 'e skildereftige kustdoarpen Minori, Maiori, Atrani en Ravello. Oare filmlokaasjes wiene yn 'e stêd Napels sels. De measte binnendoarsênes waarden opnommen yn it filmstudiokompleks Cinecittà yn Rome.

Distribúsje

De distribúsje fan The Equalizer 3 waard fersoarge troch Sony Pictures Releasing. Dat is de distribúsjedifyzje fan Sony Pictures, dat wer de memme-ûndernimming fan Columbia Pictures is. De film gie op 28 augustus 2023 yn Rome yn premiêre, en iepene dêrnei op 1 septimber yn 'e Amerikaanske bioskopen. It byhearrende soundtrackalbum ferskynde dyselde deis by platemaatskippij Madison Gate Records. The Equalizer 3 kaam op 3 oktober 2023 beskikber as digitale download en waard op 14 novimber 2023 útbrocht op dvd en blu-ray.

Untfangst

Fan 'e filmkritisy krige The Equalizer 3 oer it algemien positive resinsjes. Clarisse Loughrey fan 'e Britske krante The Independent joech de film 3 fan 5 stjerren. Hja skreau: "Op syn bêst […] bringt [dizze film] kreas de barokke bloed-en-yngewant-aksje fan Fuqua yn lykwicht mei Washington syn fermogen om 'e oandacht fêst te hâlden wylst er stôkstiifstil sit." Yn The Sunday Times parte Tom Shone de film ek 3 fan 5 stjerren ta. Hy skreau: "Oft er no in cappuccino drinkt, mei in servearster flirt of immen in earm brekt, Washington lit it der allegear útsjen as genietet er fan it swiete libben."

Atrani, yn 'e regio Kampaanje, wie ien fan 'e filmlokaasjes foar The Equalizer 3..

Kyle Smith fan The Wall Street Journal skreau: "Foar dejingen dy't oer ekstreem geweld kinne, is The Equalizer 3 fermaaklik genôch. Al mei it skript dan mar sa-sa wêze, de prachtige Italjaanske lokaasjes, Washington syn earsteklas sjarme en in grizelige, benearjende soundtrack fan Marcela Zarvos tille [de film] dêr boppe-út."

Op 'e webside Rotten Tomatoes, dy't resinsjes sammelet, hat The Equalizer 3 in goedkarringspersintaazje fan 76%, basearre op 168 ûnderskate resinsjes. De konsensuskrityk fan 'e webside, gearstald út al dy resinsjes, stelt: "[Dizze film] is in nij fermaaklik útstapke fan Antoine Fuqua en Denzel Washington en makket syn formulemjittige ferhaal fierhinne goed troch royaal út te pakken mei lotterjende aksje." Op Metacritic, de wichtichste konkurrint fan Rotten Tomatoes, behellet The Equalizer 3 in goedkarringspersintaazje fan 58%, basearre op 38 resinsjes.

Resultaat

Opbringst

The Equalizer 3 brocht yn 'e bioskopen yn 'e Feriene Steaten en Kanada $92,4 miljoen op, en yn alle oare lannen en territoaria $98,7 miljoen. Wrâldwiid kaam de opbringst dêrmei út op $191,1 miljoen. Ofset tsjin it budget fan $70 miljoen betsjut dat in winst fan $121,1 miljoen, hoewol't dêr de marketingkosten noch wol ôf moatte. Bûten Noard-Amearika brocht The Equalizer 3 it measte jild op yn it Feriene Keninkryk ($10,2 miljoen), Dútslân ($8,4 miljoen), Austraalje ($7 miljoen) en Frankryk (8,7 miljoen).

De binnendoarsênes fan The Equalizer 3 waarden filme yn it filmstudiokompleks Cinecittà yn Rome.

Prizen

The Equalizer 3 waard nominearre foar de Saturn Award yn 'e kategory bêste aksje- of aventoerefilm. Regisseur Antoine Fuqua waard nominearre foar de NAACP Image Award foar bêste regisseur, en haadrolspiler Denzel Washington waard nominearre foar de NAACP Image Award foar bêste filmakteur.

Takomst fan 'e filmsearje

Yn augustus 2023 fertelde regisseur Antoine Fuqua yn in fraachpetear dat The Equalizer 3 yntern by de belutsen filmstudio's beskôge waard as de lêste film yn 'e Equalizer-searje. Nettsjinsteande dat joech er oan iepen te stean foar in eventueel fjirde diel, salang't Denzel Washington dan mar weromkeare soe as Robert McCall. Fuqua sei ek dat der praat wie oer it meitsjen fan in prequel, dy't it ferline fan McCall beljochtsje soe. Hy sei dat hy der belangstelling foar hie om sa'n film te meitsjen. Foar de eventuele haadrol soe Washington wer frege wurde kinne, dy't dan mei ûntâlderingstechnyk in jonger foarkommen oanmetten wurde koe. In oare mooglikheid wie neffens Fuqua om in oare akteur yn 'e rol fan 'e jonge McCall te casten. Hy neamde dêrby as foarbylden John David Washington en Michael B. Jordan. Yn novimber 2024 makke Denzel Washington bekend dat er him kontraktueel fêstlein hie om beskikber te wêzen foar noch twa fierdere Equalizer-films, ôfhinklik fan 'e fraach oft Sony Pictures beslute soe om dy films te meitsjen.

Keppelings om utens

• (in) Ynformaasje oer The Equalizer 3 yn 'e Internet Movie Database (IMDb)

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side.