The Cabin in the Woods

Ut Wikipedy
The Cabin in the Woods
film
(Filmposter yn 'e Ingelske Wikipedy)
makkers
regisseur Drew Goddard
produsint Joss Whedon
senario Joss Whedon
Drew Goddard
kamerarezjy Peter Deming
muzyk David Julyan
filmstudio Mutant Enemy Productions
distribúsje Lionsgate Films
spilers
haadrollen Kristen Connolly
Fran Kranz
Chris Hemsworth
Jesse Williams
Anna Hutchison
byrollen Bradley Whitford
Richard Jenkins
Amy Acker
Sigourney Weaver
Tim de Zarn
skaaimerken
lân/lannen Feriene Steaten
premiêre desimber 2011
foarm langspylfilm
sjenre horrorfilm
taal Ingelsk
spyltiid 95 minuten
budget en resultaten
budget $30 miljoen
opbringst $66,5 miljoen
prizen 1 × Bram Stoker Award
1 × Saturn Award
1 × British Fantasy Award

The Cabin in the Woods is in Amerikaanske, foar in part satirysk bedoelde, horrorfilm út 2012 fan it subsjenre fan 'e slasherfilm. De film stie ûnder rezjy fan Drew Goddard, en de haadrollen waarden fertolke troch Kristen Connolly, Fran Kranz, Chris Hemsworth, Jesse Williams en Anna Hutchison. De titel betsjut "De Blokhutte yn 'e Bosk". It ferhaal giet oer fiif studinten dy't har in wykein weromlûke yn it fakânsjehûs, in blokhutte, fan 'e neef fan ien fan harren, op in ôfhandich plak yn 'e bosken. Dêr wurde se oanfallen troch sombys, wylst it hiele spul yn in ûndergrûnsk laboratoarium oanstjoerd wurdt troch in groep wittenskippers. The Cabin in the Woods krige fan 'e filmkritisy oer it algemien positive resinsjes en wie yn 'e bioskopen in beskieden súkses.

Plot[bewurkje seksje | boarne bewurkje]

Yn in ûndergrûnske laboratoariumfasiliteit earne yn 'e Feriene Steaten beprate de liedingjaande technisy Gary Sitterson en Steve Hadley en harren assistinte Wendy Lin de plannen foar de oankommende ferzje fan in blykber jierliks weromkearend, mysterieus ritueel. Ut it petear wurdt dúdlik dat in mislearre operaasje yn Stockholm de lêste is fan in hiele rige ôfdijers yn plakken oeral op 'e wrâld. Inkeld harren eigen ritueel en ien yn Japan binne noch oer, en ien fan beiden moàt beslist slagje, oars sille der net by namme neamde minne dingen barre.

Underwilens risselwearret de Amerikaanske studinte Dana Polk om yn 'e mande mei har bêste freondinne Jules Louden, dy har frijer Curt Vaughan, en harren mienskiplike freon Marty Mikalski, op fakânsje te gean. In bekende fan Curt, Holden McCrea, jout him by har om't Jules en Curt him oan Dana keppelje wolle. Mei syn fiven sille se in wykein trochbringe yn in blokhutte yn 'e bosk, dy't Curt liene kin fan in neef fan sines. Wat se net witte, is dat se yn 'e rekken holden wurde troch sinistere manlju mei earkes yn, dy't al harren dwaan en litten trochjouwe oan Sitterson en Hadley. Mei in camper reizget it fiiftal ôf nei it wâld, dêr't se by in benzinestasjon de grizelige plattelanner Mordecai treffe. Hoewol't dy harren kjel makket en mislediget, sjogge se dat net as reden en kear om. Fia in smel paadsje dat by in djippe kleau lâns liedt en dêrnei mei in U-bocht troch in tunnel om 'e ein fan dy kleau hinne, berikke se op 't lêst de blokhutte, dy't deun by de igge fan in stil marke stiet.

Ut 'e kontrôlekeamer fan harren laboratoarium wei hâlde Sitterson en Hadley fan op ôfstân alles yn 'e blokhutte yn 'e rekken fia ferburgen kamera's en mikrofoantsjes. Se manipulearje it hâlden en dragen fan 'e studinten troch harren ûnopgemurken te drogearjen mei libidoferheegjende stoffen. Ek komt út dat ien fan harren hantlangers de hierferve fan Jules, dy't de deis tefoaren har hier blondearre hat, oanlinge hat mei in stof dy't tinken behinderet. (Se hawwe op dy manear fan har it sprekwurdlike domme blondsje makke, hoewol't se eins tige yntelligint is en medisinen studearret.)

Sitterson, Hadley, Lin en it oare laboratoariumpersoniel slute weddenskippen ôf oer de fraach hokfoar meunster oft de studinten oanfalle sil, wêrby't Hadley der oanhâldend op omtimmeret dat er sa stomme graach nochris in seemearman yn aksje sjen wol. Underwilens ûntdekke de studinten (mei wat help fan Sitterson en Hadley) de yngong fan 'e kelder fan 'e blokhutte. Marty, dy't troch syn oanhâldende blowen eins de domste fan 'e groep wêze moatte soe, besiket syn freonen der fan te bepraten om út 'e kelder wei te gean. De oaren negearje syn warskôgings lykwols as se yn 'e kelder in reuseftige samling bizarre foarwerpen oantreffe. Alle fjouwer kieze se ien út dêr't se mei omnifelje, mar úteinlik is it Dana dy't de oandacht fan har freonen nei har ta lûkt, by de oare foarwerpen wei. Sy hat it deiboek fûn fan Patience Buckner, in teenagefamke dat om 1900 hinne de blokhutte bewenne en oan ien wei troch op barbaarske wize mishannele waard troch har sadistyske famylje. As Dana in stik út it deiboek lûdop foarlêst, en (tsjin 'e warskôging fan Marty yn) ek de rige Latynske toverspreuken dêr't it boek mei einiget, ropt se dêrmei by fersin de ta sombys wurden famylje Buckner werom út 'e dea, dy't bûtendoar yn 'e bosk, net fier fan 'e blokhutte ôf, út harren grêven omheech klauwe.

Tink derom: Yn de tekst hjirûnder wurdt de ôfrin fan de film beskreaun.
As jo de film sels sjen wolle, is it mooglik better dat jo it no folgjende diel fan 'e plotbeskriuwing (earst noch) net lêze.

Letter dy jûns nimt Curt Jules mei nei bûten ta, wylst Marty him weromlûkt yn syn keamer en Dana en Holden, dy't opinoar falle, op 'e bank sitte te tútsjen. Hadley en Sitterson litte fia in systeem fan buizen of slangen yn 'e ûndergrûn fan it wâld feromoanen frij om Curt en Jules oer de drompel hinne te helpen, sadat se tajouwe oan har oanstriid om seks te hawwen. As se op 'e mei moas oerdutsen boskgrûn oan in frijpartij begjinne, wurde se oanfallen troch de sombys. Curt wurdt ferwûne, oermastere en twongen om ta se sjen hoe't de sombys Jules ûnthalzje. Dat liedt ta in earbiedige tefredenens yn 'e ûndergrûnske kontrôlekeamer.

De breinroere Curt wit te ûntsnappen nei de blokhutte en warskôget de oaren. Troch har te drogearjen mei in nije doazis fan in gas dat logysk neitinken behinderet, witte Sitterson en Hadley de oerbleaune fjouwer studinten safier te krijen dat se har allegear yn har eigen keamer weromlûke, ynstee fan dat se byinoar bliuwe. Sadree't se harren keamersdoarren ticht dogge, wurde dy út 'e kontrôlekeamer wei beskoattele, sadat se net wer iepenmakke wurde kinne. Underwilens komt der nijs út Japan dat it ritueel dêre foar it earst yn 'e skiednis mislearre is, wat betsjut dat it súkses fan it Amerikaanske ritueel "de lêste hoop fan 'e minskheid" is.

Yn syn keamer ûntdekt Marty, dy't earder al erchtinkend wurden wie oer alle tafallichheden en it nuvere hâlden en dragen fan syn freonen, in lytse ferburgen kamera. Ear't er wat mei dy ûntdekking dwaan kin, wurdt er lykwols pakt troch de somby Judah Buckner, dy't him út it finster skuort en fuortsleept oer de râne fan in ferhef hinne, wêrnei't der gjalpen te hearren binne, folge troch bloed dat by de lichte del streamt. Dana komt yn 'e benearing as Matthew Buckner har kearmer binnenkringt, mar ûntkomt troch in ynsleine dûbelsidige spegel nei Holden syn keamer. Se barrikadearje it gat dêr't de spegel sitten hat mei Holden syn ledikant. Fan gefolgen ûntdekke se op it plak dêr't it ledikant stie in lûk dat nei in oar diel fan 'e kelder liet, dêr't in martelkeamer ynrjochte is. Holden rekket ferwûne as Matthew Buckner him tenei komt, mar in ta razernij dreaune Dana weeft op gewelddiedige en bluodderige wize mei de somby ôf.

Curt, dy't fia in oare tagong de kelder berikt hat, jout him by Holden en Dana. Trijeresom besykje se te ûntsnappen yn 'e camper, mar Sitterson lit fan op ôfstân in springstoflading ôfgean, sadat de tunnel op 'e iennichste tagongswei ynstoart. De trije oerbleaune studinten kinne de tagongswei oare kant de tunnel maklik sjen fan it plak ôf dêr't se strâne binne, mei't se dêr inkeld fan skaat wurde troch in smelle kleau. Curt, dy't yn syn frije tiid graach op crossmotors omride mei, ornearret dat er dy ôfstân wol mei de motor springe kin, sadat er help helje kin foar de oaren. Hy laadt syn motor fan 'e efterkant fan 'e camper en nimt in sa grut mooglike oanrin, mar healwei de kleau klapt er op in fertikaal krêftfjild, wêrnei't hy en syn motor te pletter falle yn 'e djipten fan 'e kleau. Op dat stuit beseft Dana dat Marty gelyk hie en dat alles by de blokhutte manipulearre wurdt en yn sêne set is.

Sy en Holden stappe wer yn 'e camper en ride werom nei de blokhutte. Holden wol sjen oft der oare kant it gebou net noch in oare tagongswei is, hoewol't Dana der al wis fan is dat dat net sa is, of oars, as der al noch in twadde tagongswei is, dat dy dan ek blokkearre wêze sil. Wylst se dêr noch oer redendiele, doemt heit Buckner ynienen yn 'e camper op, dy't himsels dêr ferskûle hat yn 'e tiid dat de studinten dwaande wiene mei de motor en Curt syn sprong, Hy slacht Holden in garot om 'e hals en fermoardet him. De camper rekket ûnbestjoerber en riidt it marke yn. Dana wit troch it dakrút te ûntkommen en berikt swimmend de steger by de blokhotte. Heit Buckner folget har en falt har op 'e steger oan.

Sitterson, Hadley, Lin en de oare laboranten, dy't sjogge dat Dana de iennichste oerlibbene is, begjinne mei wille en sterke drank it súkses fan harren ritueel te fieren, wylst op in byldskerm op 'e eftergrûn Dana foar har libben fjochtet tsjin 'e somby. It feest wurdt rou ûnderbrutsen as der in tillefoantsje komt fan 'e Direktrise, dy't it bewâld fiert oer de hiele ûndergrûnske fasiliteit. It docht bliken dat it ritueel dochs noch net súksesfol beëinige is, mei't Marty noch libbet; ynstee dat Judah Buckner him deamakke, hat hy mei Judah Buckner ôfweeft. Op datseldichste stuit wurdt Dana op 'e steger rêden as Marty mei syn drugspiip heit Buckner delslacht. Neitiid nimt er har mei nei it grêf fan 'e Buckners, dêr't er in lift ûntdutsen hat. Dana twifelet oft se wol witte wol wêr't dy lift harren bringe sil, mar Marty freget har wêr't se oars hinne moatte.

Dat, se geane mei de lift nei ûnderen en ûntdekke dat der ûnder de blokhutte in hiel ûndergrûnsk laboratoarium ferburgen sit. Dêr sjogge se tsientallen soartgelikense liftkoaien, dy't sawol fertikaal as horizontaal bewege kinne. De liftkoaien binne eins echte koaien fan feilichheidsglês, wêryn't in grutte samling fan alderhanne meunsters finzen holden wurdt, it iene noch njoerder en grotesker as it oare. Dana beseft dat alle foarwerpen yn 'e kelder fan 'e blokhutte ferbûn binne mei ien fan 'e meunsters, en dat de besikers fan 'e blokhutte troch it brûken fan ien fan dy foarwerpen sels bepale hokker meunster op harren loslitten wurdt. Se rekket folslein breinroer as se foar it ferstân kriget dat sysels de Buckners op har en har freonen loslitten hat roch út it deiboek fan Patience Buckner foar te lêzen.

Sitterson en Hadley binne ûnderwilens yn panyk om't harren ritueel driget te mislearjen. It duorret eefkes ear't se útfûn hawwe wêr't Marty en Dana bedarre binne, mar dan stjoere se in befeiligingsman op harren ôf om harren liftkoai te iepenjen. Se jouwe befel om Marty daliks dea te sjitten, mar Dana gewurde te litten. De senuweftige befeiligingsman lit him lykwols ôfliede troch ien fan 'e meunsters, sadat Marty en Dana him oermasterje kinne. Se kringe de ûndergrûnske fasiliteit binnen, dêr't se beskûl sykje yn it lytse kontrôlekeammerke fan 'e befeiligingsman. As in troch Sitterson en Hadley alarmearre swierbewapene ienheid befeiligingslju arrivearret en it fjoer iepenet op it kontrôlekeammerke, ûntskoattelje Marty en Dana de oare koaien. De frijlitten meunsters falle op 'e befeiligingslju oan en rjochtsje in letterlik bloedbad oan as se dy oan stikken skuorre. Dêrnei kinne de meunsters frij omrinne troch de hiele fasiliteit, dêr't se fuortendaliks de hiele stêf begjinne ôf te slachtsjen. As se de grutte kontrôlekeamer binnenkringe, wurdt Wendy Lin troch in reuseftige slange ferslynd, wylst Hadley, iroanysk genôch, deamakke wurdt troch in seemearman. Sitterson wit as iennichste troch in lûk yn 'e flier te ûntkommen nei in noch djipper lein diel fan 'e fasiliteit.

Underwilens binne Marty en Dana weiwurden troch in gat dat ien fan 'e meunsters yn in muorre slein hat. As se immen efter har oankommen hearre, stekt Dana om har hinne en rint Sitterson sa by fersin op it roastich mês dat Marty oan Judah Buckner ôfhandich makke hie. De wûne is fataal, mar ear't er stjert, smeekt Sitterson Dana om Marty te fermoardzjen. Dat lêste fersyk negearjend flechtsje de beide studinten djipper omleech, dêr't se op in oerâlde timpel stjitte. Oan 'e fierste kant fan 'e mânske keamer hâldt de flier op by in kleau dy't noch folle djipper de Ierde yn giet. As Marty dêr oer de râne kipet, sjocht er dizenich yn 'e djipte wat reuseftichs bewegen.

Yn 'e timpel moetsje Marty en Dana de Direktrise, dy't harren útleit dat der wrâldwiid elts jier in rige ritualisearre minske-offers fan bern of jongerein plakfine, útfierd troch oerheidsynstellings. Dat is nedich om 'e Alden te tefreden te stellen, in groep wrede, ûnderierdske goaden dy't yn in skier ferline de wrâld oerhearsken. Elts diel fan 'e wrâld hat oangeande it offer syn eigen rituelen. Der hoecht mar ien fan 'e rituelen te slagjen om foar de minskheid in nij jier fan fuortbestean te keapjen. As der in jier komme soe wêryn't alle rituelen mislearje, is it lykwols foargoed dien mei de minskheid. Yn 'e Feriene Steaten beslacht it ritueel it offer fan fiif teenagers dy't elts in tradisjoneel archetype omfiemje: de Hoer (Jules), de Sporter (Curt), de Wittenskipper (Holden), de Dwaas (Marty) en de Faam (Dana). De Hoer moat it earst stjerre, mar fierders is der gjin fêste folchoarder foar de stjergefallen. As de Faam oan it lêst ta oerlibbet, is har ferstjerren net mear needsaaklik, mar har lijen al. Mei't alle oare rituelen fan 't jier mislearre binne, fiteret de Direktrise Dana oan om Marty foar de moarnsdage te deadzjen, sadat it Amerikaanske ritueel slagge wêze sil en de minskheid wer in jier sparre bliuwt.

Dana, dy't nei har delstekken fan Sitterson fan Marty it pistoal krigen hat dat se de befeiligingsman by de lift ôfnommen hawwe, rjochtet it fjoerwapen op Marty. Se stiet op it punt om 'e trekker oer te heljen as se oanfallen wurdt troch in wearwolf, dy't harren efternei kommen is fan heger yn it kompleks. Se lit it pistoal falle, en Marty en de Direktrise dogge dêr allebeide in greep nei en reitsje op 'e râne fan 'e kleau behelle yn in wrakseling. Marty, dy't de Direktrise ûnder him hat, sjocht út syn eachhoeke it sombyfanke Patience Buckner oan kommen en lit himsels mei opsetsin op 'e rêch rôlje, sadat de Direktrise boppe leit. Patience slacht de Direktrise in bile yn har efterholle, wêrnei't Marty har en Patience oer de râne fan 'e kleau wâdet. Hy pakt it pistoal en sjit de wearwolf dea, dy't Dana ûnderwilens slim tatakele hat.

Kristen Connolly.
Fran Kranz.
Chris Hemsworth.
Anna Hutchison.

Neitiid geane Marty en Dana njonken inoar op 'e treppen fan 'e timpel sitten. Dana, dy't oan it deablieden is, biedt har ûntskuldigings oan dat se Marty hast deasketten hie. Se beslute dat de minskheid it rêden net wurdich is, as minske-offers de grûnslach foar de minsklike beskaving foarmje. Marty hellet in joint foar it ljocht dy't se tegearre opsmoke, wylst se wachtsje op 'e moarnsdage en wat der dan barre sil. By sinne-opgong stoart de timpelflier yn en in reuseftige hân riist op út 'e djipte en ferneatiget de ûndergrûnske fasiliteit en de blokhutte dêrboppe wylst de wrâld einiget.

Rolferdieling[bewurkje seksje | boarne bewurkje]

haadrollen
personaazje akteur/aktrise         
Dana Polk ("de Faam") Kristen Connolly
Marty Mikalski ("de Dwaas") Fran Kranz
Curt Vaughan ("de Sporter") Chris Hemsworth
Holden McCrea ("de Wittenskipper") Jesse Williams
Jules Louden ("de Hoer") Anna Hutchison


byrollen
personaazje                            akteur/aktrise
Steve Hadley Bradley Whitford
Gary Sitterson Richard Jenkins
Wendy Lin Amy Acker
de Direktrise Sigourney Weaver
Mordecai Tim de Zarn
Daniel Truman Brian J. White
Patience Buckner Jodelle Ferland
heit Buckner Dan Shea
Matthew Buckner Dan Payne
Judah Buckner Matt Drake
Ronald de stazjêr Tom Lenk

Produksje en distribúsje[bewurkje seksje | boarne bewurkje]

Produksje[bewurkje seksje | boarne bewurkje]

Regisseur Drew Goddard en filmprodusint Joss Whedon, dy't earder gearwurke hiene oan 'e fantasytillefyzjesearjes Buffy the Vampire Slayer en Angel, skreaune it senario foar The Cabin in the Woods yn trije dagen. Hja omskreaune it as in besykjen om it subsjenre fan 'e slasherfilm te refitalisearjen en teffens as in krityske satire op martelporno. De film waard makke troch de filmstudio Mutant Enemy Productions, in dochterûndernimming fan Metro-Goldwyn-Mayer, foar in budget fan $30 miljoen. De kamerarezjy wie yn 'e hannen fan Peter Deming, en de filmmuzyk waard fersoarge troch David Julyan.

De opnamen foar The Cabin in the Woods setten op 9 maart 2009 útein en duorren oant yn maaie fan dat jier. Der waard filme yn it Kanadeeske Vancouver. De kelders, it ûndergrûnske kompleks en de liften wiene allegear filmsets dy't troch dekôrbouwers yninoar setten wiene, mar foar opnamen mei in brede kamerahoeke waard it loftfeartgebou fan it Ynstitút foar Technology fan Britsk-Kolumbia (BCIT) brûkt. It bedriuw AFX Studio wie ferantwurdlik foar de special effects, wêrûnder it omturnjen fan hast tûzen figuranten yn oannimlike meunsters fan sechstich ferskillende soarten.

Distribúsje[bewurkje seksje | boarne bewurkje]

It hie oarspronklik de bedoeling west dat The Cabin in the Woods yn febrewaris 2010 yn 'e bioskopen komme soe, mar dat waard útsteld oant jannewaris 2011, sadat er omwurke wurde koe ta it 3D-format. Finansjele swierrichheden by Metro-Goldwyn-Mayer soargen foar noch hast in jier ekstra fertraging. Nei't de filmstudio ûnder nij bestjoer kommen wie, besleat MGM de distribúsjerjochten foar The Cabin in the Woods en in oare film dy't ûnder it foargeande management makke wie, Red Dawn, te ferkeapjen. Lionsgate Films kocht de distribúsje fan The Cabin in the Woods oan.

The Cabin in the Woods wie (ûnoankundige) foar it earst te sjen as ûnderdiel fan it filmfestival Butt-Numb-A-Thon, yn Austin (Teksas), yn desimber 2011. De film gie op 13 april 2012 yn 'e Amerikaanske bioskopen yn premiêre. The Cabin in the Woods waard op 18 septimber 2012 útbrocht op dvd en blu-ray.

Untfangst[bewurkje seksje | boarne bewurkje]

Fan 'e filmkritisy krige The Cabin in the Woods oer it algemien positive resinsjes. Sa joech Roger Ebert fan 'e Chicago Sun-Times de film 3 fan 4 stjerren. Hy skreau: "[Dizze film] is suver makke as wie it in puzel dy't horrorfans oplosse moatte. Hokker konvinsjes boartet er mei om? Hokker auteurs en film wurdt nei ferwiisd? Is de film sels in die fan krityk?" Yn it tydskrift Rolling Stone parte Peter Travers oan The Cabin in the Woods 31/2 fan 4 stjerren ta. Hy neamde de film "duvelsk fermaaklik" en hie benammen lof foar de aktearprestaasjes fan Kristen Connolly en Fran Kranz.

De haadredaktrise fan Cinema Blend, Katey Rich, joech The Cabin in the Woods 41/2 fan 5 stjerren en neamde de film in must foar eltsenien dy't "fan horror hâldt, horror hatet of it minste bytsje belangstelling hat om te sjen hoe't it sjenre funksjonearje kin as in boarterstún foar wat folslein nijs." Yn The Washington Post parte Ann Harnaday de film 3 fan 4 stjerren ta. Eric Goldman fan IGN omskreau The Cabin in the Woods as "in ûnbidich fernimstige en grappige kyk op klassike horrorfilmeleminten."

Kritysker wie Lisa Schwarzbaum fan Entertainment Weekly, dy't de film in 71/2 op in skaal fan 1 oant 10 joech. Yn 'e Los Angeles Times skreau Betsy Sharkey: "De grappen komme maklik, mar foar de skrikmominten jildt dat folle minder." A.O. Scott fan The New York Times stelde fêst: "fernijing en sjenretradisjonalisme leverje faak in ympasse op. Te folle iepentlike fernimstigens kin maklik domme, betroubere spanningspunten bedjerre. En nettsjinsteande de oerdúdlike finingrykheid en it hurde bodzjen dêr't de film mei makke is, wurket The Cabin in the Woods net alhiel."

Op 'e webside Rotten Tomatoes, dy't resinsjes sammelet, hat The Cabin in the Woods in tige heech goedkarringspersintaazje fan 92%, basearre op 288 ûnderskate resinsjes. De konsensuskrityk fan 'e webside, gearstald út al dy resinsjes, stelt: "[De film] is in ferbjusterjende prestaasje op ferskate nivo's, dy't grappich, nuver en grizelich wêze kin – gauris allegear tagelyk." Op Metacritic, de wichtichste konkurrint fan Rotten Tomatoes, behellet The Cabin in the Woods in goedkarringspersintaazje fan 72%, basearre op 40 resinsjes.

Resultaat[bewurkje seksje | boarne bewurkje]

Opbringst[bewurkje seksje | boarne bewurkje]

The Cabin in the Woods brocht yn 'e bioskopen yn 'e Feriene Steaten en Kanada $42,1 miljoen op, en yn alle oare lannen en territoaria $24,4 miljoen. Wrâldwiid kaam de opbringst dêrmei út op $66,5 miljoen. Ofset tsjin it budget fan $30 miljoen betsjut dat in winst fan $36,5 miljoen, hoewol't dêr de marketingkosten noch wol ôf moatte. Nei de Feriene Steaten fertsjinne The Cabin in the Woods it meast yn it Feriene Keninkryk ($8,5 miljoen), Frankryk ($2,4 miljoen) en Ruslân ($2,3 miljoen).

Prizen[bewurkje seksje | boarne bewurkje]

The Cabin in the Woods wûn de Bram Stoker Award, in wichtige horrorliteratuerpriis, yn 'e kategory bêste senario. Hy wûn ek de British Fantasy Award yn deselde kategory en de Saturn Award foar bêste horror- of skrillerfilm. Fierders waard The Cabin in the Woods nominearre foar de Saturn Award foar bêste senario, de Empire Award foar bêste horrorfilm en de Hugo Award foar bêste dramatyske presintaasje (lange foarm).

Keppelings om utens[bewurkje seksje | boarne bewurkje]

Boarnen, noaten en referinsjes[boarne bewurkje]

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side.