The Accountant (film út 2016)

	The Accountant
	film
	(Filmposter yn 'e Ingelske Wikipedy)
	makkers
regisseur	Gavin O'Connor
produsint	Lynette Howell Taylor; Mark Williams
senario	Bill Dubuque
kamerarezjy	Seamus McGarvey
muzyk	Mark Isham
filmstudio	Electric City Entertainment; RatPac-Dune Entertainment; Zero Gravity Management
distribúsje	Warner Bros.
	spilers
haadrollen	Ben Affleck; Anna Kendrick
byrollen	Cynthia Addai-Robinson; J.K. Simmons; John Lithgow; Jon Bernthal; Jeffrey Tambor
	skaaimerken
lân/lannen	Feriene Steaten
premiêre	10 oktober 2016
foarm	langspylfilm
sjenre	aksjeskriller
taal	Ingelsk
spyltiid	128 minuten
	budget en resultaten
budget	$44 miljoen
opbringst	$155,2 miljoen
	filmsearje
filmsearje	The Accountant
● folgjend diel	The Accountant 2

The Accountant is in Amerikaanske aksjefilm en skriller út 2016 ûnder rezjy fan Gavin O'Connor, mei yn 'e haadrollen Ben Affleck en Anna Kendrick. De titel betsjut "De Boekhâlder". It ferhaal folget Christian Wolff, in autistyske boekhâlder dy't de kost fertsjinnet mei it sanearjen fan 'e frauduleuze finânsjes fan kriminele en terroristyske organisaasjes út 'e hiele wrâld, wannear't se te lijen hawwe ûnder ynterne fertsjustering fan jild. Syn kontaktpersoan trunet him oan om noris in putsje oan te nimmen foar in gewoane fabrikant fan legale elektroanika, mar iroanysk genôch komt er troch dat wurk djipper yn 'e swierrichheden as ea tefoaren. Underwilens sitte in pear spesjaal aginten fan it Amerikaansk Ministearje fan Finânsjes him op 'e hakken. The Accountant krige fan 'e filmkritisy mingde resinsjes, mar wie kommersjeel súksesfol yn 'e bioskopen. In ferfolchfilm, The Accountant 2, kaam út yn april 2025.

Plot

Marybeth Medina, in analiste fan it Financial Crimes Enforcement Network of FinCEN, de opspoaringstsjinst fan it Amerikaansk Ministearje fan Finânsjes, wurdt by har baas roppen, direkteur Raymond King. Hy fertelt dat er wit dat sy de driuwende krêft west hat efter it oplossen fan ferskate resinte saken fan fraude en wytwaskjen en freget har wêrom't se gjin spesjaal aginte wurdt. Sy antwurdet dat har har hjoeddeistige funksje better by har past en dat se dêr tefreden mei is. King seit dat se in leagenster is en lit blike dat er wit dat Medina as minderjierrige feroardiele is foar swiere mishanneling. Se wol gjin spesjaal aginte wurde om't se wit dat soks oan it ljocht komme soe as har eftergrûn neirûn wurdt foar in promoasje ta spesjaal agint. Mar Medina hat ek al liigd by har sollisitaasje, oars hie se nea oannommen wurden as analiste. Dat is in misdriuw, en King seit dat hy it iennichste is dat tusken har en in finzenisstraf yn stiet. Hy wol dat sy foar him in ûndersyk útfierd dêr't gjin dossier fan oanlein wurdt en dêr't allinnich sy beiden fan ôfwitte. King wol witte wa't de boekhâlder is dy't foarkomt op ferskate foto's mei topfigueren út 'e ûnderwrâld en lieders fan terroristyske organisaasjes. Hy jout Medina in moanne de tiid om dat út te sykjen, mei't hysels oer in pear moanne mei pinsjoen giet. As it har slagget, sil hy derfoar soargje dat har kriminele ferline út 'e kompjûterbestannen fan 'e oerheid ferdwynt. Slagget it har net, dan jout er har oan.

In man dy't de skûlnamme Christian Wolff brûkt, wennet op 't heden yn Plainfield, yn 'e Amerikaanske steat Illinois. Hy wurket as boekhâlder en hat in eigen kantoar yn in lyts pleatslik winkelsintrum, dêr't er temûk eigner is alle winkels en restaurants. Hy brûkt it wikelsintrum as dekmantel foar it wytwaskjen fan it kontante jild dat er kriget út syn echte wurk. Hy is nammentlik spesjalisearre yn forinsysk boekhâlden: it útsykjen wêr't 'it lek' sit by organisaasjes dy't troch frauduleuze praktiken fan wurknimmers jild kwytreitsje. De organisaasjes dêr't er foar wurket, binne de maffia en oare foarmen fan 'e organisearre misdie, lykas grutte drugsdealers, en teffens terroristyske islamistyske groepen. Syn boekhâldkundige fermogens lykje him suver ûnoantaastber te meitsjen yn sokke gefaarlike fermiddens, mar it docht bliken dat er sels ek ekstreem goed traind is as skerpskutter en yn man-tsjin-mangefjochten. In mysterieuze frou oan 'e tillefoan, dy't in Britsk-Ingelsk aksint hat, fungearret as tuskenpersoan tusken Wolff en syn kriminele wurkjouwers.

Wolff funksjonearret min ofte mear normaal, hoewol't syn wurkfocus better is as dy fan 'e measte minsken. Mar as er jûns nei hûs giet, docht bliken dat er swier autistysk is. Yn in rige flashbacks wurdt syn libbensferhaal ferteld. Doe't er in jonge fan in jier as njoggen wie, woe syn mem, dy't net mear mei him omgean koe, him yn Harbor Neuroscience pleatse, in ynstelling foar swier autistyske bern. Syn heit, in kolonel by de ôfdieling Psychologyske Oarlochfiering fan it Amerikaanske Leger, lei dêr lykwols it near op. As syn soan oergefoelich wie foar prikels, moast er dêr neffens him krekt folle mear oan bleatsteld wurde om deroan te wennen, ynstee fan him yn in prikelearm fermidden op te bergjen sadat er nea oan 'e maatskippij dielnimme kinne soe. Dat mieningsferskil late ta in brek yn it houlik fan Wolff syn âldelju. Syn mem ferliet har húshâlding en ferbriek alle kontakt, wylst Wolff en syn in jier jongere broer Braxton efterbleaune by harren heit. Yn opdracht fan syn heit stelde Wolff himsels neitiid bleat oan alderhanne auditive en fisuele prikels, in foarm fan terapy dy't him yndie liek te helpen om himsels yn 'e wrâld te rêden. Tagelyk liet de kolonel syn beide soannen traine yn alderhanne fjochtsporten.

Tink derom: Yn de tekst hjirûnder wurdt de ôfrin fan de film beskreaun.
As jo de film sels sjen wolle, is it mooglik better dat jo it no folgjende diel fan 'e plotbeskriuwing (earst noch) net lêze.

Syn tuskenpersoan trunet Wolff oan om noris in kear net foar kriminelen of terroristen te wurkjen, mar foar in gewoane, legale elektroanikafabrikant yn Chicago, deunby syn wenplak. Wolff jout ta en sy bringt him yn kontakt mei Living Robotics, in bedriuw dat elektroanyske protezes makket foar feteranen en oare lju dy't in amputaasje ûndergien hawwe. Wolff moetet koart Lamar Blackburn, de oprjochter fan it bedriuw, mar hy wurdt oannommen troch Lamar syn suster Rita Blackburn en finansjeel direkteur Ed Chilton. Sy fertelle him dat in wurknimster fan 'e administraasje-ôfdieling, Dana Cummings, ûngeregeldheden yn 'e boekhâlding ûntdutsen hat. Dana wurdt oan Wolff tawiisd as assistinte, mar hy stjoert har fuort om't er gjin ferlet hat fan help en de sitewaasje sels beoardielje wol. Letter, yn it middeisskoft, makket Dana in praatsje mei Wolff. Sa fertelt se him wat oer harsels en har âldelju, lykas dat har heit leaver Dogs Playing Poker fan Cassius Marcellus Coolidge (rûnom beskôge as kitsch) hat as echte keunst. Wolff prebearret in grapke te meitsjen troch te bearen dat hy Dogs Playing Poker ek prachtich fynt, mar syn gefoel foar humor is Dana te dreech, dat hy jaget har ûnbedoeld fuort.

Wolff hellet de nacht troch om fyftjin jier oan boekhâlding nei te rinnen en ûntdekt dat der by Living Robotics foar goed $61 miljoen fertsjustermoanne is. Hy fertelt dat oan Dana, dy't út nijsgjirrigens de oare moarns delkomt om te sjen wat er útfûn hat. Ek rapportearret er de útkomst oan Rita Blackburn, mar hy seit derby dat er noch net de identiteit fan 'e dief bepaald hat. Dêrnei nimt er de rest fan 'e wurkdei frij om by te sliepen. Dy nacht wurdt der by finansjeel direkteur Chilton ynbrutsen troch in trio hiermoardners, dy't him mei it drigemint om syn (sliepende) frou wat oan te dwaan, twinge om himsels tekoart te dwaan. Chilton hat sûkersykte en moat himsels mei in oerdoazis ynsuline ynspuitsje. Hy wurdt de oare moarns dea oantroffen troch syn frou, dy't krekt as de autoriteiten oannimt dat it om in ûngelok giet. Wannear't Wolff dy deis wer by Living Robotics arrivearret om fierder yn 'e boekhâlding te graven nei de identiteit fan 'e dief, blike al syn op whiteboards kwattele berekkenings útwiske te wêzen, wylst de argyfstikken wer opromme binne. Lamar Blackburn seit tsjin him dat der fierder gjin ferlet mear is fan syn tsjinsten. Syn freon Ed Chilton hie nammentlik al tritich jier sûkersykte, dat hy leaut net dat er himsels ea by fersin in oerdoazis ynsuline ynspuitsje soe. It wie dúdlik opsetlike selsmoard en dêrmei in ferkapte skuldbekentenis. Blackburn fynt it net nedich om Chilton syn namme fierder troch it slyk te heljen.

Dat pleatst Wolff yn in tige ûnoangename sitewaasje, want it is ien fan 'e twangneuroazes dêr't er troch syn autisme mei oanhelle is, om altyd dingen ôfmeitsje te moatten. As er in taak net foltôgje kin, bliuwt dat him dwerssitten op in manear dy't him suver letterlik yn 'e pine set en boppedat behinderet dat er oan in nije taak begjinne kin. Hy ferkeart sadwaande yn in steat fan oerstjoerens as der him in dei letter twa hiermoardners tenei komme. Wolff rommet harren allebeide út 'e wei. As er oan 'e weet besiket te kommen hokker fan syn eardere kriminele kliïnten him dea hawwe wol, ûntdekt er dat de mannen net inkeld op him ôf stjoerd binne, mar ek op Dana Cummings. Dat betsjut fansels dat de dief by Living Robotics net Ed Chilton wie, want de iennichste reden dat immen fan Living Robotics Wolff dea hawwe wol, is om foar te kommen dat Wolff útfynt wa't de echte dief is. Wolff skillet syn tuskenpersoan op, dy't mei in klik fan in mûs Christian Wolff weiwurde lit en in nije falske identiteit foar de boekhâlder aktivearret. Hy hoecht net werom nei hûs, want dêr is neat foar him. Alles fan wearde yn syn libben bewarret er net thús mar yn in grutte Airstream-caravan dy't er ûnder in oare skûlnamme yn in opslachromte stean hat en sa efter de auto heakje kin. Syn tuskenpersoan fiteret him oan om op slach te ferdwinen, mar Wolff is ûnderwilens in bytsje fereale rekke op Dana, dat hy beslút har te rêden.

Syn tuskenpersoan dirigearret Wolff nei Dana har adres ta, dêr't twa hiermoardners krekt op dat stuit har appartemint binnenkringe om har te deadzjen, wylst twa oaren de wacht hâlde op 'e gong. Wolff makket sûnder folle swierrichheden it hiele kwartet fan kant en nimt Dana mei. Om oan jild en fjoerwapens te kommen, moat er oan by syn caravan, dêr't in kastke fol leit mei kontant jild, wylst in oare romte yn gebrûk is as arsenaal. Dana, dy't net bûtendoar wachtet, sa't har hjitten is, mar deryn komt, fangt behalven fan it jild en de wapens ek in glimp op fan in skilderij dat in orizjinele Jackson Pollock liket te wêzen. (Wolff leit letter út dat guon fan syn kliïnten him yn natuera betelje.) Hy dûkt mei Dana ûnder yn in djoer hotel, dêr't se by in yntym momint hàst ta in tút komme. Mar de kâns giet foarby om't Wolff net it fermogen hat om echt kontakt mei oare minsken te meitsjen, ek al fielt er dêr wol oantriid ta. Hy beslút dat it nea wat wurde kin tusken him en Dana en lit har efter as se sliept om 'e wrâld wer feilich foar har te meitsjen. Mei't Chilton dúdlik net de dief wie, fertinkt er no Rita Blackburn. Mar as er by thús arrivearret, treft er har dea oan mei in skotwûne yn 'e foarholle. Hy folget har moardner in skoftke, dy't er werom liket te kennen, mar rekket de man kwyt wannear't dy foar it ferstân kriget dat er in skaad hat en it fjoer iepenet.

Underwilens hat spesjaal aginte Medina útdoktere dat Wolff in rige skûlnammen brûkt dy't de nammen ferneamde histoaryske wiskundigen binne (ûnder wa Carl Gauss, Lewis Carroll en Christian Wolff). Op basis dêrfan giet se yn 'e argiven fan 'e Internal Revenu Service, de Amerikaanske belestingtsjinst, op ûndersyk út. Se ûntdekt dat it boekhâlderskantoar en de oare saken yn it winkelsintrum yn Plainfield in dekmantel foar wytwaskjen binne. Tegearre mei direkteur King set se nei Illinois ta, dêr't se koart nei de mislearre oanslach op Wolff arrivearret. Mei in groep oare aginten trochsykje se Wolff syn hûs, dat sa spartaansk ynrjochte is dat der neat te finen is. Nei't de oaren ôfsette, bliuwe King en Medina efter. King nimt Medina dan yn fertrouwen en bychtet oan har op dat syn eigen bliksemkarriêre by FinCEN op leagens basearre is.

It begûn allegearre doe't yn 2003 yn in krematoarium yn Kankakee (Illinois) twa ûnbekende militêren de útfeart fan in pleatslike skoaljuffer besochten. It wiene in âldere man, mei de rang fan kolonel, en in jongere ofsier. De beide mannen waarden fersocht om fuort te gean, mei't dit in priveetsjinst wie. Dat wegeren se en wat getriuw rûn út op slaanderij, wêrby't de jongere ofsier seis doarpsbewenners it sikehûs yn sloech. In sjitgrage helpsheriff loek syn revolver en besocht de ofsier del te sjitten, mar de kolonel stapte kalm yn 'e baan fan 'e kûgel en waard deadlik rekke. Letter die bliken dat kolonel de eks-man fan 'e skoaljuffer wie en de jongere ofsier harren soan. Mei't er in tsjinjend militêr wie, kaam er net foar de rjochtbank, mar foar de kriichsried. Hy waard ta in jierrenlange finzenisstraf feroardiele. Neffens King binne út 'e ferslaggen fan it hiele barren troch it Leger safolle wurden swartlakke, dat it restant ûnlêsber is. Hy hat gjin idee wat de wiere namme fan 'e ofsier wie, noch hoe't syn heit hiet, mei't bliken die dat de namme dêr't syn eks-frou him ûnder koe ek in skûlnamme wie.

Yn elts gefal waard al rillegau dúdlik dat de finzene briljant wie op it mêd fan boekhâlden. Hy waard troch út 'e legerfinzenis útliend oan FinCEN om te helpen by ûndersiken. Sa kaam er yn 'e kunde mei Francis Silverberg, de boekhâlder fan 'e Gambino-maffiafamylje út New York. Silverberg hie syn baas, Grutte Tony Bazano, jierrenlang trou tsjinne, oant Bazano him as in swakke link begûn te beskôgjen om't er wat op jierren rekke. Dat, hy joech syn soan, Lytse Tony Bazano, opdracht om Silverberg te likwidearjen. Lytse Tony makke der in potsje fan en Silverberg ûntkaam, socht beskerming by de autoriteiten en waard ynformant. Hy siet yn itselde tichthûs as de boekhâlder en dielde in sel mei him. De âldman waard in mentor foar de boekhâlder, oant syn kontaktpersoan by FinCEN ferfongen waard troch in oare spesjaal agint.

De nije kontaktpersoan koe it allegearre net safolle skele wat Silverberg te fertellen hie, dat doe't de âldman frijkaam, moast er himsels mar rêde ynstee fan dat er, sa't him earder ûnthjitten wie, yn it tsjûgeskermingsprogramma opnommen waard. Lytse Tony Bazano, dy't op wraak út wie om't syn heit troch tadwaan fan Silverberg efter de traaljes bedarre wie, liet de âldman ûntfiere en martele him eigenhandich dea. Doe't de boekhâlder letter fan in sipier hearde wat der mei syn freon bard wie, briek er út, reizge nei New York en makke dêr Lytse Tony Bazano en njoggen fan syn mannen ôf mei harren eigen wapens. Dat wie yn 2006.

De spesjaal agint fan FinCEN waans beslút it west hie om Silverberg gjin beskerming mear te jaan, fielde him neitiid alderaaklikst, mei't er besefte dat er ferantwurdlik wie foar de dea fan 'e âldman. It wie in loaie, weardeleaze agint, dy't yn syn hiele karriêre noch nea wat fan belang út 'e wei set hie. Mar hy melde himsels oan foar in team dat troch ôflústerjen bewiismateriaal tsjin Lytse Tony Bazano besocht gear te bringen. Sadwaande wie hy as earste op it plak delikt, dêr't er op in hier nei it alfde slachtoffer fan 'e boekhâlder waard. De agint identifisearre himsels as oerheidsagint, joech syn namme en smeekte om genede om't er in gesin hie. De boekhâlder stelde him dêrop de fraach: "Binne jo in goede heit, Raymond King?" En dêr koe King ta syn ferromming befêstigjend op antwurdzje: hy wie in minne agint, mar in goede heit. De boekhâlder liet him libje. Neitiid krige King út en troch in net te trasearjen tillefoantsje fan in frou mei in Britsk-Ingelsk aksint, dy't him ynformaasje joech oer kriminele bindes en terroristyske organisaasjes.

King besefte dat de ynformaasje fan 'e boekhâlder kaam, mar hy besleat it spultsje mei te spyljen. Hy kamûflearre de ynformaasje dy't er krige mei ferfalske ferslaggen fan ûndersiken dy't er nea dien hie en ferklearre sa syn hommelse súksessen ex postfacto mei leagens. Hy begûn al rillegau promoasje te meitsjen en klom op ta de posysje fan direkteur. Mar no sil er mei pinsjoen, en hy hat Medina útsocht om him op te folgjen as kontaktpersoan fan 'e boekhâlder. Medina wol dêr earst neat fan witte, mar nei't King in skoftke op har ynpraten hat, begjint se te wifeljen. Dan giet de tillefoan. Medina nimt oan. It is de Britske frou, dy't blike lit dat se fia ferburgen kamera's yn it hûs fan Wolff tsjûge west hat fan it hiele petear tusken de beide aginten. Se hjit Medina: "Skriuw mar op: Living Robotics..."

Wolff arrivearret ûnderwilens by de filla fan Lamar Blackburn, de iennichste oerbleaune persoan dy't efter de fertsjustering by Living Robotics sitte kin. De sakeman hat in team fan hierlingen yn 'e earm nommen om him te beskermjen, dêr't ek de seis hiermoardners ta hearden dy't Wolff earder al út 'e ljochten holpen hat. Wannear't de nacht fallen is, fjochtet er him in wei it hûs yn, wêrby't er de iene hierling nei de oare om hals bringt. De lieder fan it team wurdt dêrby almar ûnrêstiger: net om't er oer syn eigen libben ynsit, mar om't er de fjochtstyl fan 'e ynkringer weromken. Wannear't Wolff op it lêst ferwûne rekket by ien fan 'e konfrontaasjes, wol de op ien nei lêste hierling dêr gebrûk fan meitsje om him út te skeakeljen. Hy wurdt lykwols deasketten troch syn eigen lieder, dy't nimmen oars is as Braxton, de broer fan 'e boekhâlder. Braxton is noch altyd poerrazen dat syn broer mei it ûnnedige besyk oan 'e útfeart fan harren mem de dea fan harren heit feroarsake hat, dat de bruorren reitsje slaande deilis. Mar úteinlings fermoedsoenje se har mei-inoar, ta argewaasje fan Lamar Blackburn. Dyselde stekt dêrop in narsistysk ferhaal ôf wêryn't er útwreidet oer de reden wêrom't syn libben wichtiger is as dat fan oare lju, te witten: om't hy in fyzjonêr is waans útfinings (op it mêd fan protezes) it bestean fan withoefolle minsken posityf beynfloedzje sille. As Wolff him troch de holle sjit, is dat sawol om syn taak ôf te meitsjen as om him stil te krijen. De bruorren, dy't inoar sûnt 2003 net sjoen hawwe, prate ôf om inoar oer in wike te treffen.

By Harbor Neuroscience, de ynstelling foar autistyske bern dêr't Wolff, sa hat bliken dien út it ûndersyk fan Medina, yn in jier tiid mear as $1 miljoen oan skonken hat, komme in heit en mem om te sjen oft it wat is foar harren soan. It gesin moetet Justine, de mei in slimme foarm fan autisme oanhelle dochter fan 'e oprjochter fan 'e ynstelling, dy't sels net prate kin, mar dat fia in kompjûterstim docht. De heit fan it gesin, dy't wurk hat yn 'e ynformaasjetechnologysektor, kin der net oer út hoe'n djoere kompjûter oft Justine hat; neffens him kin se dêrmei sels it kompjûteresysteem fan it Pentagon wol hacke. Justine har heit, dy't alhiel gjin ferstân fan kompjûters hat en de wurden fan 'e man foar in oerdriuwing hâldt, seit dat syn ynstelling golle donoaren hat. Se litte it jonkje op 'e noed fan Justine efter wylst de heit en mem in rûnlieding krije fan Justine har heit. Wannear't Justine fia de kompjûter mei it jonkje begjint te praten, docht se dat mei in bekende Britsk-Ingelske stim.

King en Medina romje de brokstikken op by Living Robotics en losse dêrmei fuortendaliks ek de moarden op Ed Chilton en Rita Blackburn op. Wannear't oer de saak in parsekonferinsje holden wurdt, nimt Medina it wurd. Se wifelet oant it lêste momint oer wat se dwaan sil, mar liicht dan tsjin 'e gearklofte media dat de saak oplost is troch deagewoan speurwurk. Dêrmei akseptearret se har rol as King syn opfolger.

Dana Cummings, dy't har stikkensketten appartemint oan it opkallefaterjen is, ûntfangt in ynpakt skilderij. As se it iepenmakket, is it in print fan Dogs Playing Poker. Even tinkt se dat it wer Wolff syn aparte humor is, mar dan wurdt se gewaar dat it linnen fan Dogs Playing Poker oer in oar skilderij hinne spand is. As se it boppeste doek stikken skuort, blykt der it orizjinele skilderij fan Jackson Pollock ûnder te sitten dêr't se yn 'e caravan in glimp fan opfongen hie. Har mûle falt iepen fan ferbjustering. Underwilens riidt de boekhâlder mei syn caravan de ûndergeande sinne yn 'e mjitte.

Rolferdieling

haadrollen

personaazje	akteur/aktrise
de boekhâlder / Christian Wolff	Ben Affleck
Dana Cummings	Anna Kendrick

byrollen

personaazje	akteur/aktrise
spesjaal aginte fan FinCEN Marybeth Medina	Cynthia Addai-Robinson
spesjaal agint fan FinCEN Raymond King	J.K. Simmons
Lamar Blackburn	John Lithgow
Braxton	Jon Bernthal
Francis Silverberg	Jeffrey Tambor
de jonge boekhâlder	Seth Lee
de jonge Braxton	Jake Presley
de kolonel (de heit fan 'e boekhâlder en Braxton)	Rob Treveiler
Rita Blackburn	Jean Smart
Ed Chilton	Andy Umberger
Justine	Alison Wright
de jonge Justine	Izzy Fenech
Lauren Alton (mem fan 'e boekhâlder)	Mary Kraft
burdige hiermoardner	Tait Fletcher
de heit fan Justine	Jason Davis
Frank Rice (boer)	Ron Prather
Dolores Rice (boerinne)	Susan Savoie
spesjaal agint Sorkis	Fernando Chien

Produksje en distribúsje

Produksje

The Accountant waard regissearre troch Gavin O'Connor nei in senario fan Bill Dubuque. As produsinten wiene Lynette Howell Taylor en Mark Williams by it projekt belutsen foar de filmstudio's Electric City Entertainment, RatPac-Dune Entertainment en Zero Gravity Management. Foar de film wie in budget beskikber fan $44 miljoen. De kamerarezjy wie yn 'e hannen fan Seamus McGarvey, en de filmmuzyk waard fersoarge troch Mark Isham.

Opnamen

De opnamen setten op 19 jannewaris 2015 útein en duorren oant en mei 2 april fan dat jier. Der waard op ferskate lokaasjes filme yn 'e stêdekloft fan Atlanta, yn 'e Amerikaanske steat Georgia (en alhiel net yn Illinois, dêr't de film eins spilet). Sa gie de Academy of Medicine fan it Technologysk Ynstitút fan Georgia (yn 'e folksmûle Georgia Tech) troch foar it gebou fan it Ministearje fan Finânsjes, wylst it Klaus Advanced Computing Building, ek in ûnderdiel fan Georgia Tech, brûkt waard foar it haadkantoar fan Living Robotics. De sênes yn 'e kantoaren fan FinCEN waarden opnommen yn it Martin Luther King Jr. Federal Building yn Atlanta. Yn it lêste shot fan 'e film is de Bethany Bridge yn Cartersville (Georgia) te sjen. Yn guon aksjesênes waard gebrûk makke fan 'e Yndonezyske fjochtsport pencak silat.

Distribúsje

De distribúsje fan The Accountant waard fersoarge troch Warner Bros. De film gie op 10 oktober 2016 yn Grauman's Chinese Theatre yn Hollywood yn premiêre, en iepene dêrnei op 14 oktober yn 'e Amerikaanske bioskopen. In aparte Jeropeeske premiêre waard op 17 oktober yn Londen holden.

The Accountant kaam op 27 desimber 2016 beskikber as digitale download en waard op 10 jannewaris 2017 útbrocht op dvd en blu-ray. In ferboeking fan it senario, yn 'e foarm fan in grafyske roman, waard op 9 july 2015 al publisearre troch Vertigo, in ymprint fan útjouwerij DC Comics dy't eigendom is fan Warner Bros.

Untfangst

Fan 'e filmkritisy krige The Accountant mingde resinsjes. Richard Roeper fan 'e Chicago Sun-Times joech de fim 3¹/₂ fan 4 stjerren. Hy skreau: "Healwizens fiert de boppetoan yn [dizze film], in yntinse, komplekse, dûnker fermaaklike en mei aksjesênes ôfmakke skriller, wêryn't ien en ien net altyd twa is, mar wat kin dat wat skele as je in PROTTE WILLE hawwe." Oan 'e oare kant fan it spektrum liet Richard Brody The Accountant yn it tydskrift The New Yorker alhiel ôfrinne. Hy woe hawwe: "Dizze spanningsfrije skriller […] steapelet ferhaallinen op as wie it in te deeglik boud kaartehûs, dat ynstoart by it earste wolfertsjinne útskatterjen fan bespotting."

Vince Mancini fan Uproxx kwalifisearre The Accountant as "in trochsichtich besykjen om in takomstige mediafranchise op te setten en om autistyske bern har eigen superheld te jaan." Hy beprakkesearre dat "der oprjochte leaflikens yn dat lêste" siet, wat makke dat er him "op it earste punt bekearde". Hy konkludearre: "Kûgels yn 'e foarholle, wiskundige fraachstikken en pynlike sosjale ynteraksjes? Ik jou my derfoar op. Fan 'e beide films mei Ben Affleck dy't dit jier oant no ta útkommen binne, The Accountant en Batman v Superman, hat The Accountant fierwei it grutste potinsjeel foar in franchise."

Op 'e webside Rotten Tomatoes, dy't resinsjes sammelet, hat The Accountant in midsmjittich goedkarringspersintaazje fan 53%, basearre op 285 ûnderskate resinsjes. De konsensuskrityk fan 'e webside, gearstald út al dy resinsjes, stelt: "[Dizze film] skriuwt in tawijde aktearprestaasje fan Ben Affleck ôf, mar lit de sjoggers efter mei in ûnlaat projektyl fan in aksjeskriller dy't te lijen hat ûnder in ferskaat oan ûnferstannige konklúzjes." Op Metacritic, de wichtichste konkurrint fan Rotten Tomatoes, behellet The Accountant in goedkarringspersintaazje fan 51%, basearre op 45 resinsjes. Bioskoopbesikers dy't nei it sjen fan 'e film befrege waarden troch CinemaScore, joegen The Accountant lykwols in 9¹/₂ oant in 10 op in skaal fan 1 oant 10.

Resultaat

Opbringst

The Accountant brocht yn 'e bioskopen yn 'e Feriene Steaten en Kanada $86,3 miljoen op, en yn alle oare lannen en territoaria $68,9 miljoen. Wrâldwiid kaam de opbringst dêrmei út op $155,2 miljoen. Ofset tsjin it budget fan $44 miljoen betsjut dat in winst fan $111,2 miljoen, hoewol't dêr de marketingkosten noch wol ôf moatte.

Fan jannewaris oant en mei maart 2017 waarden fan The Accountant 463.367 dvd's en 313.279 blu-rayskiven ferkocht, mei in mienskiplike wearde fan $19,2 miljoen. Yn april 2018 waard troch de Motion Picture Association of America (MPAA) bekendmakke dat The Accountant yn 'e Feriene Steaten de meast ferhierde film fan 2017 wie, sawol digitaal as op dvd/blu-ray.

Prizen

By de Saturn Awards waard The Accountant yn juny 2017 nominearre foar de priis yn 'e kategory bêste skrillerfilm.

Ferfolchfilm

De Wikipedy hat ek in side The Accountant 2.

Yn juny 2017 waard bekendmakke dat der in ferfolch op The Accountant yn ûntwikkeling wie. Dêrfoar soe Bill Dubuque op 'e nij it senario skriuwe. Der wiene lykwols wat fertragings, û.o. troch it hichtepunt fan 'e koroanapandemy yn 2020–2021, doe't hast alles yn 'e Amerikaanske filmyndustry op syn gat lei. Lang om let kaam yn septimber 2021 it berjocht dat it projekt trochgean koe en dat Gavin O'Connor wer plaknimme soe yn 'e regisseursstoel. Ben Affleck, Jon Bernthal en Cyntia Addai-Robinson kearden werom yn 'e haadrollen as de boekhâlder, syn broer Braxton, resp. spesjaal agint Medina. De film kaam op 25 april 2025 ûnder de titel The Accountant 2 út yn 'e Amerikaanske bioskopen.

Keppelings om utens

(in) Ynformaasje oer The Accountant yn 'e Internet Movie Database (IMDb)

Boarnen, noaten en referinsjes

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side.