Streekte gril

streekte gril
	; Folwoeksen fûgel yn briedkleed.
taksonomy
ryk	dieren (Animalia)
stamme	rêchstringdieren (Chordata)
klasse	fûgels (Aves)
skift	wilstereftigen (Charadriiformes)
famylje	snipfûgels (Scolopacidae)
skaai	grillen (Calidris)
soarte
Calidris melanotos
	Vieillot, 1819
	IUCN-status:
ferspriedingsgebiet
	briedfûgel; trekfûgel wintergast ;

De streekte gril (Calidris melanotos) is in fûgel út de famylje fan 'e snipfûgels (Scolopacidae).

Skaaimerken

De soarte liket op 'e yn itselde ferspriedingsgebiet foarkommende Sibearyske gril (Calidris acuminata), dy't lykwols net ta deselde klade yn it skaai heart. De streekte gril is in frij grutte gril fan 19 oant 23 sm lang mei in wjukspanwiidte fan 37 oant 46 sm en in griisbrune rêch, dy't simmerdeis it meast brún is by it mantsje en winterdeis grizer. De streekte gril hat in griis boarst dat oan 'e ûnderkant skerp is ôftekene. De poaten binne gieleftich en de snaffel is oliifkleurich mei in donkere punt. Mantsjes binne trochstrings swierder as wyfkes. Yn it briedkleed ha mantsjes boppedat in swarter boarst mei wite plakjes.

Jonge fûgels ha in opfallender patroan op 'e boppekant, mei oranjebrune tinen en wite streken op 'e mantel.

De soarte is te ûnderskieden fan 'e Sibearyske gril troch de skerp ôftekene boarstbân, de minder opfallende wynbraustreek en de brunere, minder readbrune krún.

Fersprieding en leefgebiet

De streekte gril briedt yn noardlik Sibearje, westlik en noardlik Alaska en noardlik Kanada. It is in trekfûgel dy't oerwinteret yn Austraalje, Nij-Seelân en Súd-Amearika. It leefgebiet yn 'e simmer bestiet út de arktyske, fochtige en ryk begroeide tûndra. Yn 'e oerwinteringsgebieten ferbliuwt de fûgel yn in grut tal soarten somp-lannen, sawol mei sâlt as brak wetter, lykas waad, sompen lâns rivieren en marren, wiete greiden, lagunes en ouwers fan marren op heechflakten oant op 4500 m boppe seenivo.

Yn Jeropa is de soarte in regelmjittige dwaalgast. Yn Nederlân is it oantal waarnimmingen by de trek fan 'e fûgel (foaral yn 'e moannen maaie en septimber en oktober) de lêste desennia tanommen. De measte fûgels wurde yn 'e kustgebieten sjoen.

Briedgedrach

Streekte grillen briede yn 'e koarte Sibearyske simmer fan juny oant augustus en meitsje ûndjippe, mei gers en blêd beklaaide, kûltsjes as nêst. Se sitte goed ferburgen yn 'e grûn en binne dreech te sjen yn it lânskip. In lechsel bestiet út fjouwer aaien, dy't troch it wyfke útbret wurde. De piken wurde ek troch it wyfke grutbrocht.

Status

De wrâldpopulaasje waard yn 2023 op 4.000.000 oant 15.000.000 folwoeksen fûgels rûsd. It is net bekend hoe't de populaasje him ûntwikkelet, mar de IUCN klassifisearret de soarte as net bedrige (Least Concern) op 'e Reade List.

Boarnen, noaten en referinsjes

Boarnen, noaten en/as referinsjes:

Wikimedia Commons

Ofbylden dy't by dit ûnderwerp hearre, binne te finen yn de kategory Calidris melanotos fan Wikimedia Commons.