Staro Golûtvin-kleaster

Ut Wikipedy
Springe nei navigaasje Springe nei sykjen
Staro-Golûtvin kleaster

Старо-Голутвин монастырь

Богоявленский Старо-Голутвин мужской монастырь.jpg
lokaasje
lân Flag of Russia.svg Ruslân
oblast Flag of Moscow oblast.svg Moskou
plak Flag of Kolomna district.png Kolomna
bysûnderheden
type bouwurk kleaster
boujier 14e iuw (stifting)
arsjitekt F.N. Malinovski (katedraal)
webside Side kleaster

It Epifany Staro-Golûtvinkleaster (Russysk: Старо-Голутвин монастырь) is in kleaster fan de Russysk-Otterdokse Tsjerke oan de râne fan de russyske stêd Kolomna. It kleaster leit by it plak dêr't de Moskva gearrint mei de Oka en waard stifte tsjin it ein fan de 14e iuw. It kleaster wie noch net lang lyn in boufal, mar is sûnt de weromjefte yn 1993 oan de Russysk-Otterdokse Tsjerke restaurearre.

Yn 1995 oant 2012 waarden in tal gebouwen fan it kleaster brûkt troch it Otterdokse Teologyske Seminaarje fan Kolomna oant it nijbou krige op it eastlike diel fan it kleasterkompleks.

Skiednis[bewurkje seksje | boarne bewurkje]

It kleaster is ien fan de kleasters dy't ûnstie troch de asetyske aktiviteiten fan de hillige Sergius fan Radonezj. It waard op fersyk fan Dmitri Donskoj stifte troch Sergius fan Radonezj en ien fan syn learlingen, Grigori Kolomenski, waard de earste abt fan it kleaster. Neffens de monastike tradysje hie Sergius net allinne de lokaasje foar it te bouwen kleaster útsocht, mar soed er ek de earste stien lein hawwe foar de earste oan de Epifany wijde tsjerke. Under de Epifanytsjerke binne noch altiten de resten fan it oarspronklike fûnemint fan de tsjerke te sjen, dy't yn de folksmûle de "stiennen fan de hillige" neamd wurde.

Epifanykatedraal en Sergiustsjerke

Ek soe de hillige de muontsen in plak oanwiisd dêr't in boarne wie. Dy boarne die noch oant yn de earste helte fan de 20e iuw tsjinst, doe't, nei't it kleaster sletten waard, de boarne troch de autoriteiten mei pún folsmiten waard. Oant de sluting yn 1929 bewarre it kleaster noch reliken fan Sergius fan Radonezj, lykas syn stêf, klean en it krús dat er om hie.

It kleaster oan de Oka hie as ien fan in krâns fan kleasters om Moskou hinne in funksje yn de ferdigening fan it lân tsjin de ynfallen fan de Tataren.

Ien fan de pseudo-goatyske tuorren fan de omfieming

It grutte grûnbesit soarge foar genôch ynkommen om it grutte kompleks te ûnderhâlden. Yn it midden fan de 17e iuw besiet it kleaster tsientallen doarpen en hie it net allinne besit yn de omkriten mar ek yn Moskou. Yn de 15e iuw krige it kleaster mear namme en de wolfeart naam ta. Der waarden in oan Sint-Sergius wijde wintertsjerke en in klokketoer boud (dy't tsjin it ein fan de 18e iuw ôfbrutsen waard). Yn de 16e iuw brocht tsaar Ivan de Ferskriklike in besite oan it kleaster en yn dy iuw woeks de bibleteek oan ta wol 123 manuskripten.

Sûnt 1707 mocht de abt fan it kleaster himsels archimandryt neame. Troch de konfiskaasje fan it grûnbesit yn 1764 troch Katarina de Grutte rekke it kleaster de ekonomyske ûnôfhinklikens kwyt. Yn 1775 besocht de keizerin it kleaster en hja joech de hôfarsjitekt F.M. Kazakov opdracht om in nije omfieming te bouwen, dy't opfalt troch meardere pseudo-goatyske tuorren.

It ôfskaffen fan it bisdom Kolomna yn 1799 hie ek ynfloed op it kleaster. De biskop ferhûze nei Tûla en mei him ferhûzen ek oare tsjerklike organisaasjes. De muontsen fan it kleaster moasten de leechsteande biskoplike gebouwen yn it kremlyn wer folje om tefoarren te kommen dat se yn it neigean rekken. Sa kaam it Golûtvin-kleaster leech te stean en stadichoan rekke it yn it neigean. Ien fan de tsjerken waard noch brûkt troch in preester as parochytsjerke.

Varsonofi fan Optina
Klokketoer

De metropolyt fan Moskou en Kolomna, Platon Levsjin, blaasde it kleaster troch syn beslút om it te ferienigjen mei it Rozjdestvenskykleaster nochris nij libben yn. Ut de opbringsten fan de grûn fan dat Moskouse kleaster koe it ûnderhâld betelle wurde. Der fûne restauraasjes plak, de Epifanykatedraal krige in fergulde ikonostaze, de klokketoer waard foltôge en krige op de twadde ferdjipping in tsjerke. Fierder waarden nij sellen foar de muotsen en in ûnderkommen foar pylgers boud.

Nei de perioaden fan wolfeart en bloei folge jimmeroan wer in tiid fan delgong. It kleaster makke foar it lêst in spirituele oplibbing mei yn de jierren 1912-1913, doe't Varsonofi fan Optina argimandryt fan it kleaster waard. Yn in jier tiid wist er it spirituele libben fan it kleaster te reorganisearjen. Hy lei kontakt mei filantropen, dy't finansjeel holpen om de tsjerken, de sellen foar de muontsen en de oare kleastergebouwen te renovearjen. It kleaster waard op 'e nij ien fan de spirituele sintra yn de omkriten fan Moskou. Varsonofi fan Optina ferstoar al yn 1913, mar yn dy koarte tiid hied er him tige populêr ûnder de minsken makke.

Yn 1929 waard it kleaster sletten, mar yn 1994 werom jûn oan it bisdom Moskou. Sûnt 1994 wurde der wer regelmjittich tsjinsten fierd. Yn 1995 ferhûze de Teologyske Skoalle fan it bisdom Moskou nei it kleaster, letter omfoarme ta it Otterdokse Teologyske Seminaarje fan Kolomna.

Gebouwen[bewurkje seksje | boarne bewurkje]

  • Epifanykatedraal, earste helte 18e iuw mei ûnder de katedraal de fûneminten fan de earste tsjerke.
  • Sergius fan Radonezjtsjerke mei oanslutend it gebou fan de abt út de 16e-19e iuw.
  • Klokketoer mei de oan de Presintaasje fan Marije wijde tsjerke en in oangrinzgjend gebou (19e iuw)
  • It westlike gebou (it eardere pylgerhûs) is 19e-iuwsk.
  • De muorren om it kleaster mei de goatyske tuorren fan de arsjitekt F.M. Kazakov datearje út it ein fan de 18e iuw.
  • Teologyske Seminaarje fan Kolomna en Tsjerke fan de trije grutte Hilligen (2008-2012)

Boarnen, noaten en referinsjes[boarne bewurkje]

Boarnen, noaten en/as referinsjes:

Dizze side is alhiel of foar in part in oersetting fan de Russysktalige Wikipedyside; sjoch foar de bewurkingsskiednis: ru:Старо-Голутвин монастырь