Spoarwjukgoes

Spoarwjukgoes
taksonomy
ryk	dieren (Animalia)
stamme	rêchstringdieren (Chordata)
klasse	fûgels (Aves)
skift	goeseftigen (Ansariformes)
famylje	einfûgels (Anatidae)
skaai	spoarwjukguozzen (Plectropterus) ; Stephens, 1824
soarte
Plectropterus gambensis
	Linnaeus, 1766
	net bedrige
ferspriedingsgebiet

De spoarwjukgoes (Plectropterus gambensis) is in fûgelsoarte út de famylje fan 'e einfûgels (Anatidae). De fûgel is de iennige soarte yn it skaai.

Skaaimerken

De spoarwjukgoes hat syn namme te tankjen oan 'e spoaren oan 'e wjukken. Mantsjes binne grutter as wyfkjes. De fûgels wege trochstrings 5,5 kg. Se ha boppedat in reade bult op 'e snaffel en foarholle. Aldere fûgels ha boppedat neakene reade dielen oan 'e hals.

Juvenilen binne bruner en glânzgje minder as folwoeksen fûgels.

Fersprieding

Spoarwjukguozzen libje yn in grut part fan Afrika besuden de Sahara. De fûgels binne ôfhinklik fan wetter en yn gebieten dêr't it drûch west hat binne de populaasjes, mar yn Súd-Afrika profitearre de fûgel fan it oanlizzen fan opslachmarren yn lânbougebieten.

Se binne te finen yn en by grutte rivieren en sompen, ynlânske marren mei in soad begroeiing en opslachmarren. Se ite de griene dielen en it sied fan in soad wetterplanten.

De briedtiid hinget fan 'e reintiid ôf en se bouwe in hiel ienfâldich nêst, dat bestiet út in djippe holte dy't it wyfke útgraaft. De fûgel kin syn nêst fûl ferdigenje, dêr't er de spoaren oan 'e wjukken by brûkt. It nêst bestiet út seis oant tsien krêmkleurige aaien. De piken komme nei in briedtiid fan 30 oant 32 dagen út. It hat bliken dien dat de piken allinnich troch it wyfke fersoarge wurde.

Undersoarten

De spoarwjukgoes is yn twa ûndersoarten ferdield:

Plectropterus gambensis gambensis
Plectropterus gambensis niger

De ûndersoarten ûnderskiede harren fan inoar troch de swartwite ferdieling fan 'e fearren.

Ofbyld	Undersoarte	Beskriuwing	Fersprieding
	P. g. gambensis (Linnaeus, 1766)	De nominaatfoarm hat folle mear wyt op 'e búk en flanken.	Fan Gambia oant Etioopje en nei it suden ta oant Angoala en Mozambyk.
	P. g. niger (Sclater, 1877)	Hat allinne in smelle wite búkstreek.	Súd fan 'e Sambezy rivier yn Namybje, Simbabwe, Súd-Afrika.

Status

De fûgel stiet op 'e Reade list fan 'e IUCN as net bedrige klassifisearre. Fernieling fan biotoop en eigenwillige jacht foarmje bedrigingen foar de soarte.

Keppeling om utens

Boarnen, noaten en referinsjes

Boarnen, noaten en/as referinsjes:

Sjoch foar boarnen en/of referinsjes: de:Sporngans

BirdLife, oproppen 9 febrewaris 2025.

Wikimedia Commons

Ofbylden dy't by dit ûnderwerp hearre, binne te finen yn de kategory spoarwjukgoes fan Wikimedia Commons.