Sileenske flamingo
| Sileenske flamingo | ||||||||||||
|---|---|---|---|---|---|---|---|---|---|---|---|---|
 | ||||||||||||
| taksonomy | ||||||||||||
| ||||||||||||
| soarte | ||||||||||||
| Phoenicopterus chilensis | ||||||||||||
| Molina, 1782 | ||||||||||||
| IUCN-status: hast bedrige
| ||||||||||||
| ferspriedingsgebiet | ||||||||||||
 |
De Sileenske flamingo (Phoenicopterus chilensis) is in grutte fûgelsoarte út 'e famylje fan 'e flamingofûgels (Phoenicopteridae). De soarte is nau besibbe oan 'e gewoane flamingo en de reade flamingo, mar ûnderskiedt him troch spesifike skaaimerken oan 'e poaten en de snaffel.
Skaaimerken
[bewurkje seksje | boarne bewurkje]De Sileenske flamingo wurdt likernôch 110 oant 130 sm heech en is de lytste yn it skaai. De fearren binne foar it grutste part rôze, mar de soarte is donkerder as de gewoane flamingo. In typysk skaaimerk fan 'e soarte binne de grize poaten mei opfallende rôze of reade knibbels en rôze hakken. De snaffel is foar mear as de helte swart, wat mear is as by oare flamingosoarten.
Juvenilen binne benammen griis-brún oant smoarch-wyt. De earste twa oant trije jier hawwe se noch gjin rôze yn 'e fearren. De poaten binne yn it begjin hielendal donkergriis oant swart.
| Skaaimerk | Sileenske flamingo | Rôze of gewoane flamingo | Reade flamingo |
|---|---|---|---|
| Wittenskiplike namme | Phoenicopterus chilensis | Phoenicopterus roseus | Phoenicopterus ruber |
| Grutte | De lytste (± 110-130 sm) | De grutste (± 120-150 sm) | Middelgrut (± 120-145 sm) |
| Poaten | Griis-eftich mei opfallende reade knibbels en swimfluesen | hielendal ljochtrôze | hielendal feller rôze/read |
| Snaffel | Foar mear as de helte swart | Allinnich de punt is swart | Punt is swart, basis is oranje/giel |
| Fearrekleed | Dúdlik rôze | De bleekste (hast wyt mei in rôze gloed) | De felfleurichste (djip rôze oant oranje/read) |
Fersprieding en biotoop
[bewurkje seksje | boarne bewurkje]De fûgel libbet yn Súd-Amearika. It ferspriedingsgebiet rint fan Sintraal-Perû oer de Andes nei Fjoerlân en East-Brazylje. Se libje benammen yn sâlte marren, lagunes en deunby de kust, faak op grutte hichten oant wol 4.500 meter boppe seenivo.
Bûten it natuerlike ferspriedingsgebiet yn Súd-Amearika komt de Sileenske flamingo ek as eksoat foar yn West-Europa, wêrûnder yn Nederlân en Dútslân. De fûgels binne oarspronklik ûntsnapt út bistetúnen of partikuliere kolleksjes en briede sûnt 1983 yn it Zwillbrocker Venn yn in natuergebiet yn Dútslân flak oer de grins by de Achterhoeke. It is de meast noardlike briedkoloanje fan flamingo's op 'e wrâld en se briede dêr op in eilantsje midden yn in grutte koloanje fan kobben, dy't harren beskermje tsjin rôfdieren lykas de foks. Nei it brieden binne de fûgels oer in grutte gebiet te sjen en wurde se ek wol yn it Lauwersmargebiet, de Fryske Iselmarkust en de Grevelingemar waarnommen.
Ekology
[bewurkje seksje | boarne bewurkje]Sileenske flamingo's binne sosjale fûgels dy't yn grutte koloanjes libje, soms fan tûzenen fûgels tagelyk. Se ite benammen lytse kreeften, algen en diatomeeën, dy't se mei harren spesjale snaffel út it wetter filterje.
It nêst bestiet út in bultsje dridze mei in kûltsje, dêr't meastentiids mar ien aai yn lein wurdt. Beide âlden briede it aai út en soargje foar it jong.
Status
[bewurkje seksje | boarne bewurkje]De soarte wurdt troch de IUCN klassifisearre as hast bedrige (Near Threatened). De populâasje stiet ûnder druk troch habitatferlies, fersmoarging en it sammeljen fan aaien troch de minske.
| Boarnen, noaten en/as referinsjes: | ||
|
