Satu Ketellapper

Ut Wikipedy
Satu Ketellapper
sporter
persoanlike bysûnderheden
echte namme Satu Ketellapper
nasjonaliteit Nederlânsk
bertedatum 1992
berteplak Wolvegea (Fryslân)
etnisiteit Nederlânsk
reg. identiteit Nedersaksysk
sportive ynformaasje
sport linedancing
debút 2009
wichtige prestaasjes
WK: 7x goud

Satu Ketellapper (Wolvegea, 1992) is in Frysk linedancer, dy't begjin 2016 foar de sânde kear wrâldkampioen waard yn har dissipline. Linedancing is yn Nederlân benammen bekend fan 'e koarte raazje út 'e njoggentiger jierren nei oanlieding fan 'e fideoklip by it nûmer Achy Breaky Heart, fan countrysjonger Billy Ray Cyrus. Mar wedstryd-linedancing wurdt allinnich dien (en net groepsgewiis) en hat suver mear wei fan ballroom-dûnsjen, mar dan op cowboylearzens.

Libben en karriêre[bewurkje seksje | boarne bewurkje]

Ketellapper sette mei sân jier al útein mei dûnsjen by in bernegroep yn it Drintske Wilhelminaoard. Doe't se tsien jier wie, gie se yn trening by de Railroaddancers yn Uffelte, dêr't se coacht waard troch Michel Platje. Nei't se har stúdzje moademaatklean yn Ljouwert ôfrûne hie, sette Ketellapper har wer nei wenjen yn Wolvegea, en lei se har hielendal op har sport ta.

Yn 2014 stoppen de Railroaddancers en gie Ketellapper op eigen krêft fierder mei in nije trener, Roy Hadisubroto út Almeare. Hja reizget geregeldwei nei it bûtenlân foar wedstriden, û.m. yn 'e Feriene Steaten, Japan, Súd-Koreä en ferskate Jeropeeske lannen. Yn Wolvegea treent hja by sportskoalle Fit & Funplaza, dêr't se gebrûk meitsje mei fan 'e dûnsseal, en dêr't se teffens freedtemiddeis lesjout oan in eigen jeugddûnsgroep.

Yn 'e earste wike fan jannewaris 2016 wûn Ketellapper yn it Amerikaanske Nashville yn har dissipline de wrâldkampioenskippen linedancing fan it UCWDC-bûn. It wie har earste wrâldtitel fan dy organisaasje, al wie se al wol seis kear earder wrâldkampioen wurden fan it Worldcdf-bûn. Begjin 2017 prologearre se har kampioenskip, mei twa foarskreaune dûnsen en in eigengoreografearre medley mei in ferhaal oer in opwynpop. Dêrby hie se in opwynkaai op 'e rêch dy't troch har broer en pake makke wie. It motorke dat de kaai bewege liet, siet ferburgen yn Satu har sjilet.[1]

Boarnen, noaten en referinsjes[boarne bewurkje]

Boarnen, noaten en/as referinsjes:
  1. Satu (yn 'e rubryk Bijeen Gelezen), yn: de Ljouwerter Krante, 10 jannewaris 2017, s. 22.