Salt Lake Temple

	Salt Lake Temple
	Lokaasje
lân	Feriene Steaten
steat	Utah
plak	Salt Lake City
adres	50 N West Temple
koördinaten	40° 46' N 111° 53' W
	Tsjerklike gegevens
tsjerkegenoatskip	Hilligen fan de Lêste Dagen
	Arsjitektuer
boujier	1853-1893
boustyl	neogotyk
hichte	64 meter
	Webside
	churchofjesuschrist
	Kaart
	;

De Salt Lake Temple is in timpel oan it Temple Square yn it sintrum fan Salt Lake City yn 'e Amearikaanske steat Utah. It is de grutste timpel fan 'e Tsjerke fan Jezus Kristus fan de Hilligen fan de Lêste Dagen.

Skiednis

Mei de bou fan 'e timpel waard op 6 april 1853 útein set. Brigham Young, de twadde presidint en profeet fan 'e Mormoanske mienskip, lei de earste stien foar it bouwurk. Ynearsten soe sânstien foar de bou út in lokaal stiengat brûkt wurde, mar it die bliken dat dy stien ûngeskikt wie. Sûnt 1858 waard granyt út de Little Cottonwood Canyon helle, sa'n 30 kilometer súdeastlik fan de boulokaasje. It ferfier dêrfan folge mei okseweinen en sûnt 1869 oer it spoar.

De bou rekke jimmeroan wat efterop en mei de ferfolging fan 'e Mormoanen kaam yn 'e jierren 1880 de bou hielendal stil te lizzen. Nei it ôfskaffen fan 'e polygamy yn 1890 en it dêrmei gearhingjende ein fan 'e ferfolging, koe it wurk wer trochgong fine. Doe't de bou lang om let foltôge wie, wijde Wilford Woodruff de timpel op 6 april 1893 yn; krekt fjirtich jier letter nei de earstestienlizzing.

De timpel is 64 meter heech en stiet op in grûnoerflak fan likernôch 23.500 m² en foarmet it sintrum fan it 40.000 m² grutte Temple Square. Lykas mei alle timpels fan 'e Mormoanske mienskip is de tagong allinne mooglik foar eigen leden mei tastimming fan harren eigen biskop.

It foar de timpel lizzende frij tagonglike Main Street Plaza waard yn 1999 foar USD 8.100.000 troch de stêd oan 'e Mormoanen ferkocht. Dêrmei waard de grûn partikulier terrein dêr't de Mormoanske regels jilde. Buorden meitsje de besiker dúdlik dat eltse persoan sûnder opjefte fan reden de tagong ta it terrein wegere wurde kin. Oanlieding foar it setten fan 'e buorden wie in frijend homopear, dy't op fersyk wegeren it hiem te ferlitten en fan hiemfredebrek beskuldige waarden.

Symbolyk

Yn it Mormoanske leauwe foarmet symbolyk in wichtich tema. Oan 'e timpel is in soad symboalyske dekoraasje te sjen. Ek binne der symboalen fan de frijmitselderij oanbrocht. De gouden ingel Moroni op de spits fan 'e toer symbolisearret de ingel út Iepenbiering 14:6.

Ynterieur

Yn 1912 besletten lieders fan 'e Mormoanske mienskip it boek The House of the Lord út te jaan. Dêryn waarden ek swart-wyt foto's fan it ynterieur publisearre. It boek folge nei't in jier earder in lid sûnder tastimming sels foto's fan it ynterieur makke hie. Ut de publikaasje stamme ûndersteande foto's fan it ynterieur.