RoboCop (film út 2014)

RoboCop
film
(Filmposter yn 'e Ingelske Wikipedy)
makkers
regisseur	José Padilha
produsint	Marc Abraham Eric Newman
senario	Joshua Zetumer Edward Neumeier Michael Miner
basearre op	RoboCop fan Paul Verhoeven
kamerarezjy	Lula Carvalho
muzyk	Pedro Bromfman
filmstudio	Metro-Goldwyn-Mayer Columbia Pictures Strike Entertainment
distribúsje	Sony Pictures Releasing
spilers
haadrollen	Joel Kinnaman Gary Oldman Abbie Cornish
byrollen	Michael Keaton Jackie Earle Haley Michael K. Williams Marianne Jean-Baptiste Samuel L. Jackson Patrick Garrow
skaaimerken
lân/lannen	Feriene Steaten
premiêre	12 febrewaris 2014
foarm	langspylfilm
sjenre	science fiction-film
taal	Ingelsk
spyltiid	118 minuten
budget en resultaten
budget	$100–130 miljoen
opbringst	$242,6 miljoen
filmsearje
filmsearje	RoboCop
● foarich diel	RoboCop 3

RoboCop is in Amerikaanske science fiction-film en superheldefilm út 2014 ûnder rezjy fan José Padilha, mei yn 'e haadrollen Joel Kinnaman, Gary Oldman en Abbie Cornish. De titel is in gearlûking fan 'e wurden "robot" en "cop", en betsjut safolle as "RoboSmearis". De film makket diel út fan 'e RoboCop-franchise en is in remake fan it oarspronklike RoboCop út 1987, dat regissearre waard troch Paul Verhoeven. It ferhaal folget plysjeman Alex Murphy, dy't krityk ferwûne rekket by in moardoanslach. De op jild beluste yndustrieel Raymond Sellars, waans plysjerobots yn 'e Feriene Steaten net talitten wurde, makket fan Murphy in cyborg: heal minske en heal masine, wêrmei't er in mêsk yn 'e wet fûn hat. It docht lykwols bliken dat minsklike emoasjes en in fierhinne masinaal lichem net kompatibel binne: RoboCop is allinne effektyf as roboatyske misdiebestrider as syn emoasjes útset wurde, mar kin inkeld effektyf mei minsken omgean as se oanset wurde. RoboCop krige fan 'e filmkritisy mingde resinsjes. Hoewol't de film yn 'e bioskopen yn 'e swarte sifers bleau, hiene de makkers der mear fan ferwachte. In plande ferfolchfilm waard dêrom skrast.

Plot

Yn 2028 revolúsjonalisearret it Amerikaanske bedriuwekonglomeraat OmniCorp de ynternasjonale oarlochfiering troch de yntroduksje fan roboatyske soldaten, dy't oarlochsgebieten "pasifisearje" troch as "fredeshanthaveners" te fungearjen. Yn 'e praktyk komt dat del op in faksistyske besettingsmacht fan net-tinkende, frijwol ûnkwetsbere masines, dêr't troch frijheidsstriders of terroristen (ôfhinklik fan jins perspektyf) net tsjinop te boksen falt. Mar OmniCorp fertsjinnet der jild as wetter mei, en dat is úteinlings wêr't it yn in frije kapitalistyske wrâld om draait.

Wat de boel foar it bedriuw lykwols frijwat bedjert, is dat yn 'e Feriene Steaten sels de Wet-Dreyfus fan krêft is, dy't de ynset fan militarisearre robots ferbiedt. Raymond Sellars, de miljonêr dy't eigner is fan OmniCorp, besiket op alderhanne manearen om dy wet ynlutsen te krijen, mar sels as er grou jild foar harren meiwurking biedt, wegerje de leden fan 'e Amerikaanske Senaat te dwaan wat er wol. Se binne nammentlik benaud foar de reäksje fan it Amerikaanske elektoraat, dat yn grutte mearderheid efter de Wet-Dreyfus stiet. Sellars beslút om gebrûk te meitsjen fan in mêsk yn dy wet, dy't nammentlik allinnich de ynset fan folslein masinale robots ferbiedt. As er lykwols in ynfalide rekke plysjeman yn in robot ynbout, is it net mear folslein masinaal. Faaks dat as de lju sjogge dat sa'n cyborg harren better beskermet tsjin 'e kriminaliteit, dat se dan fertrouwen yn robots krije. De haadwittenskipper fan OmniCorp, dr. Dennett Norton, ynformearret Sellars lykwols dat sa'n persoan in tige stabile persoanlikheid hawwe moat, om't se oars wolris raar op 'e kofje komme kinne. Ferskate gadingmakkers wurde om dy reden ôfwiisd en de syktocht giet fierder.

Underwilens binne yn Detroit resjersjeur Alex Murphy en syn partner Jack Lewis op it spoar fan gangster Antoine Vallon, waans binde op 'e iene of oare manear ferbean swier wapenreau yn 'e hannen krigen hat dat eins yn 'e romten foar bewiismateriaal op it plysjeburo heart te lizzen. Murphy fertinkt syn kollega's Daniels en Lake derfan korrupt te wêzen en de wapens oan Vallon trochspile te hawwen. Dêrom warskôgje se net ien oer wat se fan doel binne as se by in undercoveroperaasje efter Vallon oan geane. De gangster wurdt lykwols op it lêste momint warskôge, en by de dêropfolgjende sjitpartij rekket Lewis ferwûne. Murphy kriget neitiid in beskrobbing fan syn baas, kommissaris Karen Dean. Dy jûns, as er thús út 'e hûs giet om te sjen wêrom't syn auto-alaarm ôfgiet, docht Vallon in moardoanslach op him troch syn auto op te blazen.

Tink derom: Yn de tekst hjirûnder wurdt de ôfrin fan de film beskreaun. As jo de film sels sjen wolle, is it mooglik better dat jo it no folgjende diel fan 'e plotbeskriuwing (earst noch) net lêze.

Murphy wurdt yn kritike tastân yn it sikehûs brocht. Hy hat fjirdegraads brânwûnen oer 80% fan syn lichem, ien fan syn skonken en ien fan syn earms moatte amputearre wurde, hy is blyn rekke oan ien each en beide earen binne sa skansearre rekke dat er nea wer hearre kinne sil. It is noch mar de fraach oft er it oerlibje sil. Wannear't Sellars heart wat Murphy oerkommen is, liket de resjersjeur him in earsten kandidaat ta foar syn cyborgprogramma. Dr. Norton reizget ôf nei Detroit en bepraat Murphy syn frou Clara om yn te stimmen mei wat OmniCorp wol. Hy ûnthjit har dat er har man wer hielendal de âlde meitsje kin, mar dat is klearebare bedragerij.

De transformaasje fan Murphy ta de cyborg dy't "RoboCop" komt te hjitten, fynt plak yn in laboratoarium yn in ôfhandige úthoeke fan Sina. Wannear't Murphy nei de proseduere bybrocht wurdt, is er earst betize en hat er gjin fertrouwen yn lykfolwa yn syn om-en-by. Hy besiket te ûntsnappen, mar dr. Norton hat in út-knop ynboud, wêrmei't er it masinale diel fan RoboCop útsette kin, dat fier komt Murphy net. Werom yn it laboratoarium twingt Norton Murphy om syn sitewaasje ûnder eagen te sjen troch him fan alle masinale dielen fan syn nije lichem te ûntdwaan. Murphy is skokt om te ûntdekken dat er inkeld noch bestiet út in holle (mei harsens dy't foar in diel troch masinale ûnderdielen mei software ferfongen binne), in hân, it boppeste diel fan 'e wringe, in hert en in pear longen. Hy smeekt Norton om him te eutanisearjen, mar dy wegeret en manipulearret him om syn nije bestean te oanfurdzjen troch him te freegjen oft er syn frou Clara en jonge soan David soms noch mear pine dwaan wol as dat se al trochstean hawwe moatten.

Neitiid ûndergiet RoboCop in training foar syn taak as hanthavener fan wet en oarder, dy't ûnder tafersjoch stiet fan OmniCorp-wurknimmer Rick Mattox. Dyselde is in grut foarstanner fan folslein roboatyske soldaten en plysjes, en hat inkeld minachting foar RoboCop, dy't er as in grutte stap tebek sjocht. Sa't Mattox al foarsei, prestearret RoboCop by de training in stik minder as de echte robots, mei't syn minsklike emoasjes eltse kear in pear tellen fertraging opsmite by it nimmen fan beslissings oer libben en dea. Sellars achtet dat ûnakseptabel en draacht Norton op om it probleem op te lossen. De wittenskipper beslút de ferbinings tusken de organyske harsens fan Murphy en de software fan RoboCop te feroarjen, sadat yn gefjochtssitewaasjes de beslissings inkeld nommen wurde troch de software, dy't net behindere wurdt troch emoasjes. Om't dat sa fluch giet, is der dan noch tiid genôch om in weromkeppeling nei Murphy's harsens te meitsjen, dy't him tinke lit dat hysels de beslissings nommen hat sûnder dat er trochhat dat dat net sa is. By in nije test prestearret RoboCop neitiid nei behearren en ferslacht er sawol Mattox syn robots as Mattox sels.

Mei't er no klear is om ynset te wurden, giet Murphy werom nei Detroit. Hy besiket dêr dy jûns Clara en David, mar kin mar even bliuwe foar't it him tefolle wurdt en hy in hastige ôftocht blaze moat. De oare deis, koart foar't er troch Sellars, kommisaris Dean en boargemaster Durant oan 'e gearklofte media presintearre wurde sil, wurdt de folsleine database fan 'e pleatslike plysjetsjinst, it Detroit Police Department, yn 'e software fan RoboCop upload. Dêrta hearre ek bylden fan befeiligingskamera's fan 'e moardoanslach op Murphy sels, en as er dy bylden sjocht, stoart Murphy emosjoneel yn. Dat kin Sellars der no net by hawwe, dat hy set Norton ûnder swiere druk om it op te lossen, sadat de presintaasje trochgean kin. Norton oerspielt it systeem fan Murphy mei beskate hormoanen, sadat al syn emoasjes folslein ûnderdrukt wurde. Dat hat ta gefolch dat Murphy by de presintaasje Clara en David net wichtich genôch achtet om oandacht oan te skinken, mar wol middenmank it publyk in fuortflechtige krimineel gewaar wurdt en ynrekkenet.

Nei de tiid set RoboCop útein mei it oprôljen fan 'e ûnderwrâld fan Detroit, dat troch syn tadwaan yn koarte tiid in folle feiliger stêd wurdt. Dêrtroch kriget de Amerikaanske befolking, sa't Sellars al hope hie, fertrouwen yn roboatyske plysjes en ûntstiet der stipe foar it ynlûken fan 'e Wet-Dreyfus. Underwilens is Clara Murphy alhiel net gelokkich mei de sitewaasje, mei't se har derfan bewust is dat OmniCorp dingen foar har geheim hâldt. Dêrom begjint se fragen te stellen, en se lit har net mear ôfpoeierje mei dizenige ûnthjitten, lykas yn it begjin. Sellars en syn assistinten Liz Kline en Tom Pope beskôgje Murphy lykwols as eigendom fan OmniCorp en sjogge Clara as in lestige dwersbongel. Sellars jout opdracht oan dr. Norton om Clara by RoboCop wei te hâlden. Nettsjinsteande dat slagget it har om him op 'e strjitte oan te sprekken en te konfrontearjen mei it feit dat harren soan David nachtmerjes hat en ôfwikend gedrach fertoant.

Hoewol't er Clara stean lit en har foarby riidt, iepenet Murphy neitiid it fersegele dossier oer de moardoanslach op himsels, dêr't er eins gjin tastimming foar hat. Troch de oanslach te rekonstruëarjen, ûntdekt er dat David dêr út syn sliepkeamersfinster wei tsjûge fan wie en dat de jonge oan posttraumatysk stress-syndroom lijt. Murphy giet efter de binde fan Vallon oan en rint slimme skea op as de bindeleden him mei swiere wapens ûnder fjoer nimme by it binnenkringen fan harren skûlplak. Nettsjinsteande dat slagget it him om Vallon en al syn mannen út te skeakeljen. Op 'e wapens fan 'e binde treft Murphy neitiid de fingerôfdrukken oan fan resjersjeurs Daniels en Lake. Werom op it haadplysjeburo konfrontearje hy en syn âld-partner Lewis harren dêrmei. Daniels besiket him dea te sjitten, mar Murphy is him foar. Lake bekent dêrnei dat hy en Daniels al jierren foar Vallon wurke hawwe, en dat se yn gearwurking mei kommissaris Dean de binde fan Vallon foarsjoen hawwe fan yn beslach nommen wapens. Wannear't Murphy besiket om kommissaris Dean te arrestearjen, drukt Mattox, dy't it dwaan en litten fan RoboCop yn opdracht fan Sellars yn it each hâldt, op 'e út-knop.

Mei de help fan Pat Novak, de presintator fan in praatprogramma dat propaganda makket foar OmniCorp, wit Sellars dat ynsidint foar eigen gewin te brûken. Troch derop te wizen dat minsklike plysjes altyd kwetsber bliuwe sille foar omkeaping, wylst masines dêr ymmún foar binne, wit er de Senaat en it Amerikaanske Hûs fan Offurdigen safier te krijen dat dy de Wet-Dreyfus ynlûke. Underwilens stapt Clara nei de media ta om publyklik tagong ta har man easkjen. No't er syn doel berikt hat, beslút Sellars om RoboCop, dy't er inkeld as in masine sjocht en hielendal net as minske, te ferneatigjen om syn spoaren út te wiskjen. Dea hat er ek noch mear oan Murphy, want in martler is better as in held. Hy liicht Clara foar dat har man beswykt is oan 'e ferwûnings dy't er oprûn hat yn it gefjocht mei de binde fan Vallon, mar jout temûk Mattox opdracht om Murphy dea te dwaan wylst er yn it laboratoarium is foar reparaasjes. Sellars besiket Norton mei te krijen, en dyselde beart dat er him ôfkeapje lit mei finansiering foar takomstige projekten. Mar dit giet him fierstente fier en sadree't er it kantoar fan Sellars ferlitten hat, skillet er syn assistinte Jae Kim op om it laboratoarium ôf te sluten en Mattox syn mannen der net yn te litten.

Norton keart werom yn it laboratoarium en ferwideret it stjoerderke wêrmei't RoboCop útset wurde kin. Hy is krekt op 'e tiid om Murphy by te bringen en alles út te lizzen ear't de mannen fan Mattox troch de doar brekke. Murphy skeakelet harren út en iepenet dan in nij dossier oangeande it besykjen ta moard op himsels, wêrfoar't Sellars de haadfertochte is. Hy set ôf nei it haadkertier fan OmniCorp om 'e sakeman te arrestearjen, en it slagget Norton net om him tsjin te kearen. Dêrop hastiget de wittenskipper him nei it plysjeburo, dêr't er Jack Lewis ynljochtet oer wat der geande is. Murphy fjochtet him in wei foarby de gefjochtsrobots dy't it bedriuwshaadkertier befeiligje, wêrby't er fannijs slimme skea oprint. Mattox, dy't in earmbantsje om hat dat him identifisearret as fan ûnmisbere wearde foar OmniCorp, kin RoboCop oermasterje om't syn software tsjinkeart dat er syn wapen op Mattox rjochtsje kin. Mar Lewis arrivearret krekt op 'e tiid om Mattox del te sjitten.

Sellars, Kline en Pope binne ûnderwilens fan doel om mei Clara en David by harren as ûnbewuste gizelders it gebou te ferlitten mei in helikopter. Mar Murphy hellet harren yn op it helikopterplatfoarm op it dak fan 'e wolkekliuwer. Ek Sellars draacht in earmbantsje dat foarkomt dat RoboCop him oanfalle kin, mar wannear't Sellars syn hân oerspilet troch in pistoal op Clara en David te rjochtsjen om Murphy fiele te litten hoe machteleas oft er is, wit Murphy syn programmearring te oerwinnen en sjit er Sellars dea.

Yn 'e neisleep fan it hiele fiasko beëiniget OCP, de memme-ûndernimming fan OmniCorp, it cyborgprogramma. Op basis fan it tsjûgenis dat dr. Norton ôfleit foar in ûndersykskommisje fan it Amerikaanske Kongres sprekt de presidint fan 'e Feriene Steaten syn feto út oer it ynlûken fan 'e Wet-Dreyfus, in feit dat Pat Novak op live-tillefyzje ta razernij driuwt. Underwilens wurdt it sa goed as ferrinnewearre masinelichem fan Murphy yn it laboratoarium fan Norton ferfongen troch it oarspronklike prototype dat troch Sellars ôfwiisd wie om't it der te freonlik útseach. Neitiid kriget Murphy besite fan Clara en David.

Rolferdieling

Joel Kinnaman.

Gary Oldman.

Abbie Cornish.

haadrollen

personaazje	akteur/aktrise
resjersjeur Alex Murphy / RoboCop	Joel Kinnaman
dr. Dennett Norton	Gary Oldman
Clara Murphy	Abbie Cornish

byrollen

personaazje	akteur/aktrise
Raymond Sellars	Michael Keaton
Rick Mattox	Jackie Earle Haley
resjersjeur Jack Lewis	Michael K. Williams
kommissaris Karen Dean	Marianne Jean-Baptiste
Pat Novak	Samuel L. Jackson
Antoine Vallon	Patrick Garrow
dr. Jae Kim	Aimée Garcia
David Murphy	John Paul Ruttan
Liz Kline	Jennifer Ehle
Tom Pope	Jay Baruchel
resjersjeur Andre Daniels	K.C. Collins
resjersjeur John Lake	Daniel Kash
senator Dreyfus	Zach Grenier
boargemaster Durant fan Detroit	Douglas Urbanski

Produksje en distribúsje

Produksje

Al yn 2005 wie der sprake fan in nije RoboCop-film, dy't makke wurde soe troch de filmstudio Screen Gems. Mar ein 2006 waard bekend dat de ûntwikkeling fan dy film stagnearre wie. Yn maart 2008 waard RoboCop troch Metro-Goldwyn-Mayer (MGM) neamd yn in parseberjocht oer franchises dêr't dy studio yn 'e takomst fierder mei woe. Datselde jiers naam de produksje fan wat in remake wurde moast fan 'e klassiker RoboCop fan 'e Nederlânske regisseur Paul Verhoeven út 1987, fêste foarmen oan. Der waard oerienstimming berikt mei Darren Aronofsky om 'e remake te regissearjen, en dat waard bekendmakke op 'e San Diego Comic-Con fan 2008. It wie de bedoeling dat de film yn 2010 yn 'e bioskopen draaie soe.

Dat waard him lykwols net. Yn jannewaris 2010 wie de remake noch altyd net yn produksje nommen, hoewol't MGM de bûtenwacht derfan bewissige dat Aronofsky noch altyd oan it projekt ferbûn wie. Mar troch de finansjele swierrichheden fan 'e studio en kreätive ûniennichheden mei Aronofsky koe de nije RoboCop foarearst net makke wurde. MGM socht in regisseur dy't om sizzen jaan woe mar tagelyk dochs in kommersjeel súksesfolle film meitsje koe. Begjin maart 2011 waard oankundige dat de oerienkomst mei Aronofsky ûntbûn wie, en dat foar him yn 't plak José Padilha oannommen wie as regisseur, benammentlik op basis fan it súkses fan syn films Elite Squad (2007) en Elite Squad: The Enemy Within (2010). De preproduksje fan RoboCop gie dat jiers noch fan start.

Padilha wurke nei in senario dat skreaun wie troch Joshua Zetumer, dy't him dêrfoar yn sa'n hege mjitte basearre op it skript fan Edward Neumeier en Michael Miner foar de oarspronklike film fan Verhoeven, dat Neumeier en Miner ek in fermelding as senarioskriuwer op 'e ôftiteling fan 'e remake krigen. As produsinten wiene Marc Abraham en Eric Newman by it projekt belutsen foar de filmstudio's MGM, Columbia Pictures en Strike Entertainment. Foar de film wie in budget beskikber dat neffens ferskate boarnen fariëarre tusken $100 miljoen en $130 miljoen. De kamerarezjy wie yn 'e hannen fan Lula Carvalho, en de filmmuzyk waard fersoarge troch Pedro Bromfman.

Opnamen

De opnamen foar RoboCop setten op 24 septimber 2012 útein. Der waard benammen filme yn Toronto en oare dielen fan 'e Kanadeeske provinsje Ontario, en teffens yn Vancouver, yn 'e provinsje Britsk-Kolumbia. Yn Toronto waard û.m. filme op e kampus fan 'e Universiteit fan Toronto, dêr't de sêne opnommen waard wêryn't RoboCop presintearre wurdt oan 'e media en de boargers fan Detroit. Neffens in wurdfierder fan MGM waarden inkele sênes út RoboCop wier opnommen yn Detroit.

Distribúsje

De distribúsje fan RoboCop waard fersoarge troch Sony Pictures Releasing, de filmdistribúsjedifyzje fan Sony Pictures, dat de memme-ûndernimming fan Columbia Pictures is. De film gie op 12 febrewaris 2014 yn 'e Amerikaanske bioskopen yn premiêre. It byhearrende soundtrackalbum ferskynde op 4 febrewaris 2014 by platemaatskippij Sony Classical Records. RoboCop waard op 3 juny 2014 útbrocht op dvd en blu-ray.

Regisseur José Padilha.

Untfangst

Fan 'e filmkritisy krige RoboCop mingde resinsjes. Om't it in remake wie, waard de film fansels ferlike mei RoboCop fan Paul Verhoeven út 1987, en de konsensus wie dat de remake de mindere film wie. Sa skreau Guy Lodge fan it tydskrift Variety: "It is in minder boartlike ûndernimming as it orizjineel, mar it foldocht oan 'e tsjusterder easken fan dit tiidrek op it mêd fan reboots fan aksjefilms". Dat die de film neffens Lodge "mei masinale effisjinsje en in hint fan besieling". Yn The Hollywood Reporter skreau Leslie Felperin dat de remake "in bettere cast hat, in better skript en, fansels, opsichtiger special effects, mar hy mist de humor en subversive glêdheid fan it orizjineel."

Oaren wiene minder myld. Sa skreau Chris Hewitt yn it blêd Empire: "Men kriget it gefoel dat Padilha, of miskien syn lienhearen by de studio, net echt begripe wat it orizjineel sa spesjaal makke." Nigel Andrews fan 'e Financial Times fûn dat it "in leaden, ûnnedige remake" wie. Manohla Dargis fan The New York Times konkludearre op synyske wize: "Eltse generaasje kriget skynber de RoboCp dy't er fertsjinnet". Yn The Guardian neamde Peter Bradshaw de nije RoboCop "in ôfdomme pyf-paf-poeffilm dy't laden is mei yngewikkeld mar plichtmjittich nij 'satirysk' materiaal dat makket dat men mei sikestûkjende faasje jins belangstelling foar de film ferliest." Mark Kermode, in oare resinsint fan The Guardian, parte RoboCop lykwols 3 fan 5 stjerren ta. Neffens him wie de film "folle minder deprimearjend as men ferwachte hawwe koe" en wiene de "politike satire en filosofyske beprakkesearrings beholden bleaun dy't Verhoevens orizjineel oandreaune".

Op 'e webside Rotten Tomatoes, dy't resinsjes sammelet, hat RoboCop in midsmjittich goedkarringspersintaazje fan 49%, basearre op 221 ûnderskate resinsjes. De konsensuskrityk fan 'e webside, gearstald út al dy resinsjes, stelt: "Wylst [dizze film] folle better is as er wol wêze kinnen hie, slagget it de remake fan José Padilha net om it orizjineel te ferbetterjen." Op Metacritic, de wichtichste konkurrint fan Rotten Tomatoes, behellet RoboCop in goedkarringspersintaazje fan 52%, basearre op 41 resinsjes.

Resultaat

RoboCop brocht yn 'e bioskopen yn 'e Feriene Steaten en Kanada $58,6 miljoen op, en yn alle oare lannen en territoaria $184,1 miljoen. Wrâldwiid kaam de opbringst dêrmei út op $242,6 miljoen. Ofset tsjin it budget fan $100–130 miljoen betsjut dat in winst fan $112,6–142,6 miljoen, hoewol't dêr de marketingkosten noch wol ôf moatte.

Skraste ferfolchfilm

It wie oarspronklik de bedoeling dat de remake fan RoboCop teminsten ien ferfolch krije soe, en de ein fan 'e film lit dêr ek oerdúdlik romte foar. Mar hoewol't RoboCop út 'e reade sifers bleau, foel de opbringst ôf. Dêrom waard úteinlik besletten en sjoch ôf fan ferfolchfilms. Yn 2018 waard ynstee bekendmakke dat der jitris in reboot fan 'e RoboCop-franchise prebearre wurde soe mei in film dy't RoboCop Returns komme moast te hjitten. Dat soe in direkt ferfolch wurde op 'e oarspronklike RoboCop út 1987, wêrby't RoboCop 2, RoboCop 3 en de remake út 2014 retcond waarden. RoboCop Returns soe regissearre wurde troch de Súdafrikaansk-Kanadeeske regisseur Neill Blomkamp, mar yn augustus 2019 makke dyselde bekend dat er langer net mear oan it projekt ferbûn wie. Letter wie der sprake fan dat Abe Forsythe de rezjy fiere soe oer de nije reboot, mar neitiid waard fan 'e film neat mear fernommen.

Keppelings om utens

• (in) Offisjele webside fan RoboCop
• (in) Ynformaasje oer RoboCop yn 'e Internet Movie Database (IMDb)

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side.