Paul Cornu

Ut Wikipedy
Paul Cornu

Paul Cornu (Glos-la-Ferrière, 1881 - Lisieux, 6 juny 1944) wie in Frânsk fytsmakker en útfiner dy't as earste, op 13 novimber 1907, in frije flecht yn in helikopter makke.

Hy makke dizze flecht yn it plakje Coquainvilliers en fleach 20 sekonden lang en 1,50 meter heech. De 6,20 meter lange helikopter (ek wol bekend as de "fleanende fyts") bestie út in 24 hk Antoinette-motor en twa tsjinsteld draaiende rotors, mei in diameter fan 6 meter, om it koppel tsjin te gean. It tastel hie in startgewicht fan 260 kg en it hie as primitive foarm fan bestjoering oan beide siden in lytse fleugel.

Yn 1906 waard yn Dútslân in priis yn it foarútsjoch steld foar dejinge dy't oer in parkoers fan 1 kilometer fleane koe. Dit wie de Deutsch-Archdeacon Preise. Paul Cornu skreau him yn en wist fan freonen genôch jild by elkoar te krijen om mei te dwaan. De Deutsch-Archdeaconpriis waard úteinlik wûn troch Henri Farman.

Paul Cornu yn syn earste helikopter om 1907

Paul Cornu hie as test earst in skealmodel makke, mei rotors fan 2,25m yn diameter en in 2pk Buchet-motor. Hy brûkte in sek sân as ballêst. Yn de rin fan de ûntwikkeling waard it skealmodel ferfongen troch in tastel op wiere grutte en waarden de sânsekken úteinlik ferfongen troch de piloat. Mei in letter model kaam hy oant 6 meter hichte. Syn finansjele situaasje, it weibliuwen fan publisiteit en de ûnmooglikheden fan it tastel late derta dat Paul Cornu de fierdere ûntwikkeling yn 1909 staakte.

By in bombardemint fan de Alliearden oan it begjin fan D-Day waard syn hûs rekke en kaam Paul Cornu te ferstjerren.

Helikopter fan Paul Cornu.
De fjouwer horizontale flappen binne de rotorblêden, de twa fertikale flappen de stabilators

Ferskaat[bewurkje seksje | boarne bewurkje]

De bruorren Wright, de earsten dy't fleagen mei in motorisearre fleantúch, wiene ek fytsmakker.

Boarnen, noaten en referinsjes[boarne bewurkje]

Boarnen, noaten en/as referinsjes:
  • Bill Gunston/John Batchelor -Helicopters 1900-1960(1977, útjouwerij Phoebus Publ.)
  • Kenneth Munson - Helikopters (rige: Kleine Luchtvaart Encyclopedie) ( 1968, útjouwerij Moussault Amsterdam)