Poarperboarstgrûndo

Poarperboarstgrûndo
taksonomy
ryk dieren (Animalia) stamme rêchstringdieren (Chordata) klasse fûgels (Aves) skift do-eftigen (Columbiformes) famylje dofûgels of dowen (Columbidae) skaai poarpergrûndowen (Paraclaravis)
soarte
Paraclaravis geoffroyi
(Bonaparte, 1856)
IUCN-status: net bedrige
ferspriedingsgebiet

De poarperboarstgrûndo (Paraclaravis mondetoura, synonym (Claravis mondetoura) is ien fan 'e twa fûgelsoarten yn it skaai poarpergrûndowen (Paraclaravis) út de famylje dowen (Columbidae).

Skaaimerken

De fûgel wurdt 18 oant 24 sm lang en weaget 89 oant 95 gram. Mantsjes binne blaugriis mei donkerder boppedielen as ûnder. Se ha in ljochter gesicht en in readbrún boarst. Op 'e optearde wjuk hat de fûgel trije poarperen bannen. De sturt is ek blaugriis mei wite bûtenfearren. Wyfkes binne hielendal brún, ha in kanielkleurich gesicht en readbrune bannen op 'e wjuk. De fearren fan mantsjes skimerje yn it sinneljocht mear as dy fan wyfkes.

Fersprieding

De fûgel libbet yn 'e berchbosken fan Midden- en Súd-Amearika fan súdeastlik Meksiko oant it westlike diel fan Sintraal-Bolivia, De soarte is monotypysk, itjinge betsjut dat der gjin ûnderferdieling yn ûndersoarten bestiet.

It habitat bestiet út de tichte ûndergroei fan berchbosken, spesifiker bamboebosken tusken 900 en 3000 m boppe de seespegel.

Hâlden en dragen

De fûgel is lykas de oare soarte yn it skaai, de poarperbângrûndo, sterk ôfhinklik fan it sied fan bamboe. Bamboe bloeit net oeral tagelyk en de fûgel folget dêrfandinne de bloei fan bamboe. Se libje it grutste part fan 'e tiid op 'e grûn.

Status

De grutte fan 'e populaasje waard yn 2019 op 50.000 oant 500.000 folwoeksen fûgels rûsd. Op 'e Reade list fan 'e IUCN wurdt de fûgel as net bedrige klassifisearre. Bedrigingen binne it ferdwinen fan bamboebosken foar lânbou en ûntwikkeling. Dêrnjonken is de fragmintaasje in grut gefaar, om't der dan gatten falle yn 'e beskikberens fan bamboesied. In lytsere bedriging foarmet de hannel yn 'e fûgel. De populaasje fan 'e soarte nimt ôf, mar net sa hurd dat de soarte as bedrige beskôge wurde kin.

Boarnen, noaten en/as referinsjes:

Birdlife Ebird Avibase Commons Wikimedia Commons  Ofbylden dy't by dit ûnderwerp hearre, binne te finen yn de kategory Poarperboarstgrundo fan Wikimedia Commons.