P.N. Elrod

Ut Wikipedy
P.N. Elrod
skriuwer
persoanlike bysûnderheden
echte namme Patricia Nead Elrod
nasjonaliteit Amerikaansk
berne 1954
berteplak ? (Teksas)
etnisiteit Angelsaksysk Amerikaansk
wurk
taal Ingelsk
sjenre fantasy, horror, romantyk, misdiefiksje, histoaryske romans
bekendste
  wurk(en)
Vampire Files
Jonathan Barrett, Gentleman
   Vampire
jierren aktyf 1990 – no
offisjele webside
www.vampwriter.com

P.N. Elrod (folút: Patricia Nead Elrod; yn Teksas, 1954) is in Amerikaansk skriuwster dy't romans en koarte ferhalen op har namme stean hat fan 'e literêre sjenres fantasy, horror, romantyk, misdiefiksje en histoaryske fiksje. Se hat har lykwols benammen talein op it subsjenre fan 'e urban fantasy, mei romansearjes as de Vampire Files en Jonathan Barrett, Gentleman Vampire. Elrod hat ek wurke as redaktrise. Utjouwerijen as Ace, DAW en St. Martin's Griffin hawwe ferskate blomlêzings mei koarte ferhalen fan oare auteurs útjûn dy't sy gearstald hie.

Libben en karriêre[bewurkje seksje | boarne bewurkje]

P.N. Elrod waard yn 1954 berne yn 'e Amerikaanske steat Teksas. Hja sette har karriêre as auteur útein by TSR mei it skriuwen fan modules foar kaartspullen, boerdspullen en live action role-playing games. Yn 1990 publisearre se har earste roman, Bloodlist, dat ek it earste diel wie fan 'e romansearje Vampire Files. Dy rige spilet yn it Chicago fan 'e 1930-er jierren, dêr't privee-detektive Jack Fleming, syn partner Charles Escott en syn faam Bobbi Smythe misdriuwen behannelje. De earste saak dy't Jack oplosse moat (yn Bloodlist) is syn eigen moard. Op Bloodlist folgen oant 2009 alve ferfolchromans, plus de novelle The Devil You Know, dy't Elrod yn eigen behear yn in beheinde, synjearre oplaach útbrocht by har útjouwerij Vampwriter Books (yn Fort Worth, oprjochte yn 2009).

Yn 1993 ferskynde fierders Red Death, it earste diel fan in oare romansearje fan 'e hân fan Elrod: Jonathan Barrett, Gentleman Vampire. Dat is in rige histoaryske urban fantasyboeken, dy't spylje tsjin 'e eftergrûn fan 'e Amerikaanske Unôfhinklikheidsoarloch. It twadde diel, Death and the Maiden, kaam yn 1994 út, in jier letter folge troch Death Masque. It lêste diel fan 'e tetralogy, Dance of Death, waard publisearre yn 1996. BenBella Books joech de hiele searje yn 2004 op 'e nij út, oanfolle mei nij materiaal dat net yn 'e oarspronklike útjeften opnommen wie. De draai dy't Elrod oan it ferhaal fan Jonathan Barrett, Gentleman Vampire jout, is dat Barret en syn famylje de hiele oarloch troch oan 'e kant fan 'e Britten steane, wat in (foar Amerikanen) frij unyk perspektyf op 'e histoaryske perioade fan 'e Amerikaanske Unôfhinklikheidsoarloch biedt.

Tusken 1997 en 2004 skreau Elrod ek de trije romans fan 'e rige Lord Richard, Vampire, yn 'e mande mei akteur Nigel Bennett. Dy boeken waarden útjûn troch Baen Books. Hoewol't dizze trilogy net yn itselde universum spilet as de Vampire Files en Jonathan Barrett, Gentleman Vampire (dy't deselde wrâld diele), is ek yn Lord Richard, Vampire de protagonist in goedmienende fampier dy't it opnimme moat tsjin fampieren mei minder goede bedoelings. De haadpersoan, Lord Richard, is wol omskreaun as "James Bond mei lange hoektosken".

Yn 'e op himsels steande roman Quincey Morris, Vampire, út 2001, linkte Elrod har eigen wrâld fan 'e Vampire Files en Jonathan Barrett, Gentleman Vampire oan 'e wrâld dy't Bram Stoker skoep mei syn ferneamde roman Dracula, út 1897. Oan 'e ein fan dat boek gie it personaazje Quincey Morris dea by de lêste konfrontaasje mei greve Dracula; yn Elrod har boek ûntwekket er wer út 'e dea as fampier (hoewol net as in boasaardige fampier lykas de greve). Yn 2015 ferskynde fan Elrod fierders The Hanged Man, it earste diel fan 'e trilogy On Her Majesty's Phychic Service, dy't ta it subsjenre fan 'e steampunk heart.

Fan in hiel oar kaliber, en hearrend ta it horrorsjenre ynstee fan fantasy, binne de mei it live action role-playing game Dungeons & Dragons ferbûne boeken fan Elrod, dy't yn it Ravenloft-universum spylje. De protagonist yn dy beide romans, I, Strahd: The Memoirs of a Vampire (1993) en I, Strahd: The War Against Azalin (1998), is in antyheld, de tsjustere en sinistere fampier greve Strahd von Zarovich. Foar dy beide boeken ûntfong Elrod ek rûnom lof fan mainstream-literatuerkritisy. Wer hiel oars is de op himsels steande roman The Adventures of Myhr, út 2003, dy't ta it komyske subsjenre fan 'e fantasyliteratuer heart. It titelpersonaazje is heal minske, heal kat en springt op magyske wize fan wrâld nei wrâld om it bliid boadskip fan pizza en Beatles-karaoke te fersprieden mei syn partner, in segrinige tsjoender mei in foarleafde foar techno-raves en obsene teksten ôfprinte op T-shirts.

Njonken romans hat Elrod ek tsientallen koarte ferhalen skreaun, dy't yndield wurde kinne by fantasy, romantyk, science fiction, misdiefiksje en horror. Yn novimber 2011 wûn se mei har koarte misdieferhaal Beach Girl de publykspriis fan it Ellery Queen's Mystery Magazine. Fierders waard se yn 2010 nominearre foar de oeuvrepriis op it mêd fan urban fantasy fan 'e Romantic Times Reviewers' Choice Awards, en yn april 2011 wûn se de Pioneer Achievement Award op it mêd fan fiksje oer fampieren fan 'e Romantic Times Reviewers' Choice Awards.

Behalven mei eigen wurk hat Elrod ek bekendheid krigen as redaktrise fan it wurk fan oare skriuwers. Sa hat se ferskate blomlêzings gearstald, benammen fan koarte ferhalen op it mêd fan urban fantasy. Yn 2006 ferskynde ûnder har redaksje by St. Martin's Griffin de blomlêzing My Big Fat Supernatural Wedding, dêr't ferhalen oer trouwerijen mei boppenatuerlike aspekten yn sammele wiene. Dêrmei helle se de bestsellerlist fan 'e krante USA Today, en wûn se de PEARL Award foar bêste blomlêzing. Yn 2008 folge My Big Fat Supernatural Honeymoon, in blomlêzing oer houliksreizen mei boppenatuerlike aspekten. Oare blomlêzings ûnder Elrod har redaksje wiene Strange Brew (2009), Dark and Stormy Knights (2010) en Hex Appeal (2012). Yn 2004 wie Elrod fierders tegearre mei Roxanne L. Conrad (better bekend ûnder har pseudonym Rachel Caine) de redaktrise fan it companionboek Stepping Through the Stargate: The Science, Archaeology and Military of Stargate SG-1, oer de wittenskip efter de tillefyzjesearje Stargate SG-1, mei artikels en oare bydragen fan wrâldferneamde wittenskippers, de Amerikaanske Loftmacht en akteurs út 'e searje.

Wurk[bewurkje seksje | boarne bewurkje]

As skriuwer[bewurkje seksje | boarne bewurkje]

romans
  • Vampire Files
    • 1990 – Bloodlist
    • 1990 – Lifeblood
    • 1990 – Bloodcircle
    • 1991 – Art in the Blood
    • 1991 – Fire in the Blood
    • 1992 – Blood on the Water
    • 1998 – Chill in the Blood
    • 1999 – Dark Sleep
    • 2000 – Lady Crymsyn
    • 2003 – Cold Streets
    • 2005 – Song in the Dark
    • 2009 – Dark Road Rising
    • 2009 – The Devil You Know (in novelle, útjûn yn in beheinde oplaach)
    • Vampire Files-omnibusedysjes
      • 2003 – Vampire Files, Vol. 1: Books 1-3
      • 2006 – Vampire Files, Vol. 2: Books 4-6
      • 2011 – Vampire Files, Vol. 3: Books 7-8
      • 2011 – Vampire Files, Vol. 4: Books 9-10
      • 2012 – Vampire Files, Vol. 5: Books 11-12
  • Jonathan Barrett, Gentleman Vampire
    • 1993 – Red Death (werútjûn, oanfolle mei nij materiaal, yn 2004)
    • 1994 – Death and the Maiden (werútjûn, oanfolle mei nij materiaal, yn 2004)
    • 1995 – Death Masque (werútjûn, oanfolle mei nij materiaal, yn 2004)
    • 1996 – Dance of Death (werútjûn, oanfolle mei nij materiaal, yn 2004)
  • Ravenloft
    • 1993 – I, Strahd: The Memoirs of a Vampire
    • 1998 – I, Strahd: The War Against Azalin
  • Lord Richard, Vampire (mei Nigel Bennett)
    • 1997 – Keeper of the King
    • 2001 – His Father's Son
    • 2004 – Siege Perilous
  • On Her Majesty's Psychic Service
    • 2015 – On Her Majesty's Psychic Service: The Hanged Man
    • 20?? – On Her Majesty's Psychic Service: The Chariot (oankundige, mar anno 2019 noch net ferskynd)
    • 20?? – On Her Majesty's Psychic Service: The Empress (oankundige, mar anno 2019 noch net ferskynd)
  • op harsels steande romans
    • 2001 – Quincey Morris, Vampire (in útwreiding fan it koarte ferhaal The Wind Breathes Cold)
    • 2003 – The Adventures of Myhr
koarte ferhalen
  • 1992 – The Wind Breathes Cold (yn 'e blomlêzing Dracula, Prince of Darkness, û. red. f. Martin H. Greenberg),
  • 1992 – Caretaker (yn 'e blomlêzing Dracula, Prince of Darkness, û. red. f. Martin H. Greenberg)
  • 1995 – You'll Catch Your Death (in Vampire Files-ferhaal; yn 'e blomlêzing Vampire Detectives, û. red. f. Martin H. Greenberg)
  • 1995 – A Night at the (Horse) Opera (yn 'e blomlêzing Celebrity Vampires, û. red. f. Martin H. Greenberg)
  • 1995 – Fugitives (yn 'e blomlêzing Women at War, û. red. f. Lois McMaster Bujold en Roland J. Green)
  • 1996 – The Witch's Mark (yn 'e blomlêzing Time of the Vampires, û. red. f. harsels en Martin H. Greenberg; werútjûn yn 2004)
  • 1998 – The Quick Way Down (in Vampire Files-ferhaal; yn 'e blomlêzing Mob Magic, û. red. f. Brian M. Thomsen en Martin H. Greenberg)
  • 2001 – Myhr's Adventure in Hell (yn 'e blomlêzing Assassin Fantastic, û. red. f. Martin H. Greenberg en Alexander Potter)
  • 2001 – Wolf and Hound (skreaun mei Nigel Bennett; yn 'e blomlêzing Dracula in London, û. red. f. harsels)
  • 2002 – Dog Spelled Backwards (yn 'e blomlêzing Familiars, û. red. f. Denise Little)
  • 2002 – The Tea Room Beasts (yn 'e blomlêzing Creature Fantastic, û. red. f. Denise Little)
  • 2002 – The Astral Outrage (yn 'e blomlêzing Vengeance Fantastic, û. red. f. Denise Little)
  • 2002 – Bossman (yn 'e blomlêzing Death by Horoscope, û. red. f. Anne Perry en John Helfers)
  • 2002 – The Scottish Ploy (yn 'e blomlêzing Murder Most Romantic, û. red. f. Denise Little)
  • 2002 – Izzy's Shoe-In (yn 'e blomlêzing White House Pet Detectives, û. red. f. Carole Nelson Douglas)
  • 2003 – The Breath of Bast (in Vampire Files-ferhaal; yn 'e blomlêzing Kittens, Cats, and Crime, û. red. f. Ed Gorman)
  • 2003 – Silva's Dream Date (yn 'e blomlêzing Sorcerer's Academy, û. red. f. Denise Little)
  • 2003 – Slaughter (in Vampire Files-ferhaal; yn 'e blomlêzing The Repentant, û. red. f. Brian M. Thomsen en Martin H. Greenberg)
  • 2004 – Tarnished Linings (yn 'e blomlêzing Magic Shops, û. red. f. Denise Little)
  • 2004 – Death in Dover (yn 'e blomlêzing Death by Dickens, û. red. f. Ann Perry)
  • 2004 – King of Shreds and Patches (yn 'e blomlêzing Rotten Relations, û. red. f. Denise Little)
  • 2005 – Farscape Villains I've Known and Loved (yn 'e blomlêzing Farscape Forever!: Sex, Drugs and Killer Muppets)
  • 2005 – The Name of the Game (yn 'e blomlêzing All Hell Breaking Loose)
  • 2005 – The Why of the Matter (yn 'e blomlêzing Kolchak: The Night Stalker Chronicles)
  • 2007 – Power Hungry (yn 'e blomlêzing The Kolchak Casebook)
  • 2007 – Grave-robbed (in Vampire Files-ferhaal; yn 'e blomlêzing Many Bloody Returns, û. red. f. Charlaine Harris en Toni L.P. Kelner)
  • 2009 – The Company You Keep (in Vampire Files-ferhaal; yn 'e blomlêzing Vampires: Dracula and the Undead Legions)
  • 2009 – Hecate's Golden Eye (yn 'e blomlêzing Strange Brew, û. red. f. harsels)
  • 2010 – Dark Lady ( in Vampire Files-ferhaal; yn 'e blomlêzing Dark and Stormy Knights, û. red. f. harsels)
  • 2011 – Vampires Prefer Blondes ( in Vampire Files-ferhaal; yn 'e blomlêzing Chicks Kick Butt)
  • 2011 – Beach Girl (yn it Ellery Queen's Mystery Magazine, nûmer fan novimber 2011)
  • 2012 – Outside the Box ( in Vampire Files-ferhaal; yn 'e blomlêzing Hex Appeal, û. red. f. harsels)
non-fiksje

As redaktrise[bewurkje seksje | boarne bewurkje]

Prizen en nominaasjes[bewurkje seksje | boarne bewurkje]

jier priis resultaat kategory foar
1999 Lord Ruthven Award wûn bêste roman Chill in the Blood
2006 PEARL Award wûn bêste paranormale blomlêzing My Big Fat Supernatural Wedding
2007 PEARL Award earfolle fermelding bêste paranormale blomlêzing My Big Fat Supernatural Honeymoon
2007 PEARL Award earfolle fermelding bêste paranormale blomlêzing Strange Brew
2010 Romantic Times Reviewers' Choice Award nominearre oevrepriis foar urban fantasy n.f.t.
2011 Romantic Times Reviewers' Choice Award wûn Pioneer Achievement Award in Vampire Fiction n.f.t.
Ellery Queen's Mystery Magazine Readers' Choice Award wûn bêste koarte misdieferhaal Beach Girl

Keppelings om utens[bewurkje seksje | boarne bewurkje]

Boarnen, noaten en referinsjes[boarne bewurkje]

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side.